Баян-Өлгийн Засаг даргад МАН-аас өөрийгөө сурталчлагч Н.Тлеухан эхнэрээ зодсон асуудлаар шүүгдэж байжээ

Баян-Өлгий аймгийн Засаг дарга Е.Зангарыг үүрэгт ажлаас нь энэ сарын 29-нд Ерөнхий сайд Н.Учрал үүрэгт ажлаас нь чөлөөлөх шийдвэр гаргасан.

Түүнийг үүрэгт ажлаас нь чөлөөлсөн үндэслэлээ Тамгын газрын дарга нь анхан шатны шүүхээс ял авсантай холбоотой хэмээн тайлбарладаг. Иймд аймгийн ИТХ-ын 20 орчим төлөөлөгч 2016-2020 онд Баян-Өлгий аймгийн АН-ын даргаар ажиллаж, 2024 онд Засаг даргаар томилогдсон Е.Зангарыг огцруулах шаардлага хүргүүлжээ.

Тус аймагт 2024 оны ИТХ-ын сонгуулиар Ардчилсан нам ялалт байгуулсан юм. АН-ын ялалт авсан аймагт дараачийн Засаг даргад МАН-аас хүнээ сойж эхэлсэн төдийгүй Н.Тилеухан гэгч өөрийгөө сурталчлаад эхэлсэн байна.

“МАН-ын Улс төр, намын байгуулалтын газарт улс төрийн ажилтан” байсан гэх тодотгол түүний анкет дунд бий. 2017-2020 онд Х.Баделханыг Барилга хот байгуулалтын сайд хийж байх үед Бодлого төлөвлөлтийн газарт Хөрөнгө оруулалт үйлдвэрлэлийн газрын даргын албан тушаал хашиж байсан нэгэн. Өдгөө “Хан билүү” ХХК-ийн гүйцэтгэх захирлаар ажилладаг аж.

Н.Тлеухантай холбоотой эрүүгийн хэрэг Баянгол дүүргийн эрүүгийн хэргийн анхан шатны шүүх дээр бүртгэлтэй байдгийг нээлттэй мэдээллийн сангаас олж харж болно. Тэрбээр 2017 онд өөрийн эхнэр Т.Н-д догшин авирлан зодож, бие махбодид нь хөнгөн зэргийн гэмтэл санаатай учруулсан гэмт хэрэгт холбогдсон байна.

Шүүхэд Н.Тлеухан мэдүүлэгтээ “Нэг удаа намайг ажлаасаа тараад гэртээ иртэл эхнэрийн ажлын 4 багш архи уугаад халсан байдалтай байсан. Тэр ажлынхаа хүмүүсийн дэргэд надад янз бүрийн юм яриад байхаар нь би гараад явсан.

Энэ хэрэг гарсан өдөр би УИХ-ын гишүүн С-тэй Энканто тауны саунд суучихаад гэртээ эргэж ирсэн. Дараа нь би нутгийнхантайгаа нэг шил архи уугаад гэртээ орж ирэхэд хоол, цайгүй байхаар нь эхнэртээ “цай чана” гэж хэлсэн. Тэр үед бид хоёр үг зөрөлдөөд би эхнэрээ алгадсан нь үнэн. Цаашид дахин ийм асуудал гаргахгүй. Би өөрийн гэм бурууг ойлгож байна” хэмээж байжээ.

Харин түүний эхнэр Т.Н “Манай нөхөр надад байнга гар хүрдэг байгаагүй ч архи уусан үедээ зоддог. Би нөхрийнхөө ээжид энэ талаар хэлэхэд түүнийг утсаар загнаж байсан. Би архи уудаггүй. Тэр хэрэг гарсан өдөр манай ажлын нэг багш гуравдугаар улирлын амралтаар Япон улс руу явж ирээд нэг виски авчирсныг бид нар хувааж уугаад дараа нь би гэртээ дагуулж ирээд нэг вино уусан юм. Би нөхрийнхөө үгнээс зөрдөггүй. Би сургуулиас зохиогдсон ямар нэгэн үйл ажиллагаанд оролцдоггүй. Ажил, гэр, хүүхдийн цэцэрлэгээр л ордог. Манай нөхөр дахин надад гар хүрэхгүй гэж амласан. Би түүнд би итгэж байна. Бид нар хоорондоо сайн ярилцсан. Одоо надад одоо гомдол, санал байхгүй, нэхэмжлэх зүйлгүй” хэмээн мэдүүлжээ. Мөн хэд хэдэн гэрч Н.Тлеуханы эхнэрийг зодуулсан байдалтай ажилдаа ирж байсан хэмээн мэдүүлсэн байна.  

Шүүхээс түүнийг хөнгөн гэмт хэргийг анх удаа үйлдсэн бөгөөд учруулсан хохирлоо бүрэн төлсөн, гэм хорыг арилгасан нөхцөлд шүүгдэгчтэй сайн дураараа эвлэрсэн бол хэргийг хэрэгсэхгүй болгоно” гэж заасныг үндэслэн Эрүүгийн хуулийн ерөнхий ангийн 71 дүгээр зүйлд заасныг баримтлан шүүгдэгчид холбогдох хэргийг хэрэгсэхгүй болгож, түүнийг эрүүгийн хариуцлагаас чөлөөлж шийдвэрлэж байсан аж.

Т.ГЭРЭЛТ-ИРЭЭДҮЙ

Өөрийн сэтгэгдлээ илэрхийл

Share Tweet