Нийслэл рүү зохицуулагчаар татагдсан Н.Мандуулын оронд З.Төмөртөмөө Чингэлтэйд ирэх хувилбар

2025 онд “Г.Занданшатарыг Ерөнхий сайд болбол түүний хүн гэгддэг З.Төмөртөмөө хотын дарга болох уу” гэх шар мэдээ сошиалаар урсгаж, өөрийгөө нийслэлийн аль нэг албан тушаалд очихоо урьдчилан тандуулж нэг үзсэн З.Төмөртөмөөгийн хувьд энэ удаад Чингэлтэй дүүргийн Засаг даргаар очих яриагаа хөшигний ард хийжээ.

“Улаанбаатар орон сууцжуулалт”-ын захирал гэх албан тушаал дээр очиж үзсэн тэр энэ удаад дүүрэг даргалах нь.

Угтаа Хотын дарга Б.Пүрэвдагва нийслэлээс хэрэгжүүлэх мега төслүүдээ хариуцуулах таван зохицуулагчтай болж буйгаа зарласны ард НИТХ-ын төлөөлөгч, Чингэлтэй дүүргийн Засаг дарга Н.Мандуулыг Орон сууцжуулалтын төслүүд хариуцсан зохицуулагч болгож буй. Энэ сэлгээг Н.Учрал ч дэмжсэн байна.

Г.Занданшатарыг УИХ-ын дарга байхад ахлах зөвлөхийнх нь албан тушаалыг хашиж байсан Ж.Сүхбаатар одоо Н.Учралыг УИХ-ын дарга болох үеэс Ерөнхий сайд болоход нь ч дагаж, зөвлөхийн албан тушаал дээр ирчихсэн яваа.

Н.Учралын дэргэд очсоныхоо дараа НИТХ-ын төлөөлөгч З.Төмөртөмөөг Н.Мандуултай сэлгэх саналыг ивж, улмаар албажуулахаар болсон аж.

Ерөнхийлөгчийн сонгуулиар нийслэлээс санал зулгаах чухал дүүрэгтээ ордог Чингэлтэй дээр ийн 2027 оноос урьтаж Г.Занданшатар өөрийн томилгоонуудыг зүтгүүлж буй нь эндээс харагдана.

Г.Занданшатар Ерөнхий сайдаасаа буумагцаа өөрийн хүмүүсээ томоохон албан тушаалуудад зүтгүүлсээр яваа. Яагаад огцорсон асуудлаараа өнөөдрийг хүртэл ганц үг дуугараагүй түүний шагнал нь эдгээр, өөрийн хүмүүстээ сандал суудал авч яваа нь.

Тухайлбал, “Эрдэнэс критикал минералс” ТӨҮГ-ын даргын суудлаас Д.Тогтохсүрэнгийн оронд нь өөрийн хүн Д.Мөнхсайханыг, “Дарханы төмөрлөгийн үйлдвэр”-ийн захирал Б.Чагнаадоржийг “Эрдэнэс Тавантолгой” ХК руу татуулж, захирлын албан тушаалд суулгасан юм.

Нөгөө талд МАН-ын 38-ын тал Х.Нямбаатарыг ажлаа өгсний араас нийслэл дээрх хүчээ зузаатгахад гол хүчээ төвлөрүүлж, Нийслэлийн МАН-ын хорооны даргад Э.Бат-Амгаланг зүтгүүлэх дээр урьдач нөхцлөө ийн бүрдүүлж байна гэж харагдана.

Т.ГЭРЭЛТ-ИРЭЭДҮЙ

Холбоотой агуулгыг хавсаргалаа

Өөрийн сэтгэгдлээ илэрхийл

Share Tweet