Яаралтай гэж үзвэл С.Баяр, Ч.Давааням нарын гомдлыг өнөөдөр ХЭЛЭЛЦЭНЭ

Өнөөдөр буюу 2020 оны 11-р сарын 17-нд Монгол Улсын Ерөнхий сайд асан С.Баяр, Ч.Давааням нарт холбогдох эрүүгийн хэргийн шүүх хуралдаан давж заалдах шүүхэд хуралдах тов дуулдав. Уг хэргийг өнгөрсөн долоо хоногийн пүрэв гаригт хэлэлцэх ёстой байсан ч улсын хэмжээнд бүх нийтийн бэлэн байдлын зэрэгт шилжиж, хатуу хөл хорио тогтоосонтой холбогдуулан хойшилсон юм.

Шүүхийн ерөнхий зөвлөлөөс гаргасан мэдэгдэлд анхан болон давж заалдах шатны шүүхүүдийн шүүх хуралдааныг хойшлуулж байгааг дурдсан байсан. Гэхдээ цагдан хорио юм уу зөрчлийн яаралтай хурлууд л бол орж байгаа хэмээн эх сурвалж мэдээлж байна.

Тиймээс өнөөдөр шүүгч нар хуралдаж, С.Баяр, Ч.Давааням нарт холбогдох хэрэг шаардлагатай хуралд тооцогдох уу, үгүй юу гэдгийг хэлэлцэх юм. Улмаар хуралдах эсэхээ шийдэх аж.

“Бие нь муу байна, бие нь муудсан гэх мэтчилэн шүүхийн үйл явцыг удаашруулж, ял сонсохоос зайлсхийгээд байсан түүнийг өнгөрсөн долдугаар сард анхан шатны шүүхээс таван жилийн хорих ялаар шийтгэсэн. Гэтэл ял авснаасаа хойш биеийн байдал сайн байгаа бололтой нам жим л байна. Дамжин өнгөрөх 409-р хорих ангид цагдан хоригдож буй. Төрд ажиллаж байсан зарим хүмүүс шоронд орохоороо “Төр ажилласан хүндээ халтай юм. Хэрэг үйлдээгүй байж хэлмэгдлээ” хэмээн шоронд өлсгөлөн зарлаж, бие нь муудлаа эмнэлэг бараадлаа хэмээн гоншгоноцгоодог. Гэтэл С.Баяр тэгсэнгүй. Шүд зууж буй бололтой. Эсвэл дараагийн шүүх хурлаар ялаас чөлөөлөгдөнө гэж итгэж байгаа юм болов уу. Түүний найз Ч.Даваанямын хувьд хоёр жилийн хорих ял сонсоод буй.

Тэднийг ялласнаас гадна хууль бусаар олж авсан орлого гэж үзэн С.Баяраас 5 тэрбум 580 сая 440 төгрөгийг, Ч.Даваанямаас 5 тэрбум 766 сая 40 мянган төгрөгийн эд хөрөнгийн үнэлгээ бүхий АНУ дахь орон сууцыг хураан авч улсын орлого болгохоор шүүхээс шийдвэрлэсэн юм.Тэгвэл уг шийдвэрийн дагуу АНУ-ын Нью-Йорк, Манхаттан хотуудад байх тэдний нэр дээрх үл хөдлөх хөрөнгүүдийг битүүмжлэх хүсэлтийг манай улсаас АНУ-ын хуулийн байгууллагад хүргүүлсэн талаарх мэдээллүүд хөвөрсөн.

Гэвч хууль эрхзүйн хувьд тухайн эд хөрөнгүүдийг нь хурааж, улсын орлого болох боломжгүй болчихоод байгаа гэх. Учир нь С.Баяр, Ч.Давааням нар өөрсдийгөө гэмт хэрэг үйлдээгүй хэмээн мэлзэж, давж заалдах шатны шүүхэд “гомдчихоод” байгаа учраас эд хөрөнгийг нь хураах анхан шатны шүүхийн шийдвэр “царцчихаад” байгаа юм байна.

Өөрөөр хэлбэл энэ хэргийг гурван шатны шүүхийн шийдвэрээр эцэслэн шийдвэрлэж, анхан шатны шүүхийн шийтгэх тогтоолыг давах болон хянах шатны шүүх хурлаар баталгаажуулж байж л С.Баяр, Ч.Давааням хоёроос хохиролын мөнгийг гаргуулж, АНУ дахь хаусуудыг нь хураах эрхзүйн орчин бүрдэх нь.

Энэ мэдээнд өгөх таны үнэлгээ

Хуваалцаарай Жиргээрэй