Теннисний ертөнцийн шинэ “хаан” Карлос Алькараз
Талбайн теннисний энэ оны отгон “Их дуулга” АНУ-ын нээлттэй тэмцээнд 19 настай Карлос Алькараз түрүүллээ. Тэрээр энэ түрүүг авснаар “Их дуулга”-д хамгийн залуудаа түрүүлсэн, дэлхийн чансааг хамгийн залуудаа тэргүүлсэн дээд амжилтыг хамтад нь эзэмших болов.
Теннисний ертөнц ч шинэ “хаан”-тай болсноос хүлээн зөвшөөрч, их ирээдүй хүлээж байгаа гэдэгт нь итгэлтэй байна. Дөрвөн настайдаа теннисээр хичээллэж эхлэн, 16-тайдаа Европын өсвөрийн аварга болсон энэ хүү хоёр жилийн өмнөөс насанд хүрэгчдийн ангилалд цахиур хагалж эхэлсэн юм.
2020 оны хоёрдугаар сард 17-тойдоо Рио де Жанейрогийн тэмцээнд анх мэргэжлийн теннист хөл тавьж, эхний тойрогтоо гурван цаг гаруй тоглож хожиход л мэргэжилтнүүд теннисний ертөнцөд ямархан их авьяас орж ирснийг мэдэрсэн гэдэг. Дараа жил нь анхныхаа тэмцээнд түрүүлэхэд дахиад олон ч тэмцээнд түрүүлнэ гэдэгт бүгд итгэх болжээ.
Ноднингийн “US open”-д дэлхийн №3 Стефанос Циципасыг хожиход харин теннисний ертөнц ирээдүйн хаан, олон удаагийн Их Дуулгын эзэнтэй учирснаа ойлгосон юм. ОХУ-ын нэрт теннисчин Евгений Кафельников тухайн үед Алькаразыг ойрын гурван жилд №1 болно гэсэн бол олонх хоёр жил л хангалттай гэж байв. Харин тэр энэ даалгаврыг ганцхан жилд биелүүлэв.
Карлос Алькараз “US open”-д түрүүлснээр,
-19 нас дөрвөн сартайдаа дэлхийн чансааг тэргүүлж, Ллейтон Хьюиттийн 20 нас найман сартайдаа тогтоосон дээд амжилтыг эвдэв. -“Их дуулга”-д хамгийн залуудаа түрүүлсэн теннисчдийн эхний 10-т орж ирлээ. Пит Сампрас /19 нас 28 хоног/, Рафаэль Надаль /19 нас, хоёр хоног/ нар энэ жагсаалтыг тэргүүлдэг.
-Карлос өнгөрсөн дөрөвдүгээр сард “Майами Мастерс”-т түрүүлэхдээ энэ тэмцээнд түрүүлсэн хамгийн залуу теннисчдийн гуравдугаарт жагссан. Түүнээс залуудаа түрүүлсэн хоёр тамирчин нь Майкл Чанг (Торонто-1990), Рафаэль Надаль (Монте-Карло-2005) юм.
-Мадридад болсон тэмцээнд Р.Надаль, Н.Жокович, А.Зверев нарыг цувруулж, 1990 оноос хойш нэг тэмцээнд дэлхийн топ 5-д багтдаг гурван теннисчнийг хожсон хамгийн залуу тоглогч болжээ.
2022 оны тухайд тэрбээр амжилт, үзүүлэлтээрээ бүх теннисчдийг тэргүүлж байна. Тодруулбал,
-Хожил-51 -Чансааны Топ 10-т багтдаг тоглогчдыг хожсон тоо-9 -Түрүүлсэн тэмцээн-5 -Шигшээд шалгарсан тэмцээн-7
-Цуглуулсан чансааны оноо-6460 -Шагналын мөнгө-7.4 сая ам.доллар. Дэлхийн №1 теннисчин асан Хуан Карлос Феррерогийн шавь энэ залуу энэ янзаараа байвал теннисний түүхэнд тодоор бичигдэх аваргуудын нэг болж төлөвших нь тодорхой болжээ.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.