Өмнөговьд 25 настай эрэгтэйг зодож, тамлан онц хэргийгээр хөнөөсөн хэрэг гарчээ

Өнгөрөгч оны 11 сард Өмнөговь аймгийн Гурван тэс суманд 25 настай эрэгтэйн биед онц хэрцгийгээр халдаж хөнөөсөн хэрэг гарчээ.

Энэ төрлийн гэмт хэргээс урьдчилан сэргийлэх үүднээс хэргийн үйл явц, шүүхээр хэрхэн шийдвэрлэснийг тоймлон хүргэж байна.

25 настай залууг гэрт нь хөнөөсөн хэрэг 2025 оны 11 дүгээр сарын 20-ноос 21-нд шилжих шөнө Өмнөговь аймгийн Гурвантэс суманд гарчээ. Тухайн өдөр амь хохирогч "Ц" зүс таних хэдэн хүнтэй гэртээ архи согтууруулах ундаа хэрэглэсэн бөгөөд хувийн таарамжгүй харилцааны улмаас маргаан үүсчээ. Улмаар шүүгдэгч "М" амь хохирогч "Ц"-ийн биед олон тооны шарх, гэмтэл учруулан, эрхтнийг нь хайчлах зэргээр хохирогчийг гэмтлийн улмаас зовж зүдрэхээр байдал бий болгож онц харгис хэрцгийгээр хөнөөсөн гэмт хэрэгт холбогджээ.  

Хохирогчийн хууль ёсны төлөөлөгч буюу ээж нь "Талийгаач миний хамгийн бага хүү байсан, би 2 хүүтэй. Үнэхээр гомдолтой байна. Би сэтгэл санааны хохирол, замын зардал гэх мэт бүх зүйлээ нэхэмжилнэ. Би хоёрхон хүүтэй, нэг хүүгээ алдчихлаа /уйлав/. Танихгүй хүний гарт харгис хэрцгийгээр хүүгээ алдана гэдэг үнэхээр гол зурж хэцүү байна. Тиймээс бүх хохирол төлбөрөө барагдуулаач. Манай гэр бүл үнэхээр хүнд хэцүү байгаа. Миний хүүхэд амьд сэрүүн байсан бол эрүүл саруул, ажил төрлөө хийгээд инээгээд л гүйж байгаа шүү дээ. Гэтэл энэ харгис хүүхдийн гарт хохирчхоод байна" хэмээн шүүхэд мэдүүлсэн байна.

Улмаар тухайн хэрэгт холбогдох нотлох баримт, гэрчийн мэдүүлэг, шүүх шинжилгээний дүгнэлт зэргээр шүүгдэгч "М"-ийг 25 настай амь хохирогч "Ц"-ийн амь насыг онц хэрцгийгээр хөнөөсөн хэмээн үзжээ. Хэрэгт холбогдох шүүх хурал Өмнөговь аймаг дахь сум дундын анхан шатны шүүхэд |2026.04.16|-нд болж, шүүгдэгчид 17.3 жилийн ялыг нээлттэй хорих ангид эдлэхээр тогтоов. Мөн хохирогчийн ар гэрт 190 сая төгрөгийг гаргаж өгөхөөр шийдвэрлэжээ.

Холбогдсон хэргийн зүйл анги: Эрүүгийн хуулийн 10.1- Хүнийг алах

1.Хүнийг алсан бол найман жилээс арван таван жил хүртэл хугацаагаар хорих ял шийтгэнэ.

2.Хүнийг:

• 2.1.онц харгис хэрцгийгээр;
• 2.2.олон хүний амь бие, эрүүл мэнд, эд хөрөнгөд хохирол учруулж болох аргаар;
• 2.3.захиалгаар;
• 2.4.өөр гэмт хэргийг нуун далдлах, хялбарчлах зорилгоор;
• 2.5.өөртөө, бусдад эдийн, эдийн бус ашигтай байдал бий болгох зорилгоор;
• 2.6.хоёр, түүнээс олон хүнийг;
• 2.7.хохирогчийн биеэ хамгаалж чадахгүй, жирэмсэн болохыг мэдсээр байж;
• 2.8.гэр бүлийн хүчирхийлэл үйлдэж;
• 2.9.эрхэлж байгаа ажил, албан үүрэгтэй нь холбогдуулж өөрийг нь, түүний ойр дотны хүнийг;
• 2.10.зохион байгуулалттай гэмт бүлгийн гишүүн зохион байгуулалттай гэмт үйл ажиллагааныхаа явцад;
• 2.11.бүлэглэж;
• 2.12.эрүүдэн шүүж;
• 2.13.цус, эд, эрхтнийг авах зорилгоор;
• 2.14.үзэл бодол, арьсны өнгө, үндэс, угсаа, шашин шүтлэг, бэлгийн, хүйсийн чиг баримжаагаар нь үзэн ядаж алсан бол арван хоёр жилээс хорин жил хүртэл хугацаагаар, эсхүл бүх насаар нь хорих ял шийтгэнэ.

3.Бага насны хүүхдийг алсан бол арван хоёр жилээс хорин таван жил хүртэл хугацаагаар, эсхүл бүх насаар нь хорих ял шийтгэнэ.

Өөрийн сэтгэгдлээ илэрхийл

Share Tweet