"Харшил үүсгэж буй" гэх буузан тоглоом өнгөрсөн сард 9,328 ширхэг импортлогджээ

Стресс тайлах зориулалтай "Буузан тоглоом” болон “цэлцгэнүүр тоглоом”-оор хүүхдүүд тоглосноор нүүр, ам хавдах, биеэр улайж туурах, гөвдрүү үүсэх зэрэг харшлын шинж тэмдэг илрэх болсон. БНХАУ-д хийгдсэн судалгаагаар тус тоглоомд агуулагдах борын хүчлийн хэмжээ нь хэвийн түвшнээс хэтэрсэн болохыг тогтоосон байна.

Дээрх тоглоом нь Монголын гаалиар хэзээ, хэдэн ширхэг орж ирсэн болон ямар шалгуураар нэвтрүүлсэн талаар Гаалийн ерөнхий газраас тодруулахад "Барааны ангиллын 9503.00.00 БТКУС /барааг тодорхойлох, кодлон уялдуулах систем/ кодод хамаарах хүүхдийн тоглоомыг импортлох үед Гаалийн тухай хуулийн 269 дүгээр зүйлийн 269¹.1.11, Эрүүл ахуйн тухай хуулийн 8 дугаар зүйлийн 8.3,  MNS ISO 8124-3:2011 стандарт зэрэг баримт бичгийн хүрээнд дараах гаалийн хяналтыг тавьж байна. Үүнд:

1. Бичиг баримтын хяналт:
2. Эрүүл ахуй/Эрүүл мэндийн гэрчилгээ
3. Шинжилгээний дүн
4. Биет үзлэгээр бичиг баримт болон барааны нийцэл
5. Шаардлагатай тохиолдолд хими, нян судлал, хүнд металл, цацрагийн лабораторийн шинжилгээнд хамруулж, эрүүл ахуйн аюулгүйн  үзүүлэлтүүдийг тодорхойлуулна.

Улсын хэмжээнд 9503.00.00 БТКУС /барааг тодорхойлох, кодлон уялдуулах систем/ кодод хамаарах стресс тайлах төрлийн тоглоомыг хоёр ААН албан ёсоор гаальд мэдүүлэн импортолж байгаа. Энэ оны эхний 5-р сард 13593 ам.долларын үнийн дүн бүхий 9,328 ширхэг гараар баздаг стресс тайлах төрлийн тоглоом импортоор оруулж ирсэн байна" гэлээ.

Тус тоглоомоор тоглож харшилсан хүүхдүүд эмнэлгийн байгууллагад хандах нь ихэсжээ. Тухайлбал, Өмнөговь аймгийн Цогтцэций суманд хоёр хоногт зургаан тохиолдол бүртгэгджээ. Иймд тус тоглоомоор тоглож дээрх шинж тэмдэг илэрвэл яаралтай эмнэлэгт хандахыг мэргэжлийн байгууллагаас анхаарууллаа.

Б.АЗЖАРГАЛ

Өөрийн сэтгэгдлээ илэрхийл

Share Tweet