Н.Учрал С.Амарсайханыг огцруулж туг тахин, ₮3.5 тэрбумаа мартуулах уу

УИХ-ын ээлжит бус чуулган зарлуулсан Н.Учрал 3.5 тэрбумыг ХОМ дэх "Их засаг" олон улсын сургуулийнхаа салбарт төсвөөс өгөхийг завдсан гэх хардлагад унаж, "мэх мэхэндээ" гэдэг нь болсон. Харин эл дуулианаа намжаах галаа ХЗДХ-ийн сайд С.Амарсайхан руу чиглүүлж орхилоо.

Ингэж хэлсний учир нь, Ерөнхий сайд Н.Учрал "Цагдаагийн дэд хурандаа энгийн иргэний гэрт очиж, Хууль зүйн сайдын нэрийн өмнөөс хэрэг наймаалцан дарамталж байгаа бичлэг үзлээ. Ийм улайм цайм хэргийг нүдээ аниад өнгөрүүлж хэрхэвч болохгүй" хэмээн өөрийн цахим хуудсанд гурван цаг орчмын өмнө нийтэлж, үүнийг Б.Энхбаяр тэргүүтэй 38-ын талынхан түгээж байна.

Хууль зүйн сайдын нэрийн өмнөөс хэрэг наймаалцсан гэх бичлэгийг Удган Б.Булнай гэх хүн нийтэлсэн. Агуулга нь, "С.Амарсайхантай холбоотой залруулга бичлэгийг олон нийтэд цацаж өгөх юм бол хэргийг чинь хааж ялгүй гаргана хэмээн санал тавьсан" гэх. Онцлон хэлэхэд, Б.Булнай бол Ерөнхий сайд асан Г.Занданшатарын заслыг хийдэг удган.

Уншигч та санаж байгаа бол Г.Занданшатарын Засгийн газар байгуулагдаад дөрвөн сарын дараа буюу |2025.10.29|-ний өдөр "Хариуцлагын гэрээ зөрчсөн" агуулгаар С.Амарсайханыг огцруулж байсан. Засгийн газрын хуралдаанаас хэрхэн хөөгдөн гарч байгаа процессыг нь ч хэвлэлийн баг нь түгээсэн. Тухайн үед 30-ийн тал буюу Л.Оюун-Эрдэнийн талаас Г.Занданшатарын танхимд ажиллаж буй цор ганц хүн нь С.Амарсайхан байсан. Харин одоо Н.Учралын танхимд 30-ийн талаас таван сайд буй.

Сайтар анзаарвал, МАН-ын 38-ын талаас С.Амарсайханаар ийн туг тахиж, 30-ийн талд сэрүүлэг өгч, дуулиант ₮3.5 тэрбумын санхүүжилтийн агуулгыг мартуулж мэдэх мессеж энд хөвөрч байна.

Г.МИШЭЭЛ

Өөрийн сэтгэгдлээ илэрхийл

Share Tweet