Х.Баттулга, Ц.Элбэгдорж нарыг Жеффри Эпштэйнтэй холбоотой байсан асуудлаар Ерөнхий сайдад асуулга тавьжээ

Бэлгийн мөлжлөгийн гэмт хэргээр ял шийтгүүлж, шоронд байх хугацаандаа нас барсан Жэффри Эпштэйний файлуудыг АНУ-ын Конрессын Төлөөлөгчдийн танхимын Хянан шалгах болон засаглалын реформын хорооноос нээлттэй болгосон.

Улмаар уг файлд Монгол Улсын Ерөнхийлөгч, ҮАБЗ-ийн тэргүүн байсан Ц.Элбэгдорж, Х.Баттулга нартай холбоотой зураг, файлууд мөн цацагдсан юм. Энэ асуудлаар Монгол Улсын Ерөнхий сайд Н.Учралд УИХ-ын гишүүн Л.Оюун-Эрдэнэ асуулга тавьж, УИХ-ын хяналт шалгалтын тухай хуульд заасан хугацаанд хариулт ирүүлэхийг хүсжээ.

Уг асуулгад,

Жеффри Эпштэйн Монгол Улсын гадаад бодлого болон үндэсний язгуур эрх ашигтай холбоотой асуудлаар Монгол Улсын төрийн өндөр албан тушаал хашиж байсан хувь хүмүүс (тухайлбал Монгол Улсын Ерөнхийлөгч асан Ц.Элбэгдорж, Х.Баттулга, Гадаад хэргийн сайд асан Л.Пүрэвсүрэн, Үндэсний аюулгүй байдлын зөвлөлийн нарийн бичгийн дарга асан Ц.Энхтүвшин зэрэг)-тэй албан болон албан бус холбоо тогтоож, зөвлөгөө өгч байсан эсэх;

Жеффри Эпштэйн Монгол Улстай холбоотой хийж байсан ажил, үйл ажиллагааны талаар Гадаад харилцааны яам зэрэг холбогдох төрийн байгууллага мэдээлэл авч байсан эсэх;

Насанд хүрээгүй хүүхдийн эсрэг бэлгийн хүчирхийлэл үйлдсэн гэмт хэрэгт ял шийтгүүлж, хүний наймаа, бэлгийн мөлжлөгт зуучилж байсан хууль бус үйл ажиллагаатай холбогдуулж шалгагдаж байсан Жеффри Эпштэйнтэй хувийн харилцаатай байсан гадаадын хэд хэдэн улсын төрийн өндөр албан тушаал хашиж байсан хувь хүмүүс албан тушаалаас огцорч, холбогдох журмын дагуу шалгагдаж байгаатай холбогдуулан Жеффри Эпштэйнтэй Монгол Улсын Ерөнхийлөгч асан Ц.Элбэгдорж, Х.Баттулга хувийн харилцаа тогтоож байсан нь Монгол Улсын эрх ашгийг зөрчсөн эсэх.

• Монгол Улсын Ерөнхийлөгч асан Ц.Элбэгдорж Нэгдсэн Үндэстний Байгууллагын Ерөнхий Ассамблейн жилийн чуулга уулзалтад оролцох үедээ 2013 болон 2014 онд Америкийн Нэгдсэн Улсын Нью-Йорк хот дахь Жеффри Эпштэйний гэрт уулзалт хийсэн байж болзошгүй талаар мэдээлэл гарсантай холбогдуулж энэхүү уулзалтын талаар болон уулзалтын мөрөөр хэрэгжүүлсэн арга хэмжээ, үйл ажиллагааны талаарх дэлгэрэнгүй мэдээлэл. Үүнд:
• Монгол Улсын Ерөнхийлөгч асан Ц.Элбэгдорж, Гадаад хэргийн сайд асан Л.Пүрэвсүрэн нар Жеффри Эпштэйнтэй хийсэн уулзалт (Жеффри Эпштэйний гэрт татуулсан зургаар нотлогдсон гэх) тухайн үеийн албан ёсны айлчлалын хөтөлбөрт багтсан эсэх, холбогдох протоколын дагуу болсон эсэх, уулзалтын талаар Гадаад харилцааны яаманд мэдэгдсэн эсэх;
• Монгол Улсын Ерөнхийлөгч асан Ц.Элбэгдорж Швейцарын Холбооны Улсын Давос хотноо Дэлхийн эдийн засгийн форумд оролцохдоо Жеффри Эпштэйнтэй уулзаж байсан эсэх, Жеффри Эпштэйний холбож танилцуулсан хувь хүмүүстэй уулзалт хийж байсан эсэх;
• Монгол Улсын Ерөнхийлөгч асан Ц.Элбэгдоржид зөвлөгөө өгөх зорилгоор байгуулагдсан Олон улсын зөвлөхүүдийн зөвлөл (International Advisory Board)-ийн бүрэлдэхүүн, үйл ажиллагаа, зардал, хийсэн ажлын үр дүн, бусад асуудлын талаар Гадаад харилцааны яам болон холбогдох бусад төрийн байгууллага мэдээлэлтэй байсан эсэх, холбогдох журмын дагуу гэрээ байгуулсан эсэх болон зөвлөх тус бүрд олгосон гэх 100,000 ам.долларын үйлчилгээний хөлсийг улсын төсвөөс санхүүжүүлсэн эсэх;
• Жеффри Эпштэйн болон Олон улсын зөвлөхүүдийн зөвлөлийн бүрэлдэхүүнд орсон зөвлөхүүд (тухайлбал Ларри Саммерс, Кэвин Рудд гэх мэт) Монгол Улсад ирж байсан эсэх;
• Жеффри Эпштэйн болон Олон улсын зөвлөхүүдийн зөвлөл Монгол Улсын эдийн засагт нөлөөлөх томоохон төслүүд болох Эрдэнэт уулын баяжуулах үйлдвэр, Оюутолгой зэрэг томоохон төслүүдтэй (тухайлбал Оюутолгой төслийн Далд уурхайн бүтээн байгуулалт, санхүүжилтийн төлөвлөгөө, далд уурхайн санхүүжилтийн асуудал зэрэг) холбогдуулж зөвлөгөө өгч, Засгийн газрын болон төрийн холбогдох байгууллагын шийдвэр гаргах үйл ажиллагаанд нөлөөлж байсан эсэх.  
• Монгол улсын стратегийн орд газар болон үүсмэл ордуудыг ашиглах тухай нэр бүхий байгууллагуудаас бэлдсэн танилцуулгад дурдагдсан төслүүд хэрэгжсэн эсэх, эдгээр төслүүдийн санхүүгийн харилцан хамаарлын тухай, хууль хяналтын байгууллагаар шалгагдан тогтоогдож байсан цаглабар зэрэг санхүүгийн дансны гүйлгээнүүд хамааралтай эсэх.
• Жеффри Эпштэйн Монгол Улс болон Израил улс нарын хооронд аюулгүй байдлын асуудлаар хамтран ажиллах гэрээ байгуулахад зуучилсан гэх асуудал Израилын Ерөнхий сайд асан Эхуд Барак (Ehud Barak) болон Жеффри Эпштэйн нарын захидал харилцаанд дурдагдсантай холбогдуулан тухайн хамтран ажиллах асуудал холбогдох хууль тогтоомжийн дагуу судлагдаж, зөвшөөрөл авсан эсэх талаарх дэлгэрэнгүй мэдээлэл. Үүнд:  
• Израил улсын Ерөнхий сайд асан Эхуд Барак Монгол Улсад ирж байсан эсэх талаар мэдээлэл гарч буйтай холбогдуулан хэзээ, хэдэн удаа ирсэн талаарх мэдээлэл;
• Израил улсын Ерөнхий сайд асан Эхуд Барак Монгол Улсын Үндэсний аюулгүй байдлын зөвлөлийн нарийн бичгийн даргаар ажиллаж байсан Ц.Энхтүвшинд гар буу бэлэглэж байсан гэх мэдээлэл гарсантай холбогдуулан гар бууг хилээр нэвтрүүлэх зөвшөөрөл зохих журмын дагуу олгогдож, холбогдох бүртгэлийг хийлгэсэн эсэх талаарх мэдээлэл;
• Монгол Улс болон Израил улс нарын хооронд аюулгүй байдлын асуудлаар байгуулсан хамтын ажиллагааны гэрээний агуулга, холбогдох мэдээлэл.
• Монгол Улсын төрийн өмчит болон төрийн өмчийн оролцоотой Эрдэнэт уулын баяжуулах үйлдвэр, Оюутолгой ХХК, Эрдэнэс Оюу Толгой ХХК зэрэг компаниуд Арианэ Дэ Ротшильдын хамаарал бүхий банк, хуулийн этгээдүүдтэй хамтран ажиллаж байсан, зөвлөх үйлчилгээ авч байсан болон төлбөр төлсөн эсэх” зэрэг нийт долоон хэсэг бүхий асуулга хүргүүлсэн байна.

Т.БАТСҮРЭН

Өөрийн сэтгэгдлээ илэрхийл

Share Tweet