Х.Болорчулууны дүүгийн компани Ц.Даваасүрэнг сайд байхад эрчим хүчний салбараас 3.8 тэрбумын тендер авчээ

ХХААХҮ-ийн сайд Х.Болорчулуун, УИХ-ын гишүүн Ц.Даваасүрэн хоёрыг эрх ашиг нэгтэй, найзууд хэмээн хэвлэлүүд олонтаа бичдэг. Гэхдээ чухам яг юун дээр ашиг сонирхол, халаас нэгтэй болох нь төдийлөн сайн ойлгогддоггүй байв.

Түүх өгүүлбэл: Тэдний дөрөө харшуулалт 2012 оноос эхтэй. Тодруулбал, МАН-аас квот авч чадаагүй хэн хэн нь УИХ-д бие даан нэр дэвшиж сонгогдсон. Улмаар С.Ганбаатартай нийлэн "бие даагчдын зөвлөл" гэгчийг байгуулснаар илүү дотносож, хүзүү сээрээрээ холбогдох болсон. Ингээд 2012-2016 оны хооронд олон суудал авсан ч олонх болж чадаагүй Ардчилсан намд тэд кнопоо худалдсан гэгддэг. Үр дүнд нь Х.Болорчулуун цагдаагийн офицер дүү Х.Болор-Эрдэнийгээ "Монросцветмет"-ийн захирал болгосон байна. Харин Ц.Даваасүрэнгийн мэдэлд ИНЕГ-ыг өгснөөр ёстой л дураараа томилгоо хийж самарсан гэдэг. 2016 онд тэд МАН-ын гишүүнчлэлээ сэргээж, дахин УИХ-ын гишүүн болсон билээ. Ингэж орж ирээд Ц.Даваасүрэн Эрчим хүчний сайд болж, Х.Болорчулуун гурилын үйлдвэртэй буюу ашиг сонирхлын зөрчилтэй ч ХХАА хариуцсан Байнгын хорооны дарга болж байв. Ингэж л тэд дөрөө харшуулсан дээшилсээр ирсэн нь энэ.

Харин доорх хоёр тендерт тэд эрх ашгаа хэрхэн нийлүүлэв гэдэгт анхаарал хандуулбал:

ТЕНДЕР 1: 2018 оны наймдугаар сарын 13-ны өдрийн ажил гүйцэтгэх гэрээ:

ЗАХИАЛГЧААР "Дорнод бүсийн эрчим хүчний систем" ТӨХК, ГҮЙЦЭТГЭГЧЭЭР "Дорнодгазар" ХХК хамтран "Хэрлэн-Булган 35кв-ын цахилгаан дамжуулах агаарын шугам болон дэд станцын засвар шинэчлэлийн ажил гүйцэтгэх гэрээ" гэгчийг байгуулсан байна. Эл гэрээний үнийн дүн 2,890,018,021 төгрөг.

ТЕНДЕР 2: 2020 оны дөрөвдүгээр сарын 02-ны өдрийн ажил гүйцэтгэх гэрээ:

ЗАХИАЛГЧААР "Дорнод бүсийн эрчим хүчний систем" ТӨХК, ГҮЙЦЭТГЭГЧЭЭР "Саруул өргөө констракшн" ХХК хамтран "ДБЭХС" ТӨХК-ийн КРУ-6кВ-ын II секцийн цахилгаан тоноглолын шинэчлэлийн ажил" гэгчийг байгуулсан байна. Эл гэрээний дүн 1,199,900,000 төгрөг.

"Дорнод бүсийн эрчим хүчний систем" ТӨХК-ийн хувьцааны 70 хувийг Эрчим хүчний яам, 30 хувийг ТӨБЗГ эзэмшдэг байна.

Эл төрийн өмчит компани Х.Болорчулуунтай хэрхэн, яаж холбогддог вэ:

схем 1: Компанийн гүйцэтгэх захирал Г.Отгонбаатар нь Х.Болорчулуун сайдын төрсөн дүү Х.Болорбаатарын хүү Б.Алтанхуягийн хадам аав юм.

схем 2: Ерөнхий инженер Ө.Жаргалсайхан нь Х.Болорчулуун сайдын төрсөн дүү Х.Болоржаргалын эхнэр Ө.Сүнжидмаагийн төрсөн дүү юм.

Дээрх хоёр жишээ бол наад захынх. Цаашлаад Ц.Даваасүрэнг Эрчим хүчний сайдаар томилогдсоны дараа Х.Болорчулууны дүү Х.Болор-Эрдэнийн "Дорнодгазар" ХХК, болон "Дорнод бүсийн эрчим хүчний систем" ТӨХК хэчнээн тендер авав гэдэг нь анхаарал татна.

УИХ-ын гишүүн Ц.Даваасүрэн 2017 оны аравдугаар сарын 20-нд Эрчим хүчний тамгаа гардаж аваад 2020 оны сайдын суудлаас буусан байдаг.

Тайлбар: Нээлттэй мэдээллийн opendatalab.mn дата сайтад "Дорнодгазар" ХХК нийт 30 тендерт оролцсон жагсаалт байгааг шүүж үзлээ. Харин хачирхалтай нь tendergov.mn сайтад тус компанийн тендерийн мэдээлэл алга. Үүнээс 12 тендерт шалгарсны дээрх ЗУРГАА НЬ эрчим хүчний салбарын тендер байна. Эдгээр зургаан тендерийн нийт дүнгээр эл компани 2.6 тэрбум төгрөг хүртсэн аж.

Дээр тусгайлан дурдаж задалж бичсэн "ДБЭХС" ТӨХК-ийн КРУ-6кВ-ын II секцийн цахилгаан тоноглолын шинэчлэлийн ажил" гэх 1.2 тэрбумын тендертэй нийлээд Эрчим хүчний сайдаар Ц.Даваасүрэн сууж байхад Х.Болорчулууны дүү Х.Болор-Эрдэнийн компани нийт 3.8 тэрбумын тендерийг эл салбараас авчээ.

"Дорнод газар" ХХК бол Хаянгаагийн Болорчулуун сайдын төрсөн дүү Хаянгаагийн Болор-Эрдэнийнх. 5365643 регистрийн дугаартай эл компанийг 2010 оны гуравдугаар сарын 23-нд үүсгэн байгуулж байжээ. Итгэмжлэлгүйгээр төлөөлөх эрх бүхий албан тушаалтан, хувьцаа эзэмшигчээр 2021 онд нэмж бүртгүүлжээ.

Энэ мэдээнд өгөх таны үнэлгээ

Хуваалцаарай Жиргээрэй