Н.Учралын өр төлөлт ба Г.Дашнямын танил Э.Жононбаяр

Соёл, спорт, аялал жуулчлал, залуучуудын дэд сайдаар ажиллах Г.Дашням "Гадаад, дотоод зөндөө танил байгаа, хичээж сайн ажиллана" гэж онцолжээ. Яамны чиг үүрэг нь бүхэл бүтэн дөрвөн агуулгыг нэгтгэсэн, том бүтэц.

Гэвчиг яг үнэндээ Ч.Ундрам, Г.Дашням нарт ирэх зун Physical Asia шоуны нөлөөллөөр монголд аялах жуулчдаа л нэг хүн төрхтэйхэн хүлээж авах орчин нөхцөл бэлдэх үндсэн ажил бий. Үүндээ төвлөрөхөөс өөр аргагүй байгаа. Эдүгээ Г.Дамдинням "шатахууны сайд" болчхоод, ганц эл үүргээ ч чирч чадахгүй байгаа шиг Ч.Ундрам, Г.Дашням нарын хүнд ачаа бол зун монголд ирэх жуулчид болчхоод байна.

Ийм нөхцөлд Г.Дашнямын гадаад, дотоодын олон танилын хүрээгээр салбар нь яг яах юм бол гэж бодмоор.

Г.Дашням бол аавынхаа Жи-Мобайл, Магнай Трейд тэргүүтэй хамаг бизнесийн мөнгийг сонгуульд үрж тарж орхисон л дүр. Хөшигний ард Н.Учралын сонгуулийн зардлыг бүхлээр нь Г.Дашням хариуцсан гэж яригддаг. Учир нь, Г.Дашнямыг 2024 оны УИХ-ын сонгуульд нэр дэвших мандатыг Н.Учралын нүүр, нөлөө олж өгсөн. Анзаарсан бол, 2024 оны сонгуулиар Г.Дашням, Н.Учрал нарын хосолсон байдлаар сурталчилгаа нэлээд цацагдсан.

Гэсэн ч Чингэлтэй, Сүхбаатар дүүрэгт нэр дэвшээд, Г.Дашням ялагдсан юм. Тэрбээр сонгуульд өрсөлдөөд унасныхаа дараа хэдэн өдөр дараалж, сошиал орчинд агсам тавьсан. Ингэхдээ "Сонгуулийг мөнгөөр худалдаж авсан биз дээ" гэхчлэн намынхан руугаа дайрсан хэв шинжтэй байгаад, стори түүхүүдээ устгасан байдаг.

Ингэж сонгуульд хамаг л бизнесийн мөнгөө тавьж дууссан, дээрээс нь "Та нар намайг гаргаж өгөөгүй" гэж байнга үг хаядаг Г.Дашнямыг Н.Учрал МАН-ын дарга, спикер болсон хойноо дэд сайдын суудал руу чирж байгаа нь энэ.

Сонгуулиас хойш тэр "Трафигура"-гийн Э.Жононбаяртой ойр нөхөрлөж, хоёр ч телевиз худалдан авсны зэрэгцээ олон нийтийн сүлжээ рүү тодорхой санхүүжүүлэлт хийхээр бэлтгэлээ хангасаар байгаа юм. Үндсэндээ Г.Дашнямын сүүлд хоршиж буй содон дүр гэвэл Э.Жононбаяр.

Эрчим хүчний худалдаа, тээвэр ложистик, металл эрдэсийн чиглэлд үйл ажиллагаа явуулдаг, нийт 12 мянган ажилтан бүхий Үндэстэн дамнасан корпораци|ҮДК| болох "Трафигура"-д 1.1 тэрбум ам.долларын хохирол учруулсан монгол иргэнээр Э.Жононбаяр нэрлэгдсэн байдаг.

Уг зээлүүдээ нагац эгчийнхээ нэр дээрх “Lex Oil” компаниар дамжуулсан бөгөөд нийт өр төлбөрийн иал хувийг Э.Жононбаяр өөрөө хүлээн зөвшөөрсөн, 500 сая ам.доллар дээр нь маргаж байгаад эвлэрлийн гэрээ байгуулсан гэгдээд буй. Тодруулбал, Э.Жононбаяр "Трафигура"-д нийт 500 сая ам.доллар төлөхийг зөвшөөрч, эвлэрэл байгуулсан гэсэн үг.

Уг 500 сая ам.доллар нь монголын зах зээлээс босгоход ихээхэн хүндрэлтэй төлбөр юм. Алдарт "Эрдэнэт үйлдвэр"-ийн 49 хувийг сахал Д.Эрдэнэбилэгийн талынхан 400 сая ам.долларын арилжаагаар монголд оруулж ирж байсан. Гэсэн ч уг мөнгөний эх үүсвэрийг хууль шүүхийн байгууллагаар шалгуулсаар байгаа юм.

Э.Жононбаярын хувьд улс төр, бизнесийн салбарынхантай нэгэн үес ойр дотно нөхөрлөж, эрүүл бус замаар их хэмжээний мөнгө угааж буй талаар хөшигний ард яригдсаар ирсэн. Жижигхэн зах зээлтэй оронд асар их мөнгийг эргэлдүүлэгчдийн нэгээр нэрлэгдсэн тэрбээр шинэхэн дэд сайдын ойрын хүрээний хүн болчхоод байна.

Энэ тохиолдолд Г.Дашнямын гадаад, дотоод найз нарын нөлөөлөл монголд, салбартаа ашигтай тусахаас илүүтэйгээр Э.Жононбаярын улс төрийн хүрээнд лобби явуулах нэг суурь болоод өгчхөж буй юм.

Ямартай ч Н.Учрал Г.Дашнямд өрөө төлж, Э.Жононбаяр төр дэх хөлөө нэгээр нэмсэн үйл явдал болов.

Г.ИТГЭЛ

Өөрийн сэтгэгдлээ илэрхийл

Share Tweet