Сэлэнгэ аймгийн намын хорооны даргад П.Тогтохбаяр яригдаж байна

Сэлэнгэ аймгийн намын хорооны гишүүний 164 суудлын төлөө 299 нэр дэвшигч бүртүүлсэн талаар Ардчилсан нам өөрийн цахим хуудастаа мэдээлсэн билээ.

Тус аймгийн Ардчилсан намын дотоод шинэчлэл, бүтцийн өөрчлөлт улс орон даяар өрнөж буй энэ үед Сэлэнгэ аймгийн намын хорооны даргын сонгууль намын дотоодод ч анхаарал татаж байна.

Аймгийн Ардчилсан намын хороог ирэх дөрвөн жилд хэн удирдах, орон нутгийн сонгуульд ямар тактиктай оролцохыг шийдэх энэхүү албан тушаалд хэд хэдэн хүнд шаанс бий.

Тухайлбал, улс төрд туршлагатай тэр дундаа Сэлэнгээс карьеараа эхлүүлж байсан Аж үйлдвэрийн сайд асан, УИХ дахь АН-ын бүлгийн даргаар ажилласан байсан Д.Эрдэнэбат, 2024 оны УИХ-ын сонгуулиар Сэлэнгэ аймгаас сонгогдсон УИХ-ын гишүүн Д.Батбаяр болон залуучуудын төлөөлөл Сэлэнгэ аймгийн Алтанбулаг боомтын захирагчаар ажиллаж байсан П.Тогтохбаяр нар илүү өндөр боломжтой хэмээн яригдаж буй.

Д.Эрдэнэбат, Д.Батбаяр хоёрын хувьд улс төрийн тодорхой туршлагуудтай, нам дотроо ч тодорхой албан тушаалуудад томилогдож ирсний хувьд П.Тогтохбаяр энэ удаад аймгийн намын хорооны даргад илүү шинэ дүр болж гарч ирэх магадлалтай харагдаж байна. Түүнийг Ардчилсан намын Үндэсний бодлогын хорооны гишүүний хувьд намын дотоод шинэчлэл, бодлогын түвшинд идэвхтэй ажиллаж ирсэн гэдгээр нь мөн хамгийн боломжит хувилбараар харж байгаа болов уу. Учир нь намын анхан шатны гишүүдэд илүү ойр ажиллаж чадна гэх хүлээлт бий.

Сэлэнгэ аймаг Монголын газар тариалан, дэд бүтэц, худалдааны гол зангилаа бүс нутаг гэдгээрээ онцлог. Түүнчлэн Евроазийн Эдийн Засгийн Холбоотой чөлөөт худалдааны түр хэлэлцээ хийхээр болсон энэ цаг үед Алтанбулаг боомт нь энэ хэлэлцээрийн хамгийн чухал экспорт, импортын суваг болох юм. Тиймээс эндхийн намын хороог хэн удирдах нь 2024-2028 оны орон нутгийн хөгжлийн бодлого болон Ардчилсан намын улс төрийн байр суурьт шууд нөлөөлөх юм.

Т.ГЭРЭЛТ-ИРЭЭДҮЙ

Өөрийн сэтгэгдлээ илэрхийл

Share Tweet