Ховд аймагт 5.5 магнитудын хүчтэй газар хөдлөлтийн чичирхийлэл 15 суманд мэдрэгджээ

Ховд аймгийн Зэрэг сумын нутагт өнөөдөр /2026.04.26/  12.23.22 цагт 5.5 магнитудын хүчтэй газар хөдлөлт болсон талаар Онцгой байдлын ерөнхий газраас мэдээллээ. Газар хөдлөлтийн төвөөс ойр орших аймаг сумд,

• Ховд аймгийн Зэрэг сумын төвөөс Зүүн урд зүгт 26 км
• Ховд аймгийн Мөст сумын төвөөс Зүүн хойд зүгт 28 км
• Ховд аймгийн Цэцэг сумын төвөөс Баруун хойд зүгт 40 км газар хөдөлжээ.

Мөн газар хөдлөлтийн хүчийг хоёр хэлбэрээр хэмждэг. Магнитуд нь хөрсөн доор, газар хөдөлж байгаа төв хэсгийг хэмждэг үзүүлэлт юм. Харин газрын хөрсөн дээр, хүнд болон барилга байгууламжид мэдрэгдэж байгааг баллаар хэмждэг. Шаталбар нь 12 хүртэл байдаг бөгөөд гурваас бага магнитудын газар хөдлөлт хүмүүст онцгой мэдрэгддэггүй бол 7-гаас дээш магнитуд хүрэхэд том талбай хамарсан сүйрэл болдог байна.

Тухайлбал, 1-3 баллын хүчтэй газар хөдлөхөд барилга доторх хүмүүс чичирхийллийг ялимгүй мэдэрч, тавиур дээрх аяга таваг, сав суулга бага зэрэг хөдөлнө. Газар хөдлөлт 4-5 балл хүрэхэд хүмүүс сандарч, гэрлийн бүрхүүл зэрэг нь мэдэгдэхүйц чичирч, суурь муутай баримал, аяга таваг, сав суулга унах тохиолдол бий. Хүмүүсийн олонх нь айдас мэдэрдэг ажээ. Харин 6-7 балл хүрэх чичирхийлэлд хүн хөл дээрээ зогсоход хэцүү болж, хаалга онгойхгүй, ханын хавтан цуурч, цонхны шил хагарч, гэрийн тавилга, эд юмс байрнаасаа хөдөлж, өнхөрч унадаг аж.

Х.ХУЛАН

Өөрийн сэтгэгдлээ илэрхийл

Share Tweet