Өмнөд Америкт хөлбөмбөгийн одуудын нэрийг хүүхэддээ өгөх тохиолдол нэмэгджээ

Энэ жилийн хөлбөмбөгийн ДАШТ хэд хэдэн рекорд эвдэж, олон арван мартагдашгүй дурсамжийг хөлбөмбөгийн түүхэнд үлдээлээ. Тэгвэл Өмнөд Америкт хосууд шинээр төрсөн хүүхдэдээ хөлбөмбөгийн оддын нэрийг өгөх болжээ. Тухайлбал Перуд Хааланд нэртэй нярайн тоо эрчимтэй өсөж байна. Харин Аргентинд Лионель нэр хамгийн түгээмэл нэрсийн жагсаалтын дээгүүр бичигдэх болсон бол Мексикт нэгэн охинд гурван хөлбөмбөгчний нэрийг нийлүүлэн өгсөн гэх мэдээлэл явжээ.

Перугийн Иргэний бүртгэлийн байгууллага болох “RENIEC”-ийн хэвлэлийн төлөөлөгч Иван Торрес өнгөрсөн долоо хоногт “Panamericana TV”-д хэлэхдээ Лионель Месси, Неймар Жуниор, Криштиану Роналдугийн нэртэй хүүхэд тус бүр ойролцоогоор 30 мянган удаа бүртгэгдсэн гэсэн юм.

Тэр хошигнон "Одоо Хааланд ч гэсэн Перу хүн болсон гэсэн үг" гэж хэлээд, нэг нярайд Испани хэлээр ДАШТ-ийг товчлон хэлдэг "Мундиаль" гэх үгийг хүртэл нэр болгон өгсөн талаар дурджээ. Перугийн шигшээ баг энэ удаагийн дэлхийн аваргад оролцож чадаагүй юм.

АНУ, Канадын хамтаар ДАШТ-ийг зохион байгуулсан Мексикт ч энэ хандлага ажиглагдсан байна. Тус улсад нэгэн охины төрсний гэрчилгээний зураг олон нийтийн сүлжээнд вайрал болжээ. Тэр охиныг Киньона Исисидра Морита Хааланд Хевара хэмээн нэрлэсэн байна. Энэ нэр нь Мексикийн шигшээ багийн тоглогч Хулиан Киньонес, Гилберто Мора болон Норвегийн довтлогч Эрлинг Хааландын нэрийг нэгтгэсэн нэр аж.

Харин Исисидра гэх хэсэг нь испани хэлний “Y si sí?" буюу "Тэгвэл яах вэ?" гэсэн хэллэг. Энэ хэллэгийг Мексикийн хөгжөөн дэмжигчид багаа дэмжихдээ ашиглаж байсан юм.

Аргентины зүүн хойд хэсгийн Сальта мужид финалын тоглолтын өмнөх долоо хоногт эрэгтэй хүүхдэд өгсөн хамгийн түгээмэл нэрсийн жагсаалтыг Энзо, Эмилиано, Лионель гэсэн нэрс тэргүүлжээ. Орон нутгийн эрх баригчид үүнийг  ДАШТ-ий нөлөө гэж тайлбарласан байна.

Мехико хотод төвтэй "Sin manual para padres" (Эцэг эхчүүдэд зориулсан гарын авлага гэж үгүй) подкастыг хөтөлдөг Фабиола Молина энэ үзэгдэл Латин Америкт шинэ зүйл биш хэмээн “Reuters” агентлагт хэлжээ. Түүний хэлснээр ийм хандлага Диего Марадона 1986 оны ДАШТ-д Английн эсрэг алдарт "Бурхны гар" гоолоо оруулсан үеэс эхлэлтэй аж.

Молина "Хэдэн жилийн өмнө “Backstreet Boys” хамтлаг алдаршиж байх үед олон ээж хөвгүүддээ Кевин, Брайан гэдэг нэр өгдөг байсан. Тийм болохоор өнөөдөр Боливи, Чили, Аргентин зэрэг оронд Брайан Гонсалес гэх мэт нэртэй хүнтэй таарах нь маш түгээмэл болсон" гэж хэлсэн байна.

Тэр нэмж хэлэхдээ "Энэ нь хөгжилтэй санагдаж болох ч хүүхэд том болоход нь сөрөг нөлөө үзүүлэх талтай. Месси эсвэл Лионель гэдэг нэртэй байна гэдэг нь заавал сайн хөлбөмбөгчин болно гэсэн үг биш. Хувь тавилан зөвхөн нэрээр чинь тодорхойлогдохгүй" гэсэн байна.

Эх сурвалж: CNN

Өөрийн сэтгэгдлээ илэрхийл

Share Tweet