Даруу төлөв, хөдөлмөрч зангаараа олон залуусыг үлгэрлэж яваа МУГТ, холимог тулаанч Б.Энх-Оргил "One Championship" холбооны аваргын бүсээ хамгаалах тулаан хийнэ. Түүнтэй Азербайжаны тулаанч Эльбек Алышов тулалдана. 1999 онд төрсөн Эльбек Алышов холимог тулааны дэвжээнд 10 тулалдахдаа нэг ч ялагдаагүй яваа.
Аваргын эсрэг "ялагдашгүй өрсөлдөгч" нарын тулаан өнөөдөр Тайланд Улсын Бангкок хотын Лампини ордонд болно. Б.Энх-Оргил 2025 оны 12-р сарын 5-нд Бразилын тулаанч Фабрицио Андрадег ялж, ONE холбооны хөнгөн жингийн аваргын бүсийг хүртсэн. Өнөөдөр хийх "The Inner Circle 24" тулаанд Б.Энх-Оргил аваргын бүсээ анх удаа хамгаалах хариуцлагатай тулаан юм.
Мөн Б.Энх-Оргил "Netflix"-ийн “Physical Asia” шоунд амжилттай оролцож, биеийн бэлтгэл, тэсвэр хатуужлаараа олон улсын үзэгчдийн анхаарлыг татсан. Тиймээс түүнийг өнөөдөр Монголчуудаас гадна дэлхий нийт үзэж, дэмжих нь мэдээж.
Б.Энх-Оргил тулааны өмнө хэвлэлд өгсөн ярилцлагадаа “Өрсөлдөгч маань сайн. Гэхдээ би аваргын бүсээ хамгаална гэдэгтээ итгэлтэй байна. Тулааны хэв маяг нь минийхтэй төстэй юм билээ. Тиймээс надад арай хялбар байх болно" хэмээсэн юм.
Б.АЗЖАРГАЛ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.