М.Энхцэцэг: Б.Найдалаа ТЭЗҮ-гүй, сонгон шалгаруулалтгүй сэргээгдэх хүчний эх үүсвэр барих төслийг эхлүүлэх гэж байна
УИХ-ын гишүүн М.Энхцэцэг Эрчим хүчний сайд Б.Найдалааг ТЭЗҮ-гүй, ямар ч сонгон шалгаруулалтгүйгээр 600 мВт-ийн сэргээгдэх хүчний эх үүсвэр барих төслийг эхлүүлэх гэж буй талаар мэдэгдэл хийлээ.
Ингэхдээ "Эрчим хүчний яамнаас эрчим хүчний хараат байдлыг нэмэгдүүлэх Монгол Улсын тусгаар тогтнол, аюулгүй байдалд хүчтэй нөлөө үзүүлэх 600 мВт сэргээгдэх эрчим хүчний сонгон шалгаруулалтыг маш нууц байдлаар зарласан байна.
Яагаад нууцаар зарлав. Аливаа эрчим хүчний эх үүсвэр бол Эрчим хүчний яамны, Шинжлэх ухаан технологийн зөвлөлийн хурлаар, тооцоо судалгаа, техник эдийн засгийн үндэслэл нь орж батлагдсан байдаг. Гэтэл энэ эх үүсвэр дээр ямар ч ТЭЗҮ алга.
Хоёрт. Зөвхөн өөрсдийн веб сайт дээр тавьж, бусад мэдээллийн хэрэгсэл, яамныхаа пэйж хуудаст ч байршуулаагүй байна. Тус сонгон шалгаруулалтаа энэ баасан гарагт хийхээр товлосон байна. Хамгийн ноцтой нь 600 мВт гэх чадлыг зарлаагүй, жилдээ 1.7 тэрбум кц үйлдвэрлэх том чадлын нарны, салхины цахилгаан станцуудыг шалгаруулна гэх зар байсан. Энэ нь 600 мВт гэх хүчин чадлыг нуусан гэсэн үг.
Энэ нь сэргээгдэх эрчим хүчний хуулийг зөрчсөн байна. Яагаад гэвэл сэргээгдэх эрчим хүчний хуульд аливаа дуудлага худалдаа зарлахдаа заавал хүчин чадлыг нь бичнэ гэж тусгасан байдаг. Гэтэл хүчин чадлыг нь бичээгүй, жилд үйлдвэрлэх цахилгааныг нь бичээд л зарлажээ.
Эхэнд дурдсанчлан яагаад тусгаар тогтнол, аюулгүй байдалд нөлөөлсөн гэж үзэж байгаа гэвэл, энэ том чадлын сэргээгдэхүүд бол Оюу толгойг дотоодоосоо цахилгаанаар хангах зорилготой. Гэхдээ сэргээгдэх эрчим хүчний эх үүсвэрүүд маань салхи байхгүй бол, нар байхгүй бол үйлдвэрлэхгүй. Тийм учраас Оюу толгойг найдвартай цахилгаанаар хангаж чадахгүй. Энэ тохиолдолд яах аргагүй БНХАУ-ын эрчим хүчний системтэй холбогдохоос өөр аргагүйд хүрнэ. Эндээс Оюу толгой түүний ойр орчмын уул уурхайн компани, Өмнөговь, Дундговь, Дорноговь, Багануур, Чойр аймгууд БНХАУ-ын эрчим хүчний бүрэн хараат байдалд орно.
Одоогийн байдлаар Монгол Улс ОХУ-аас эрчим хүчний хувьд хараат байдалд байдаг. Бидний эрхэм зорилго яавал хараат байдлыг бууруулах вэ гэдгийн төлөө байх ёстой. Өөрөөр хэлбэл нар салхинаас хамааралгүй үйлдвэрлэлээ хийдэг Таван толгойн ДЦС, системийн тогтворжилтыг хангадаг УЦС, ус хуримтлуурын станц, том чадлын батарей станц гэх эх үүсвэрээ барих хэрэгтэй. Ингэвэл Оюу толгойг дотоодын цахилгааны эх үүсвэрээр хангах, хараат байдлаас салах боломж бүрдэнэ.
О.ОНОН
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.