Гурван жил АТГ, прокурор дээр хэргээ “даруулсан” А.Адъяасүрэнг энэ удаа шүүхээр оруулж чадах уу

Гүйцэтгэх ажиллагааны үеэр Чингэлтэй дүүргийн III хорооны нутаг, “Peace tower”-ын 804 тоот өрөөнд АТҮТ-ийн Тээвэр зохицуулалтын хэлтсийн дарга Г.Доржпаламд түүний хамаарал бүхий хүнээр дамжуулан, 100 мянган ам.долларын авлига өгөхийг завдсан нь илчлэгдээд, хэдхэн сарын дараа УИХ-ын гишүүн болсон хүн бол А.Адъяасүрэн.

АТГ ингэж өөрсдийн явуулсан ажиллагааныхаа өмнө сөхөрч, хэрэгтнээ Төрийн ордон руу алдсан гол шалтгаан нь, Ерөнхийлөгч асан Х.Баттулгын нөлөөлөл байв. Одоогийн ханшаар 340 сая төгрөгийн авлига өгч, С зөвшөөрөл ярьж суусан А.Адъяасүрэнгийн хэргийг шалгах процесс нь ч авлигын үйлдлээс салаагүй байдаг.

Нэг. АТГ-т А.Адъяасүрэнгийн хэргийг шалгасан мөрдөгчийг Х.Баттулга шүүгч болгов

А.Адъяасүрэнгийн авлига өгөхийг завдсан хэрэг анх АТГ-ын мөрдөгч Д.Доржсүрэн дээр шалгагдаж, хэргийн хөдлөшгүй нотлох баримтууд авагдсан байдаг. Гэвчиг тэрбээр 2022.05.27-ны Монгол Улсын Ерөнхийлөгч Х.Баттулгын зарлигаар Хан-Уул дүүргийн Эрүүгийн хэргийн анхан шатны шүүхийн шүүгчийн албан тушаалд томилогдон, хавтаст хэрэг “нимгэрч” шилжсэн гэдэг.

Ш.Доржсүрэн нь шүүгч болсон хойноо олимпын аварга Н.Түвшинбаярын хэргийг шүүх гэж байсныг манай сайт ашиг сонирхлын зөрчилтэй гэдэг өнцгөөр мэдээлж, шүүгчээс татгалзах хүсэлт бичиж байсан нэгэн юм. Тэрбээр Нийслэлийн прокурорын газрын ерөнхий прокурор Ш.Нямдоржийн сайн найз гэгддэг билээ.

Хоёр. Ш.Нямдоржийн авлигыг А.Адъяасүрэн нарын улстөрчид өгсөн байсныг хүлээн зөвшөөрсөн гэх өнцөг

Дараачийн сонин кэйс нь, гэрээс нь их хэмжээний бэлэн мөнгө олдсон Нийслэлийн прокурорын газрын ерөнхий прокурор Ш.Нямдорж авлигын хэргээ хүлээн зөвшөөрч, Эрүүгийн хуулийн хялбаршуулсан журмаар шийдүүлсэн явдал.

Тэрбээр 2021.02.09-ний өдөр А.Адъяасүрэнг яллагдагчаар татагдсан тогтоолыг хүчингүй болгоод, удаагүй байхдаа авлигын хэргээр шалгагдаж эхэлсэн байдаг. Түүнийг авлигын хэргээ хүлээн зөвшөөрсөн тул 200 сая төгрөгөөр торгож, нийтийн албанд ажиллах эрхийг нь хоёр жилээр хассан юм.

Дээрх хоёр кэйсийг нэгтгэж харвал, Ш.Доржсүрэн шүүгч болсон, Ш.Нямдорж авлига авснаа хүлээн зөвшөөрсөн А.Адъяасүрэнтэй холбогдох тохиолдлууд нь цэвэр нөлөөллийн шинжтэй байгаа юм.

А.Адъяасүрэнгийн хэрэг гурван жил гацах хугацаанд ХХК-иудынхаа нэрийг сольж, эзэмшлээсээ хасав

УИХ-ын гишүүн А.Адъяасүрэнд холбогдох хэргийг Нийслэлийн прокурорын газрын ерөнхий прокурор Ш.Нямдорж хэрэгсэхгүй болгосон кэйст нь АТГ-ын мөрдөгч эсэргүүцэл бичсэн байдаг. Саяхан АТГ “Хэргийг шалгаж байгаа” гэх товч мэдээлэл өгсөн ба УЕП мөн ийм агуулгаар тайлбар хийдэг.

Гэвч үйлдэл дээрээ баригдсан ч, авлигын ийм тодорхой кэйс шүүх рүү очихгүй, бүтэн гурван жил гацаж байгаа нь анхаарал татна. Энэ хугацаанд А.Адъяасүрэн гишүүн “Тэнгри транс групп”, “Сан тээвэр групп”, “Баянговь транс”, “Топ транспорт” ХХК-иудаа нэрийг нь өөрчилж, бусдад шилжүүлэх өөрчлөлт хийгээд буй. Гэхдээ нүүрс тээврийн үйлчилгээ эрхэлсэн хэвээр байгаа юм.

А.Адъяасүрэнг анхлан Эрүүгийн хуулийн 22.5.1 дэх хэсгийн зургаан сараас гурван жил хүртэлх ял шийтгэл бүхий хахууль өгөх зүйлчлэлээр яллах тогтоол үйлдсэн байдаг.

Х.Нямбаатарын мэдэгдлийн агуулга ба А.Адъяасүрэнгийн урд хөрш дэх “муу нэр”

ХЗДХ-ийн сайд Х.Нямбаатар өчигдөр /2022.12.09/ мэдээлэл хийхдээ “БНХАУ манай нүүрс тээвэрлэлтийн бүх датаг гаргаж өгөх боломжгүй. Та бүхэн яг хэнд хамааралтай мэдээлэл авахаа урьдчилан тодорхой мэдэгд гэсэн шаардлага тавьсан” гэх агуулгыг онцлов. Өөрөөр хэлбэл, Засгийн газар үүн дээр хүссэн хүмүүсийн нэрээ өгөөд, субейктив шүүлгэх эрх эдлэх боломжтой гэсэн үг.

Тэгэхээр нүүрсний гэх хэрэгт олон нийтэд хамгийн томруунаар нэрлэгддэг, олон автомашинтай А.Адъяасүрэн эхний жагсаалтад багтаж, урд хөршийн дата мэдээллээр шүүгдэх эрсдэлтэй юм.

Нөгөө талд А.Адъяасүрэн УИХ-ын гишүүн болохоосоо өмнө нэр бүхий хоёр Хятад иргэнээс 2 сая ам.доллар хөрөнгө оруулалтаар татсан хойноо Монголд нэвтрэх зөвшөөрлийг нь хаалгаж, залилсан гэх мэдээлэл хөшигний ард яригддаг.

Одоогийн байдлаар А.Адъяасүрэн гишүүн уг хэргийнхээ талаар тайлбар үл хэлж, нам гүм байдалд шилжжээ. Удаан хугацаанд “аргалж” ирсэн эл хэрэг энэ цаг үед шүүгдэж мэдэх дэнсэн дээрээ ирж, цаг үеийн тохироо нь бүрдэж буй гэлтэй.

Энэ мэдээнд өгөх таны үнэлгээ

Хуваалцаарай Жиргээрэй