Ухаа худаг, Баруун наран, Нарийн сухайт, Эрдэнэтийн үүсмэл ордуудаас 60 хувийг ард түмэнд хүртээнэ

Ерөнхий сайд Г.Занданшатарын албан өрөөнд MCS группийн Ерөнхийлөгч Ж.Оджаргал, “Ачит-Ихт” ХХК-ийг үүсгэн байгуулагч П.Цагаан, Ухаа худаг төслийг хэрэгжүүлэгч "Энержи Ресурс" ХХК-ийн Гүйцэтгэх захирал П.Батцэнгэл нарын хүмүүс тодорхой ордуудын 60 хувийг ард түмэнд хүртээх урьдчилсан тохиролцоонд хүрсэн хэлцэлд талууд гарын үсэг зурлаа.

Санамж бичигт гарын үсэг зурахад Засгийн газар талаас Эдийн засгийн хөгжлийн сайд Ж.Энхбаяр, ЗГХЭГ-ын дарга С.Бямбацогт, "Эрдэнэс Монгол" компанийн захирал Б.Даваадалай нарын хүмүүс оролцсон юм.

Г.Занданшатарын Засгийн газар 2025 оны наймдугаар сард баялгийн санд стратегийн эзэмшил бүхий ордуудын өгөөжийг ард түмэн хүртдэг байх чиглэлээр хувийн хэвшлүүдтэй хэлцэл хийх ажлын хэсгийг байгуулсан. Уг хэлцлийн үр дүнгээр, эхний дөрвөн ААН-тэй хэлцэлд хүрсэн талаараа зарлалаа. Үүнд,

Тавантолгойн нүүрсний бүлэг ордод үйл ажиллагаа явуулдаг “М Си Эс”, “Энержи ресурс” ХХК,  “Хангад Эксплорэйшн”, Нарийн сухайтын ордод тусгай зөвшөөрөлтэй “Өсөх зоос” ХХК болон “Ачит Ихт” ХХК-ийн эзэмшдэг Эрдэнэтийн үүсмэл ордын өгөөжийн 60 хувийг монголчуудад ногдуулах буюу Үндэсний баялгийн санд хуримтлуулна. Хэрэв тухайн жилд өгөөж 60 хувиас бага байх тохиолдолд стратегийн болон үүсмэл ордын тусгай зөвшөөрөл эзэмшигч аж ахуйн нэгжүүд тохируулагч төлбөрийг төлдөг байхаар харилцан тохиролцлоо.

Гэрэл зургийг: Б.Эрдэнэбаяр, Үүсмэл ордуудаас 60 хувийг ард түмэнд хүртээх бичигт талууд гарын үсэг зурах үеэр

Ерөнхий сайд Г.Занданшатар,

Байгалийн баялаг ард түмний гарт байх Засгийн газрын зорилтын хүрээнд хүрэлцэн ирсэн компанийн төлөөллүүдэд баяр хүргэе. Өгөөжийн дийлэнх нь ард түмэнд хүртээмжтэй байхыг үндсэн хуульд заасан билээ.

Үндсэн хуулийн суурь зарчмыг бодит ажил хэрэг болгох хүрээнд хүчин чармайлт гаргасан та бүгдэд баярлалаа. Байгалийн баялгийн бодит үр дүнтэй, хүртээмжтэй байдлаар шийдвэрлэхэд та бүхэн нийгмийн хариуцлагын хүрээнд албадлагаар биш Засгийн газрын бодлогыг хэрэгжүүлэхэд гар бие оролцсонд талархал илэрхийлж байна.

10 удаагийн яриа хэлэлцээ, техникийн тооцооллуудыг хийж, орд ашиглалт, олон улсын зах зээлийн нөхцөл байдал зэрэг хэд хэдэн нөхцөлийг харгалзаж суурь зарчмыг баримтлан "Ачит –Ихт", "Өсөх зоос", "Хангад Эксплорэйшн" зэрэг компаниудтай дараах бичиг баримтыг байгуулж байна.

Засгийн газрын зүгээс хувийн компаниудын үйл ажиллагаанд нь ямар нэг дарамт шахалт үзүүлэхгүйгээр, төр хувийн хэвшлийн хамтын ажиллагааг нэмэгдүүлэх хүрээнд ийн хэлэлцээ хийсэн бөгөөд УИХ-аар хэлэлцүүлнэ. Нийгмийн хариуцлагын хүрээнд санаачлан хийж буй нь сайшаалтай юм. Хэдийгээр маргаантай сэдэв боловч, компаниуд манлайлал үзүүлж байгаа нь сайн жишиг тогтоож байгааг онцолмоор байна. Засгийн газраас И-Монголиа дээрх хуримтлалын сангийн мэдээллийг ил тод болгохоор программ хангамжийн бэлтгэл ажлыг хангаж байна.

Хуримтлалын санд хуримтлагдсан мөнгөн дүнг орон сууц, боловсрол, эрүүл мэндэд зарцуулахад нь хэчнээн төгрөг хуримтлагдаж байгааг ил тодорхой байлгана.

Засгийн газар уул уурхай төдийгүй бүх салбарт цэгцрэх хөдөлгөөн өрнүүлж буй. Энэ хүрээнд баялгийн хулгайтай хийх тэмцлийг эрчимжүүлснээр эдийн засагт өсөлт гарч, Үндэсний баялгийн сан арвижиж байна. “Эрдэнэс Монгол” нэгдэл 2024 онд "Хуримтлалын сан”-д нийт 500.5 тэрбум төгрөг, 2025 онд 412 тэрбум төгрөг буюу өссөн дүнгээр нийт 912 тэрбум төгрөг төвлөрүүлжээ. Энэхүү орлогын дийлэнхийг тус нэгдлийн бүрэлдэхүүний стратегийн зургаан ордод үйл ажиллагаа явуулж буй компани, үйлдвэрийн газрууд бүрдүүлэв

Хамтран ажиллаж байгаа та бүхэнд Монгол Улсын Засгийн газрын нэрийн өмнөөс талархал илэрхийлж байна" гэв.

Өөрийн сэтгэгдлээ илэрхийл

Share Tweet