Д.Тогтохсүрэнг гэртээ ₮100 саяын хахууль авч байхад АТГ үйлдэл дээр нь барьжээ

Тав хүртэлх жилийн хорих ялтай эрх мэдэл албан тушаалаа урвуулан ашиглах, үндэслэлгүй хөрөнгөжих гэсэн хоёр зүйл заалтаар шалгагдаж, нэг сарын хугацаатайгаар цагдан хоригдоод буй Д.Тогтохсүрэн хадам дүү "Гала" хамтлагийн Г.Болорцэцэгийн аавынх нь найзаас 100 сая төгрөгийн хахууль авах гэж байхдаа АТГ-ынханд гардуулжээ.

СХЕМ

Эхэнд холбоо хамаарлыг товч дурдъя.

Д.Тогтохсүрэн бол МАН-ын "ялсан" талын төлөөлөл. МАН 2016 оны сонгуулиар парламентад үнэмлэхүй олонхын суудал авах үед аймгийн Засаг даргын эрэмбээс өрсөлдөж, УИХ-ын гишүүн болсон нэгэн. Хоёр ч удаа парламентад гишүүнээр сууж, 2024 оны сонгуулиар бүдэрсэн. Гэсэн ч "Монголросцветмет" ТӨҮГ буюу одоогийн “Эрдэнэс критикал минералс” ТӨҮГ-ын даргын суудалд томилогдож очсон юм.

Д.Тогтохсүрэнгийн эхнэр Д.Оюунбилэг нь нийслэлийн Чингэлтэй дүүргийн Улсын бүртгэлийн хэлтсийн дарга. "Гала" хамтлагийн дуучин Г.Болорцэцэгийн нагац эгч. Г.Болорцэцэг Д.Тогтохсүрэнгийн хадам дүү гэсэн үг.

Харин Г.Болорцэцэгийн хувьд 2000 оны эхэн үед мандаж, өдгөө дахин нэгдсэн "Гала" хамтлагийн дуучин. Түүний нөхөр нь Д.Тогтохсүрэнг УИХ-ын гишүүн, МАН-ын бүлгийн дарга байхад нь зөвлөхөөр ажиллаж, сүүлд "Эрдэнэс Монгол" компанийн дэд захирал байхдаа хүнд өвчнөөр таалал төгссөн. Г.Болорцэцэг УИХ-ын Тамгын газар ажиллаж байсан билээ.

Хэрэг явдал хэрхэн өрнөв: Д.Тогтохсүрэн бол Ерөнхийлөгч У.Хүрэлсүх, Ерөнхий сайд Г.Занданшатарын ойрын нөхөрлөлүүдийн ч нэг хэмээн яригдаж, бичигдсээр ирсэн. МАН-ын зодоонд цагдаа, хүчний байгууллага оролцох болсон үед Ерөнхийлөгч, Ерөнхий сайдтай ойр дүрийг ингээд шуудхан "агначихсан" тохиолдол ер нь сүүлийн жилүүдэд гараагүй ч гэж ордноор яригдаж байна. Гэтэл түүнийг гэнэт 48 цаг саатуулж, нэгдүгээр сарын 29-ний өдөр нэг сарын хугацаатайгаар сунгасан нь олон нийтийн анхаарлыг татав.

100 сая төгрөгийг гэртээ бэлнээр авч байхад нь АТГ-ынхан үйлдэл дээр нь барьсан гэх.

Хэнээс, ямар учиртай мөнгө бэлнээр авсан тухай тодруулбал, дээр дурдсан "Гала" хамтлагийн дуучин, Г.Болорцэцэгийн аавынх нь найзаас авсан гэх мэдээлэл бий. Тус мөнгөний эх үүсвэр, серийн дугаар зэрэгт АТГ-ынхан шалгалт хийж, холбогдох хүмүүст мөрдөн шалгах ажиллагаа явуулж байна.

Эх сурвалжийн мэдээллээр Д.Тогтохсүрэн Төсөл хөтөлбөр, тендерийн сонгон шалгаруулалттай холбоотой хэрэгт холбогдсон гэгдэж буй. АТГ-ынхан урьдаас шалгаж байсан бөгөөд /2026.01.26/-ны өдөр ийн гардсан байна. Улмаар Эрүүгийн хуулийн 22.1.1, 22.10.1 дүгээр заалтад холбогдуулан шалгаж, үргэлжлүүлэн нэг сар цагдан хориод буй аж. Түүнийг цагдан хорих хугацаа энэ сарын 29-ний өдөр дуусна.

Холбогдсон хэргийн хуулийн заалт

22.1 дүгээр зүйл.Эрх мэдэл, албан тушаалын байдлаа урвуулан ашиглах

1.Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, эсхүл зориуд хэрэгжүүлэхгүй байж өөртөө, эсхүл бусдад давуу байдал бий болгосон бол нийтийн албанд ажиллах эрхийг хоёр жилээс таван жил хүртэл хугацаагаар хасаж нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

22.10 дугаар зүйл.Үндэслэлгүйгээр хөрөнгөжих

1.Нийтийн албан тушаалтны хөрөнгө, орлого их хэмжээгээр нэмэгдсэн нь үндэслэлгүй болох нь тогтоогдсон бол үндэслэлгүйгээр нэмэгдсэн хөрөнгө, орлогыг хурааж нийтийн албанд ажиллах эрхийг хоёр жилээс найман жил хүртэл хугацаагаар хасаж нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

Д.Тогтохсүрэнгийн хувьд анх удаа АТГ-ын хаалгыг татаагүй.

2023 онд Өвөрхангай аймгийн Хархорин суманд иргэдтэй уулзалт хийж, уулзалтад нь ирсэн хүмүүст дугтуйтай мөнгө тараасан. Түүнийгээ өөрөө ч хүлээн зөвшөөрсөн. Бичлэг нь байсан болохоор яаж ч чадаагүй гэхэд болно.

Тэрбээр үүнийгээ тайлбарлахдаа “Монгол ёсоор ахмадуудад 20.000 төгрөг өгч, хүндэтгэл үзүүлсэн. Улс төрийн зорилгоор мөнгө тараах бол ил өгөхгүй байх. Миний хувьд олон нийтийн дунд өгсөн. Сумын засаг дарга намайг дагуулж яваад “Өндөр настай хүн нь энэ байна” гэхээр нь хүндэтгэл үзүүлсэн. Түүнээс биш надад мөнгө тараах зорилго байхгүй. Тараах ч мөнгө байхгүй. Уулзалтад ирсэн 5 ахмадад хүндэтгэл үзүүлсэн л ажил. Энэ бол УИХ-ын гишүүний хувьд тойрогтоо ажиллахдаа хийж болохгүй зүйл ч биш. АТГ-аас намайг дуудсан зүйл алга. Өгдөг хүмүүс нь өгдөг газар нь өгнө л биз. Энэ асуудал дээр надад санаа зовоод байх зүйл алга” хэмээсэн.

Мөн 2020 онд УИХ-ын гишүүн байхдаа УИХ-ын дарга Г.Занданшатарын Австралид хийх айлчлалын бүрэлдэхүүнд багтаж, Канберра хотод болсон олон улсын Ази, Номхон далайн орнуудын парламентын 28 дугаар чуулганд оролцохдоо УИХ-ын гишүүн Д.Лүндээжанцан, Д.Тогтохсүрэн, Д.Эрдэнэбат, Австралид суугаа Элчин сайд Б.Чулуунхүү нар казино тоглосон байдаг.

Үүнийгээ Д.Тогтохсүрэн “Бид хэд казиногийн үйл ажиллагаатай танилцах зорилгоор орсон. Бид тоглоогүй. УИХ-аар казиногийн хууль ороод ирвэл ямар юм байдаг юм байна гэж үзэж сонирхох зорилгоор орсон. УИХ-аар Ш.Раднаасэд гишүүнээр  ахлуулсан Казиногийн хуулийн төсөл боловсруулах ажлын хэсэг ажиллаж байгаа. Энэ парламент амжвал Казиногийн тухай хуулийн төслийг хэлэлцэнэ. Үүнийг бодолцоод ч бид энэ талаар ойлголттой болохоор орсон” гэж тайлбарлаад өнгөрч байв.

Сэтгэгдлээ илэрхийл

Share Tweet