Ч.Ганбатын Эпстейн рүү бичсэн и-мэйлд "Миний зүгээс Оросын талд ажиллаж байна"...

Жеффри Эпстейнтэй холбоотой баримтууд задарсны дотор Ерөнхийлөгч асан Х.Баттулгатай холбоотой имэйлүүд багтсаныг бид хүргэсэн билээ.

Чулуунхүүгийн Ганбат нь Эпстейн рүү тогтмол улс төрийн нөхцөл байдлын мэдээллийг хүргэж ирсэн нь эндээс харагддаг.

Эргэн сануулахад, Ч.Ганбат нь УИХ-ын гишүүн Х.Баттулгыг Зам, тээвэр, барилга, хот байгуулалтын сайдаар ажиллаж байхад зөвлөхөөр нь ажиллаж байсан бөгөөд төмөр замын авлигын хэрэгт холбогдож, мөнгө угаасан, хөрөнгө завшсан гэх үндэслэлээр түүнийг интерполоор эрэн сурвалжилж байсан юм.

Түүний Эпстейн рүү бичсэн и-мэйлд,

Миний зүгээс Оросын талд ажиллаж байна. Монгол дахь нөхцөл байдлын талаарх шинэ мэдээллийг хүргэе,

• Сонгуулийн Ерөнхий Хороо өнөөдөр хэвлэлийн бага хурал хийж, 7 дугаар сарын 4-5-нд гадаадад, 7 дугаар сарын 7-нд улсын хэмжээнд хоёр дахь шатны санал хураалт явуулахад бэлэн болсон гэж мэдэгдсэн. Бүх саналын хуудсыг хэвлэж, сонгуулийн хэсгүүдэд хүргэсэн.
• СЕХ Баян-Өлгий аймагт саналын дүнг техникийн болон гараар дахин тоолсон дүнг мөн танилцуулсан. Тус аймаг хамгийн сүүлд дүнгээ ирүүлсэн тул 6 дугаар сарын 26-нд сонгуулийн эцсийн дүн гаргах хугацаа хойшилсон.
• МАН-ын гишүүн Энхболд мэтгэлцээнд бэлтгэж буй бичлэг ил болж, өнөөдөр сошиал орчинд өргөн тархаад байна. Энхболд УИХ-ын МАН-ын өөр хоёр гишүүнтэй хамт бэлтгэл хийж байгаа. Мэтгэлцээний бэлтгэлийн үеийн асуултууд жинхэнэ мэтгэлцээний асуултуудтай ижилхэн байсан нь мэтгэлцээнийг урьдчилан зохион байгуулсан гэсэн хардлагыг төрүүлж байна. Сошиал орчинд хүмүүс уур бухимдлаа илэрхийлж байгаа. Гэхдээ одоогийн байдлаар сошиал сүлжээ нь олон нийтийн бодит байр суурийг бүрэн илэрхийлэхгүй болохыг сануулъя. Учир нь бүх талууд сошиал медиа баг ашиглан мэдээллээ идэвхжүүлж байгаа.
• Ардчилсан нам өчигдөр мэдэгдэл хийхдээ Баттулга Ерөнхийлөгч болвол Монгол иргэдийн хэрэглээний өрийг тэглэх бөгөөд энэ нь оны эхээр Монголын томоохон компаниудын өрийг тэглэсэнтэй харилцан хамааралтай гэж мэдэгдсэн.

Тусгаар тогтнолын баярын мэнд хүргэе! 7 дугаар сарын 4-ний мэдээлэл,

1. МАХН-ын нэр дэвшигч Ганбаатар эхний шатанд ялагдсаны дараа “цагаан сонгууль” явуулахыг уриалсан. Одоо энэ уриалгыг эрх баригч МАН өргөнөөр дэмжиж байна. Цагаан сонгууль гэдэг нь сонгогчдыг саналын хуудас дээр огт тэмдэглэл хийлгүй оролцохыг уриалж, ингэснээр сонгуулийн ирцийг шаардлагатай 50 хувиас доош бууруулах зорилготой. Ерөнхийлөгч асан, МАХН-ын дарга Энхбаяр нь цагаан сонгууль явуулахыг хамгийн идэвхтэй уриалж буй хүн юм.
2. C1 телевиз өнөөдөр АН-ын гишүүдийн зүгээс цагаан сонгууль явуулах шалтгааны талаар богино нэвтрүүлэг цацсан. Тэд цагаан сонгууль явуулах шалтгаан нь Монгол Улсын Үндсэн хуульд өөрчлөлт оруулж, Ерөнхийлөгчийг парламентаас сонгодог болгох явдал гэж тайлбарласан. Учир нь Монголын ард түмэн Ерөнхийлөгчөө сонгох боломжгүй болно гэж тэд үзэж байна. Ерөнхий сайд асан Бямбасүрэн үүнийг үндсэндээ төрийн эргэлттэй адил гэж үзэж байна.
3. Нью-Йорк хотод төвтэй дуу авианы шинжээч 90 минутын бичлэг жинхэнэ болохыг баталсан. МАН-ын гишүүн, УИХ-ын гишүүн Оюунгэрэл өнөөдөр Монголын цагаар хэвлэлийн бага хурал хийсэн. Монголын шүүх уг бичлэгийн үнэн зөв эсэх талаар хоёр удаа шийдвэр гаргасан бөгөөд эхлээд жинхэнэ гэж баталсан, дараа нь жинхэнэ биш гэж үзсэн. МАН уг бичлэгийг жинхэнэ биш, засварласан гэж үзэж байгаа. Нью-Йоркийн дуу авианы шинжээчийн тайлангийн хуулбарыг хүлээн авмагц хуваалцана.
4. Хоёр дахь шатны санал хураалт 2017 оны 7 дугаар сарын 7-ны Баасан гарагт 07:00–22:00 цагийн хооронд болно" хэмээн и-мэйлдээ бичсэн байжээ.

Т.БАТСҮРЭН

Холбоотой агуулгыг эндээс уншина уу

Өөрийн сэтгэгдлээ илэрхийл

Share Tweet