Ерөнхийлөгчийн сонгуульд Эпстейний дэмжлэгийг авсан Х.Баттулгын туслах Ч.Ганбат иргэншлээ сольж, Америкт явна

2017 оны Ерөнхийлөгчийн сонгуульд Х.Баттулгын ялалт байгуулсан нь Жеффри Эпстейнийн шууд оролцоо, санхүүжүүлэлт байсан гэж хэлж болохуйц баримтууд дэлгэгдээд байна. Зуучлагч нь 14 жилийн өмнө АНУ-ын иргэншилтэй болж, 11 жилийн өмнө дүрвэсэн Х.Баттулгын туслах Ч.Ганбат болж таарсан.

Ч.Ганбат гэж хэн бэ, Жеффри Эпстейнийн мэйлд юу дурдагдав, Х.Баттулга, Ч.Ганбат нарын хэргийг нотолбол яллах боломж зэрэг мэдээллийг нэгтгэн хүргэж байна.

Ч.Ганбат гэж хэн бэ

Timeline

Тэрбээр Монголд төрж, Москвад өсөж, АНУ-д амьдарч байсан нэгэн. Аав нь НҮБ-д ажилладаг, Москвад байнга суух шаардлагатай тул бага нас нь Москва хотод өнгөрчээ. Улмаар 1990 онд Монголдоо ирж, Нийслэлд Оросын 3-р сургуульд нэг жил сурч төгсөөд ТИС-д элссэн байна. Ийн төгсмөгцөө “Буян холдинг” ХХК-д Гүйцэтгэх захирлын туслах, Гадаад харилцааны хэлтсийн даргаар зургаан жил ажиллаж, АНУ-руу магистрын зэргээ хамгаалахаар морджээ.

Улмаар /2005-2009/ онуудад Нью Йорк хотод ХБНГУ-ын “COMMERZBANK AG” банкны International Structured Finance хэлтэст Ахлах дэд ерөнхийлөгчөөр ажиллаж байхдаа Х.Баттулгын хараанд өртөж, зөвлөхөөр нь ажиллахыг зөвшөөрчээ.

Ингэж л хожим Монголоос дүрвэхэд хүргэсэн санхүүгийн зөвлөх үйлчилгээ үзүүлэх «Либерти Партнерс» ХХК-аа байгуулж байж. Он цагийн хувьд /2010.03.12/. Тус компани нь Тавантолгойн төмөр зам барих төслийн зөвлөх АНУ-ын «McKinsey» компанийн Монгол талын түншээр шалгарсан.

Гадагш зугтсан шалтгаан: Зөвлөх үйлчилгээнд их мөнгө зарсан, тэр мөнгөнийхөө хэсгийг Монгол талын хамтрагч компанийн дансаар буцааж авсан гэх хардлага гармагц тэр зугтаасан. Ирээгүй шалтгаанаа “Хийгээгүй хэргийнхээ төлөө хоригдох хүсэл гэм зэмгүй надад огтхон ч байгаагүй тул Бээжингээс Улаанбаатар нисэх гэж байснаа больсон” гэж тайлбарласан.

Хачирхалтай нь өдгөө түүнийг орогнуулж буй АНУ-ын иргэншлээ дүрвэхээсээ гурван жилийн өмнө буюу 2012 онд авсан тухайгаа өөрөө хэлсэн байдаг.

2015 он бол түүний Монголоос гарсан он цаг. Мөн Жеффри Эпстейнтэй идэвхтэй мэйл бичиж байсан үе энэ. Ер гадагш гарсан ч Х.Баттулгын орон тооны бус зөвлөх хэвээр байж 2017 оны Ерөнхийлөгчийн сонгуулийнх нь өртгийг тэнд босгож байсан болж таарав.

Ч.Ганбат нь Х.Баттулгын ерөнхийлөгчийн сонгуульд өрсөлдөж байх үеийн процессыг нэгд нэгэнгүй тайлагнахаас гадна улс төрийн албан шийдвэр, Монголд оффшор бүс нээх, криптовалют нэвтрүүлэх зэрэг асуудал ярьснаас гадна Х.Баттулгын өмнөөс "Тэр танд дэмжлэг үзүүлсэнд талархал илэрхийлж буйг нь дамжуулж өгөөрэй гэсэн. Мафи төрийн эсрэг тэмцэх амаргүй байлаа. Одоо ажил эхэллээ. Та үргэлжлүүлэн дэмжлэг үзүүлэх шаардлагатай байна" хэмээн үгийг нь дамжуулдаг байсан нь тодорхой харагддаг. Хариуд нь Эпстэйн "Туслахдаа баяртай байна. Надад мөнгө хэрэггүй" хэмээснээс гадна оронд нь нэгэн эмэгтэйг ус, сэргээгдэх эрчим хүчний салбарт ажилд оруулж өгөхийг хүссэн санал тавьсныг хүлээж авсан байсан юм.

Эдгээр задарсан файл болон и-мэйл, гэрэл зургууд нь Эпстэйнтэй харилцаж байсан тэдний бүрэн мэдээлэл биш бөгөөд хэдий хэр хугацаанд ямар байдлаар хамтран ажиллаж, харилцаагаа ямар шатанд гүнзгийрүүлсэн зэрэг нь учир битүүлэг үлдэж буй.

Ч.Ганбат, Жеффри Эпстейн нарын мэйлд Х.Баттулгын Ерөнхийлөгч болмогцоо талархлаа илэрхийлсэн нь, /2016.07.08/

Дээрх имэйлүүдээс харвал Ч.Ганбат Эпстейнтэй имэйлээр харьцахаас гадна уулздаг байсан бололтой. Мөн албан тушаалтай болгож өгнө гэсэн эмэгтэйн талаар тэд дахин ярилцаж, Эпстейн түүнд засгийн газраас албан ёсны урилга илгээж болох талаар асуусан байна.

Х.Баттулга, Ч.Ганбат нарын хэргийг нотолбол яллах боломж

Хуулиараа Х.Баттулга бол Сонгуулийн хууль зөрчсөн, цаашилбал Үндэсний аюулгүй байдлын эсрэг гэмт хэрэг үйлдсэн тооцогдоно

Тухайлбал, гаднын орноос санхүүжиж, сонгуульд оролцсон гэдгээрээ Эрүүгийн хуулийн 14.5 дугаар зүйл "Иргэн сонгуулийн эрхээ эдлэх, сонгуулийн хорооны ажилд саад хийх" - нэг жил хүртэл хугацаагаар зорчих эрхийг хязгаарлах хүртэл ялтай

Мөн Эрүүгийн хуулийн 19.2 дугаар зүйл.Төрийн эрх мэдлийг хууль бусаар авах, саатуулах хэрэгт холбогдох эрх зүй үүснэ.

Уг зүйл ангийн ял шийтгэлийн тухайд, Төрийн эрх барих дээд байгууллагын эрх мэдлийг хууль бусаар авах, хадгалах зорилгоор үгсэн тохирч хүчирхийллийн аргаар авахад бэлтгэсэн, зохион байгуулсан, оролцсон, санхүүгийн дэмжлэг үзүүлсэн; төрийн эрх барих дээд байгууллагын эрх мэдлийг хэрэгжүүлэх үйл ажиллагаанд хүч хэрэглэн саад учруулсан бол арван хоёр жилээс хорин жил хүртэл хугацаагаар хорих ял шийтгэнэ.

-Гишүүн гэмт хэрэг үйлдсэн нь шүүхээс эцэслэгдвэл бүрэн эрх нь дуусгавар болох хуулийн зохицуулалттай-

Хэрэв түүний гэм буруутай нь шүүхээр эцэслэгдвэл УИХ-ын гишүүний бүрэн эрх нь дуусгавар болох хуулийн зохицуулалттай юм. Тодруулбал, Үндсэн хуулийн 29.3-т Уул гишүүн гэмт хэрэг үйлдсэн гэж шүүх тогтоовол УИХ түүнийг гишүүнээс нь эгүүлэн татна, УИХ-ын тухай хуулийн 9.1.5-т "УИХ-ын гишүүн гэмт хэрэг үйлдсэн болох нь хуулийн хүчин төгөлдөр болсон шүүхийн шийдвэрээр тогтоогдсон бол бүрэн эрх энэ хуулийн 7.3-т заасан хугацаанаас өмнө дуусгавар болох үндэслэл болно гэж хуульд тус тус заажээ. 

Харин Ч.Ганбатын тухайд маш ярвагтай. Жеффри Эпстейнтэй мэйлийн харилцаатай байх үедээ Монголд байгаагүй болж таарч буй. Ерөнхийдөө гаднын иргэншилтэй иргэн Монголд хор хөнөөлтэй хэргийг гаднын улсаас үйлдсэн. Иймд түүнийг шалгаж, яллахын тулд АНУ-тай хамтрах, эсхүл ялтан солилцоход хүрэх юм.

Тэмдэглэл: Хэрэг хуучирдаггүй нь тод жишээ дэлхий даяар өрнөж байна. Дэлхийн зарим улс оронд Жеффри Эпстейнийн имэйлд дурдагдсан олон хүмүүс ажлаа өгч, мөрдөн байцаалтад дуудагдаад эхэлсэн. Гэтэл манай хоёр Ерөнхийлөгч асан, нэг Ерөнхий сайд тэдний хамаарал бүхий хүмүүс хангалттай нотлох баримтад дурдагдсан ч одоог хүртэл хуулийн байгууллагаас шалгаж эхлээгүй. Жеффри Эпстейнийн имэйлд 46 удаа дурдагдсан Ц.Элбэгдорж, дөрвөн удаа дурдагдсан Ч.Сайханбилэг, байнга харилцаж байсан Ч.Ганбат нар гадаадад суурьшаад тун удсан. Харин УИХ-ын гишүүн Х.Баттулга тоомжиргүйхэн жүдогийн холбооны ажлаар Парист явна. Тэднийг хэн, хэзээ шалгаж, шийтгэх вэ...

Өөрийн сэтгэгдлээ илэрхийл

Share Tweet