Эрүүдэн шүүж, ял тулгасан хэргээр ял авч, 5 жил бүгсэн О.Бямбажав ШШГЕГ-ын дэд дарга болон гарч ирэв

Б.Энхбаяр ХЗДХ-ийн сайд болсноосоо хойших 100 гаруй хоногт салбартаа хэсэг томилгоо хийж пижигнүүлсэн. Гэхдээ түүний удирддаг яамны харьяанд буй ШШГЕГ-т эрүүдэн шүүж, гүйцэтгэх ажиллагаа явуулж, ял хүлээж, чимээгүй болсон О.Бямбажав дэд дарга болсон байна.

#1:ШШГЕГ-ын дэд бөгөөд Шийдвэр гүйцэтгэх албаны дарга, улсын ерөнхий шийдвэр гүйцэтгэгчээр О.Бямбажав

С.Зоригийн хэргийг бүгд мэднэ. Түүнийг хөнөөсөн хэрэгт холбогдон хоригдож, сүүлд цагаадсан Т.Чимгээ, Б.Содномдаржаа нарыг ч таних биз. Харин тэднийг эрүүдэн шүүсэн хэрэгт ТЕГ-ын дарга асан Б.Хурц, Улсын ерөнхий прокурорын орлогч асан Г.Эрдэнэбат, мөрдөгч, хурандаа О.Бархасбадь, О.Бямбажав, Гүйцэтгэх албаны ажилтан С.Баяр, Ж.Мөнхгал, Шүүхийн шийдвэр гүйцэтгэх ерөнхий газрын хэлтсийн дарга, хурандаа Ү.Отгонбаяр, Цагдан хорих ангийн төлөөлөгч С.Эрдэнэбат, Э.Өлзийбаяр нарын есөн хүнийг буруутган шалгаж байсан.

Энэ есөн хүний дотор О.Бямбажав бий. Тэрбээр тухайн үед мөрдөгчөөр ажиллаж байхдаа уг хэрэгт найман хүний хамт буруутгагдаж, гурван шатны шүүхээр хэлэлцэж, эцэст нь Б.Хурц, Г.Эрдэнэбат нар ял авсан. Харин О.Бямбажав нь УДШ-ийн шийдвэрээр 6 сая төгрөгөөр торгуулж, ажлаа өгч байв.

Эл шийдвэр одоогоос таван жилийн өмнө буюу 2021 оны гуравдугаар сард гарч байсан. Тэр цагаас хойш нам гүмхэн байсан О.Бямбажав ХЗДХ-ийн сайд Б.Энхбаярын томилсноор ШШГЕГ-ын дэд дарга бөгөөд Шийдвэр гүйцэтгэх албаны дарга, улсын ерөнхий шийдвэр гүйцэтгэгч болсон байна.

#2:ШШГЕГ-ын Захиргааны удирдлагын газрын дарга, хурандаа Г.Цэргийнхүү

Г.Цэргийнхүүгийн 2020 оноос өнөөг хүртэл өссөн намтар: Сонгинохайрхан дүүрэг дэх цагдаагийн газрын дарга, Тусгай ажиллагааны газрын дарга, Нийслэлийн шийдвэр гүйцэтгэх албаны нэгжийн дарга, ШШГЕГ-ын ахлах мэргэжилтэн, дараа нь дарга болсон байна.

Эргэн сануулахад, 2023 оны 10 сард Сүхбаатар аймгийн хорих 421-р ангид хоригдол амиа алдсан. Энэ үеэр Г.Цэргийн хүү Нийслэлийн ШШГГ-ын дарга байсан бөгөөд албаны хүмүүсээ нутагтайгаа танилцуулж, хунгийн чуулган үзэх зэргээр явсан байдаг. Ингэхдээ архи согтууруулах ундаа хэрэглэж, энэ үеэр нь хоригдол нас барсан тохиолдол гарч байжээ.

Г.Цэргийнхүүгийн өөрийн орлого нь 99 сая, гэр бүлийн орлого нь 54 сая, нэг нийтийн орон сууц, нэг үйлчилгээний зориулалттай барилгатай. Үнэлгээ нь 540 сая төгрөг. Мөн 189 саяар үнэлэгдэх Geely, Bo Rui GE, том оврын ачааны Sinotruk, болон хүнд даацын,Liu gong загварын гурван автомашинтай. 450 саяар үнэлэгдэх 250 хонь, 55 адуу, 20 үхэртэй. 95 саяын газар, 40 саяын үнэт эдлэл, 40 саяын хадгаламжтай.

#3:ШШГЕГ-ын дэд бөгөөд Хорих ял эдлүүлэх албаны дарга, хурандаа С.Лхагвасүрэн

Хорих 445, 435-р ангийн газрын дарга, ангийн захирагчаар ажиллаж байсан намтартай хурандаа С.Лхагвасүрэн ШШГЕГ-ын дэд бөгөөд Хорих ял эдлүүлэх албаны дарга болжээ.

Тухайлбал, 2019 оноос 2024 хүртэл Хорих 445-р ангийн газрын дарга хийж байсан. Харин 2024 оны хоёрдугаар сарын 20-нд бууриа сэлгэж хорих 235-р ангийн захирагчаар ажиллаж байжээ. Харин өдгөө ХЗДХ-ийн сайд Б.Энхбаярын томилгоогоор ШШГЕГ-ын дэд дарга болов.

АТГ-т хамгийн сүүлд буюу 2024 онд мэдүүлсэн ХОМ-ээс нь харахад,

• Өөрийн орлого: 43 сая
• Гэр бүлийн орлого: 69 сая
• Амины орон сууц нэг, нийтийн орон сууц нэг: 180 сая
• Жийп болон туулах чадвар өндөр,Toyota, Prado 150 загварын нэг автомашинтай: 130 сая
• Мал: Ямаа-50, Үхэр-12, Хонь-50, Адуу-8 - 35 сая
• Эзэмших гэрчилгээтэй хоёр газартай: 63 сая
• Үнэт эдлэл: 8 сая
• Хадгаламж: 55 сая хэмээн мэдүүлсэн байна.

Уншигч та анзаарсан бол тэдний сүүлийн томилгоо буюу ШШГЕГ-т даргаар очсон он цаг энд дурдагдаагүй. Учир нь тус байгууллагаас дарга нарынхаа томилгооны мэдээллийг олон нийтэд нээлттэй байршуулаагүй байв. Улмаар хэзээ томилогдсон тухай албаны эх сурвалжаас тодруулахад "Томилгоо, шийдвэрийн мэдээлэл нууцад хамаардаг" гэх тайлбарыг бидэнд өгсөн юм.

Сэтгэгдлээ илэрхийл

Share Tweet