"Алтан төлийн эзэн" шагнал гардуулах ёслолыг зудны улмаас хойшлууллаа

Монголын Үндэсний Радиогийн “Таван эрдэнэ” нэвтрүүлгийн нэрэмжит “Алтан төлийн эзэн” шагналыг энэ жил 46 дахь удаагаа шалгаруулан олгоно.

Шагналын болзол дүүргэж, шалгарсан малчид төлчдөө шагнаж урамшуулах ажлыг хаврын тэргүүн сарын шинийн тавнаас эхлүүлнэ хэмээн зарлаж, эхний "Алтан төлийн эзэн"-ийг шагнасан. Тодруулбал, Өмнөговь аймгийн Ханбогд сумаас "Алтан ботго"-ны эзэд хоёрдугаар сарын 18-нд шагналаа гардаж авсан.

Харин бусад "Алтан төлийн эзэн"-ээр тодорсон малчдын шагнал олгох ажил дийлэнх нутагт нүүрлэсэн цас зуд, шуурга салхины улмаас тодорхойгүй хугацаагаар хойшлуулжээ.

“Алтан төлийн эзэн” шагналыг,

1. Сүүлийн гурван жилийн төл хүлээн авсан хувь хэмжээ болон мал сүргийн тоон үзүүлэлт.
2. Мал сүргийнхээ чанар чансаа, үүлдэр угсааг сайжруулж, сүргийн бүтэцдээ анхаарсан байдал.
3. Нутаг орондоо шинэ залуу малчин бэлтгэх, малчдыг ажлын байраар хангахад хувь нэмэр оруулсан байдал.
4. Малаа эдийн засгийн эргэлтэнд оруулж ашиг орлогоо нэмэгдүүлсэн байдал
5. Малчин өрхийн гишүүн бүр эрүүл мэндийн болон нийгмийн даатгалд хамрагдсан байдал.
6. Сум орон нутгийнхаа хөгжилд хувь нэмэр оруулсан, малгүй өрх, малчдын бүлэг хоршоо, нөхөрлөл хамтын ажиллагааг дэмжиж ажилласан байдал зэрэг үзүүлэлтүүдийг харгалзан олгодог билээ.

Б.ХАШ-ИЛД

Энэ мэдээнд өгөх таны үнэлгээ

Хуваалцаарай Жиргээрэй