Иргэд үнэ нь өссөн шатахуунд дугаарлаж, "Шунхлай"-н босс ₮5.7 тэрбумын үнэтэй машин урьдчилан захиалснаа гайхуулав
Улс даяар шатахууны урт дараалалд зогсож, арайхийн 50 мянган төгрөгт 16 орчим литрийг авч 2-3 хоногийнхоо хэрэглээнд залгуулсаар 20 гаруй хонолоо. Энэ хугацаанд салбар яамны зүгээс удахгүй хэвийн болно, ОХУ, БНХАУ-аас хангалттай шатахуун ирэхээр яриа хэлэлцээр хийсэн, өдөр бүр тасралтгүй нефтийн бүтээгдэхүүн ачсан вагон хилээр нэвтэрч байгаа гэх боловч шатахууны дараалал тоогоор бус километрээр хэмжигдсэн хэвээр байна.
Энэ үест монголын шатахуун нийлүүлэгч магнатуудын нэг "Шунхлай" группийн босс П.Батсайхан 5.7 тэрбум төгрөгийн үнэтэй машин урьдчилан захиалснаа гайхууллаа.
Түүний захиалсан BRABUS BODO Cabriolet нь 2026 оны 8-р сарын 14-нд танилцуулагдсан, ердөө 77 ширхэг үйлдвэрлэх маш ховор загвар. Албан ёсны үнэ нь ойролцоогоор €1.08 саяас эхэлнэ (Германы НӨАТ-гүй экспортын үнэ). Харин НӨАТ орсон одоогийн ханш нь €1,371,832 байна. Монгол төгрөгт хөрвүүлбэл 5.7 тэрбум гэсэн үг.
Нэмэлт мэдээлэл: BRABUS BODO Cabriolet автомашины дээд хурд 360 км/ц, суурь нь Aston Martin Vanquish, харин их бие нь карбон файберээр бүрэн дахин бүтээгдсэн 77 ширхэг л үйлдвэрлэх автомашин юм. Учир нь BRABUS компанийг Bodo Buschmann 1977 онд байгуулсан. Тиймээс BODO Cabriolet-ийг ердөө 77 ширхэг үйлдвэрлэхээр төлөвлөсөн бөгөөд машины дизайнд “77” тэмдэглэгээг хэд хэдэн хэсэгт ашигласан байна.
Машин бүр blockchain-д суурилсан Digital Product Passport-той ирнэ. Шатахуун зарцуулалтын хувьд 14.1 л/100 км, хөдөлгүүр нь 5.2 л V12 Biturbo, эзлэхүүний хувьд 5,204 см³, хүчин чадал нь 1,000 hp / 735 kW, эргэлтийн момент нь 1,200 Nm юм.
О.ОНОН
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.