"Онтрэ" дээр хөрөнгө оруулалтын гэрээг шинэчлэхгүй гэвэл 34 хувь дээрх АМНАТ-ийн хэмжээ 5 хувь дээр унана

УИХ-ын Хянан шалгах түр хорооны хийсэн Оюу Толгойн хөрөнгө оруулалтын гэрээ тойрсон нээлттэй сонсголын дүгнэлтийн дагуу УИХ-ын 120-р тогтоол гаргаж Засгийн газарт чиглэл өгсөн.

Ингэхдээ зургаан агуулгыг үндэслэл болгосон бөгөөд менежментийн төлбөрийг бууруулах, Монголын талыг үр өгөөжийг нэмэгдүүлэх, "Онтрэ"-гийн эзэмшлийн Жавхлант, Шивээ толгой лиценз дээр төр 34 хувь эзэмших зэрэг агуулгууд бий. Эхний ээлжид Аж үйлдвэр, эрдэс баялгийн сайд Г.Дамдиннямын ахалсан менежментийн төлбөрийг бууруулах ажлыг хэсэг уулзалт, хэлэлцээ хийж. Менежементийн хувь хэмжээг 9 хувиас 3.95 хувь болгож бууруулж, хэлэлцээг амжилттай хийж чадлаа гэх мессеж олон нийтэд өгөв.

Одоо урд үлдэж буй хэлэлцээнээс "Онтрэ"-гийн Жавхлант, Шивээ Толгой лиценз дээр Монголын төр 34 хувиа АМНАТ-өөр эзэмших асуудал хүлээгдэж буй.

"Онтрэ" оны эхний хагаст гаргасан тайландаа, хоёр лицензийн талбай дахь төрийн оролцооны асуудлыг холбогдох гэрээ, хууль тогтоомжийн хүрээнд хоёр талд ашигтай байдлаар шийдвэрлэхийн тулд Оюу Толгой ХХК болон Засгийн газрын ажлын хэсэгтэй нягт хамтран ажиллана гэж мэдэгдсэн.

Гэхдээ нэг асуулт гарч байна. Салбарын сайд Г.Дамдинням Ашиг малтмалын тухай хуульд нэмэлт, өөрчлөлт оруулах тухай хуулийн төслийг УИХ-д өргөн мэдүүлээд буй. Хуульд ашигт малтмалын боловсруулалтын түвшнээс хамаарч үндсэн хувь дээр нэмж ногдуулах ашигт малтмалын нөөц ашигласны төлбөрийн хувь, хэмжээ нь зах зээлийн үнийн өсөлтөөс хамаарч хүдэрт 0-15 хувь, баяжмалд 0-5 хувь, бүтээгдэхүүнд 0-2.5 хувиар ногдуулан өөрчлөх зохицуулалтыг тусгасан.

Өнөөдрийн байдлаар, АМНАТ 5 хувь дээр олон улсын зах зээл дээрх зэсийн ханштай уялдуулж,

• Тонн нь 5000 ам.доллар бол суурь 5 хувь,
• 5001-6000 ам.доллар бол суурь 5 хувь дээр 16 хувь,
• 6000–7000 ам.доллар бол суурь 5 хувь дээр 17 хувь,
• 7000–8000 ам.доллар бол суурь 5 хувь дээр 18 хувь,
• 8000–9000 ам.доллар бол суурь 5 хувь дээр 19 хувь,
• 9000-аас дээш бол суурь 5 хувь дээр 20 хувь,
• Зэсийн цэвэр катод бол суурь 5 хувь дээр 15 хувь гэх байдлаар тогтоосон байдаг. 

Ингэхээр шинээр өргөн барьсан хуулиар зэсийн АМНАТ одоогийнхоос буурна. Буурах талаар Г.Дамдинням сайд "Ашигт малтмалын тухай хуулийн 5.5-д Хувийн хөрөнгөөр хайгуул хийсэн ордын 34 хүртэлх хувийг төр үнэ төлбөргүй эзэмшихээр заасан. Онтре дээр 34 хувиа бид үнэ төлбөргүй авна. Түүнийг тусгай АМНАТ-р оруулж болно гэсэн хуультай. Шинэ хуульд тэр эрх хэвээр байгаа. Хөндөөгүй. Хөндөхгүй" гэсэн тайлбар хийсэн.

Гол нь бид "Онтрэ" дээр 34 хувиа эзэмшихдээ "Оюу Толгой"-н хөрөнгө оруулалтын гэрээнд орсон заалтаар буюу шинэ хөрөнгө оруулалтын гэрээ хийх шаардлагагүй болно гэж ойлгогдохоор.

Гэхдээ, хэрвээ бид "Онтрэ"-гийн хоёр лиценз дээр 34 хувиа эзэмшихдээ хуучин гэрээгээр явна гэвэл Оюу Толгойтой ижил тогтворжуулах гэрээний дагуу мөн л АМНАТ 5 хувь авах уу.

Эсвэл "Онтрэ" дээр шинэ хөрөнгө оруулалтын гэрээ хийхээр бол одоогийн Г.Дамдиннямын өргөн барьсан шинэ өөрчлөлтийн дагуу бууруулсан хувиар АМНАТ авах уу гэдэг асуулт гарч ирж байна. Өөрөөр хэлбэл өмнө нь Рио Тинтогийн зүгээс "Онтрэ"-гийн хоёр лиценз дээр дахин хөрөнгө оруулалтын гэрээ байгуулах шаардлагагүй гэх байр суурийг илэрхийлж байсан нь АМНАТ-ийн хэмжээг одоогийн Оюу Толгой дээрх тогтворжуулах гэрээнийхээ дагуу явуулах сонирхолтой гэж харагдана.

Аль нь ч байсан Рио Тинтод ашигтай хувилбар мөн юм.

Т.БАТСҮРЭН

Өөрийн сэтгэгдлээ илэрхийл

Share Tweet