Эрдэнэс тавантолгойн 1072 хувьцааны талаар мэдээлэл өгөх нээлттэй өдөрлөг өнөөдөр Сүхбаатарын талбайд үүдээ нээсэн. Жишиг ёсоор төрийн байгууллагууд тус тусын асарт байрлан ажиллаж буй. Тэгвэл НЗДТГ-ын асар нэр хаягаа "Нийлслэлийн", "Тамгийн" гэж алдаатай бичсэн нь олны анхааралд өртөж эхэллээ. Энэ нь зөвхөн үг үсгийн алдаа төдийгүй төрийн албаныхны хайнга хариуцлагагүй байдлын илрэл хэмээн иргэд шүүмжилж байна.
Эл баримт жил ирэх тусам унаж буй төрийн албаны нэр хүндийг улам доош татлаа гэж хэлж болно. Учир нь, төрийн албаны улс төржсөн томилгоо, хүнд суртал, үе үе цахим орчинд дэлгэгддэг ёс зүйгүй үйлдэл, дүрмийн, утга найруулгын алдаатай тушаал, захирамж зэрэг нь төрийн албаны чадамжийн талаар хөндөхөд хүргэдэг.
Гэхдээ нээлттэй хаалганы өдөрлөгт асрын гадаад ашиглах хаяг дахь 5 үгний 3-ыг алдаатай бичнэ гэдэг бол хэнийг ч хэлэх үггүй болгом хэрэг. "Эх бэлтгэгчийн алдаа" гэж булзааруулах ч боломжгүй юм.
- Нэгт. Эх бэлтгэгчид захиалагч текстээ бэлдэж явуулах ёстой.
- Хоёрт. Захиалагч тал хэвлэлтэд шилжихээс өмнө хянах үүрэгтэй
- Гуравт. Хүлээн авч буй хүн нягтлах ёстой
- Дөрөвт. Энэ хүртэлх процесст хэн ч анзаараагүй байлаа гэхэд асрын гадаа тогтоож байгаа ажилтнууд, дотор нь ширээ сандал тавиад сууж байгаа албан хаагчид, үргэлж ажилтай танилцаж явдаг дарга нар гээд хэнбугай ч анзаарам алдаа.
Уг асарт УБЕГ, НЗДТГ гэсэн хоёр байгууллага сууж байгаа аж. НЗДТГ-ын нэрийг байж боломгүй алдаатай биччихсэн байхад гаднаа тогтоочихсон байгаа нь эх хэл, төрийн албаны нэр хүндийг гутаасан үйлдэл боллоо.
Хэрэв үүний хариуцлагыг зөвхөн нэг байгууллага, зөөсөн тогтоосон аж ахуйн ажилтанд тохоод өнгөрнө гэв төрийн алба сэтгэлгүй, мэдлэггүй албатуудаар дүүрсний илрэл болох биз. Зохион байгуулагч Эрдэнэс тавантолгой ХК, тус асарт байрласан НЗДТГ, УБЕГ гээд хандлага, сэтгэл дутаасан хэн бүхэнд хамаарна. Ерөөс төрийн алба шинэчлэгдэх сайжрах шаардлагатай болсны илрэл энэ юм.
Д.ХАДААН
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.