НИЙГЭМ

Уяачдын наадам: 64 бөх зодоглож, 469 хурдан хүлэг тоосоо өргөлөө

Ардын хувьсгалын 100, 101 жилийн ойн Үндэсний их баяр наадмын Уяачдын наадам Хүй долоон худагт өргөн дэлгэр болж өндөрлөлөө. Энэ жилийн уяачдын наадамд сонгомол морьдын уралдааны Дээд насанд 127, дунд насанд 152, бага насанд 190, нийт 469 хурдан хүлэг тоосоо өргөсөн бол хүчит бөхийн барилдаанд улс, аймгийн цолтой 64 бөх зодоглолоо.

Уяачдын наадмыг нээж Үндэсний их баяр наадмыг зохион байгуулах хорооны дарга, Монгол Улсын Шадар сайд С.Амарсайхан наадамчин олонд мэндчилгээ дэвшүүлж хэлсэн үгэндээ “Нүүдэлчдийн уугуул өв соёлын нэгэн гайхамшиг болсон Морь уях эрдмийг төрийн эрхэм үйл хэмээн дээдэлж явдаг уяачид Та бүхэн минь төрийнхөө их баяр цэнгэл наадамд нас насны хурдан хүлгээ уралдуулж, түмэн олноо цэнгүүлэн хүүхэд, морь эсэн мэнд, хүн бүхэн баяр хөөрөөр бялхан, Хүйн долоон худгийнхаа буурал дэнжид хурсан олныхоо хийморийг асаан наадаж байна. Энэ жилийн Улсын баяр наадамд 21 аймгаас уяачид зорин ирж, нийт 1,600 гаруй хурдан хүлэг төрийнхөө их баяр цэнгэл наадамд тоосоо өргөж, түмэн олноо баясгалаа. Үндэсний их баяр наадамд хурдан хүлгээ уралдуулсан уяачдаас

  • хамгийн ахмад нь Дундговь аймгийн Дэрэн сумын уяач, эдүгээ 80 настай Анчин овогтой Намсрай гуай
  • хамгийн залуу нь Хэнтий аймгийн Өлзийт тосгоны 13 настай Отгонбаярын Содбаяр хүү хурдан хүлгээ өөрөө уяж сойн, ардын төрийнхөө наадамд өөрөө унаж хурдлуулсан бахдам түүх байна.

Түүхэн тэгш ойнууд таширлан давхацсан өнөө жилийн баяр наадамдаа Төв аймгийн Баянцагаан сумын уугуул, Зууны манлай уяач, Монгол Улсын Хөдөлмөрийн баатар, Гавьяат малчин, Тод манлай уяач Данзаннямын Даваахүү гуай хамгийн олон морьд түрүүлгэж, айрагдуулсан бол энэ цагийн шилдэг залуу уяач Мягмарсүрэнгийн Алтан-Очир азарга, их нас, соёолон насанд морьдоо айрагдуулсан нь бас нэгэн түүхэн амжилт, бахархал юм” хэмээгээд

"Мянга мянган жилийн буурал түүхтэй Монгол төрийн өнөд оршихын их бэлгэдэл, Монгол Улсын тусгаар тогтнолын баталгаа, Монгол түмний оюун санааны дархлаа болсон Монгол наадмынхаа абшиг, шүншиг шингэсэн энэхүү дэнжээс төрийн түмэн эхүүдийн босоо цагаан хийморь Та биднийг өнө мөнхөд ивээг" хэмээн ерөөл дэвшүүллээ.

Мөн энэ үеэр Үндэсний бөхийн барилдаанд шөвгөрсөн бөхчүүдэд Монгол Улсын Шадар сайд С.Амарсайхан чимэг олгож, мөнгөн шагналыг нь гардуулан өгч баяр хүргэсэн юм.

Уяачдын наадамд уралдсан сонгомол морьдын уралдааны дээд насанд Завхан аймгийн Тосонцэнгэл сумын харьяат С.Баярсайханы бор морь түрүүлж, Төв аймгийн Заамар сумын харьяат Ж.Түмэн-Өлзийгийн зээрд морь аман хүзүүдлээ.

Харин дунд насанд Өвөрхангай аймгийн Тарагт сумын харьяат Б.Наранбаатарын халтар морь түрүүлж, Хэнтий аймгийн Хэрлэн сумын харьяат Ж.Бэгзийн хээр аман хүзүүдсэн бол бага насанд Улаанбаатар хотын Хан-Уул дүүргийн харьяат М.Алтан-Очирын сартай хээр морь түрүүлж, Булган аймгийн Гурванбулаг сумын харьяат Б.Дөлгөөний хүрэн халзан аман хүзүүдлээ.

Эх сурвалж: Шадар сайдын хэвлэлийн алба

Энэ мэдээнд өгөх таны үнэлгээ
Like
Love
Haha
Wow
Sad
Angry

АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

guest
3 Сэтгэгдэл
Хуучин
Шинэ Шилдэг
Inline Feedbacks
View all comments
Уяач
Уяач
2022-07-14 18:59

Даваахүү гуайн уясан 1 ч морь айрагдаагүй ш дээ ! Энэ ичдэггүй өвгөн мөн шаахымаа. Нэр төрийн донтой зөнөг л дөө !

УБ хот иргэн
УБ хот иргэн
2022-07-14 22:10

Уяачдын наадамд:Бөх нь хэн түрүүлж ,хэн үзүүрт үлдэв ээ? Бүх сайтууд 1 ч бөхийн нэр байсангүй, бичсэнгүй

Chinzog
Chinzog
2022-07-16 06:58

Bohin barildaand hen turuulj hen uzuurlesen be

Холбоотой мэдээ

Back to top button
3
0
Would love your thoughts, please comment.x
()
x