Л.Мөнхбаясгалан "Машин нэгжлээ, түгшиж байна" гэж, О.Батжаргал "Цензургүй багийнхан тагнаж, чагнасан" гэв

Дорноговь аймагт нэр дэвшигчийн машиныг нэгжсэн гэх асуудал гарсан бөгөөд хоёр талын байр суурийг тэнцвэржүүлэн мэдээлж байна.

-Л.Мөнхбаясгалан: Нэр дэвшигчийн бүртгэлтэй машиныг цагдаа, дотоодын цэрэг нийлж нэгжлээ-

Өчигдөр /2024.06.27/ шөнө 21.26 цагт УИХ-ын сонгуулийн 7-р тойрогт АН-аас нэр дэвшигч Л.Мөнхбаясгалангийн тээврийн хэрэгсэлд цагдаа, Дотоодын цэргийн албаныхан хууль бус үзлэг хийж байна гэдэг мэдээлэл цацагдсан.

Дорноговь аймгийн цагдаагийн газрын дарга, дэд хурандаа н.Батсуурь тэргүүтэй бие бүрэлдэхүүн ирж шалгажээ. Энэ талаар шалгалт хийсэн хүмүүс "Цагдаагийн байгууллагын 102 дугаар руу МАН-аас дуудлага мэдээлэл ирсэн тул шалгасан" хэмээн тайлбарлав.

Нэр дэвшигч Л.Мөнхбаясгалан "Уг нь манай машин СЕХ-нд бүртгэлтэй. Хуулиар нэр дэвшигчийн машиныг шалгаж болохгүй. Цагдаа, Дотоодын цэрэг, дарга нь ирчихсэн байна шалгаж байна. Дорноговьд дарангуйлал тогтчихсон юм уу. Би түгшиж байна" хэмээн мэдэгдэв.

-О.Батжаргал: "Цензургүй баг" дрон нисгэж, Дорноговийн МАН-ын хороог тагнаж, чагнасан-

Харин өнөөдөр өглөө /2024.06.28/ Дорноговь аймгийн МАН-ын хорооны дарга О.Батжаргал дээрх үйл явдалтай холбогдуулан мэдэгдэл хийлээ. 

Тэрбээр, "Иргэн Л.Мөнхбаясгалангийн ярилцлагын бичлэг 2024.06.27-ны өдрөөс олон нийтийн сүлжээнд тархсан. Бичлэгт гарч байгаа 1577УЕА дугаартай автомашин нь СЕХ-нд бүртгүүлсэн, эсхүл иргэн Л.Мөнхбаясгалангийн нэр дээр бүртгэлтэй байгаа нь тогтоогдохгүй байгаа. Тухайн тээврийн хэрэгсэлд нэр дэвшигч Л.Мөнхбаясгалан огт зорчиж яваагүй, харин "Цензургүй баг" хэмээх 4-5 хүн зорчиж байсан байна. Эдгээр хүмүүс нь Дорноговь аймгийн МАН-ын хорооны байрны гадаа дрон нисгэж, цонхны гаднаас зураг, бичлэг хийсэн. Гэрээт харуул хамгаалалтын ажилтан тухайн залуучуудтай уулзсан. "Хамрын хийдийн зураг аваад ирсэн. Машин эвдэрсэн тул хүлээнгээ аймгийн дүрс авч байна" гэж хэлжээ. Гэвч ажил тарж хүмүүс явсан боловч эдгээр залуус дахин дрон хөөргөж, тагнаж чагнах зорилготой ажиллагаагаа үргэлжлүүлсэн байдаг. Иймд гэрээт харуул хамгаалалт цагдаагийн байгууллагад гомдол гаргажээ. Цагдаагийн байгууллага шалгах явцад урьдаас зохион байгуулсан байсан бололтой гэнэтхэн зураг бичлэг хийж эхэлсэн. Нэр дэвшигчийн биед халдаж байгаа мэт, дарамтанд орсон мэт ойлголтыг иргэдэд төрүүлэх гэсэн гэж үзэж байна" гэв. 

Энэ мэдээнд өгөх таны үнэлгээ

Хуваалцаарай Жиргээрэй