Э.Батшугар: Салбартаа ₮150 тэрбумын хэмнэлт хийж, эмч нарын цалинг ирэх сарын 01-нээс жигд болгоно

Засгийн газрын хуралдаанаас гарсан шийдвэрийг танилцуулж байна.

Энэ үеэр Эрүүл мэндийн сайд Э.Батшугар "Нийт 669 эмийг ЭМДС-аас хөнгөлдөг. Бүгдийг нь судалж үзсэн. Тэгэхэд ДЭМБ-д бүртгэлгүй эмүүд байсан. Мөн олон улсын эмнэлзүйн удирдамжид батлагдаагүй, зөвлөмж байхгүй эмүүд байна. Үүнийг хасна.

Чанаргүй, үйлчилгээ нь муу эм ихээр зарагдаж байна. Иймд гаднын орноос БНСУ, Германаас шууд авсан нь дээр байсан хэмээн олон нийтийн зүгээс шүүмжлээд буй. Үүнд өөрчлөлт оруулахаар ажиллаж байна. ЭМДС-ийн үндэсний зөвлөл гэж байдаг. Тус зөвлөлийг ойрын хугацаанд хуралдуулж, нэг том өөрчлөлт гаргана.

Тэр нь юу вэ гэвэл эмийн хатуу зохицуулалттай улс орнууд гэж бий. Тухайлбал, АНУ, Англи, Герман, БНСУ, Сингапур, Япон зэрэг. Тус улс орнуудаас оруулж ирж, худалдаалж байгаа эмнүүдэд хөнгөлөлт их олгоно. Харин чанаргүй эм нийлүүлэгддэг улс орнуудын эмний хөнгөлөлтийг бууруулна.

Мөн эрүүл мэндийн байгууллагын зардлын үр ашгийг дээшлүүлнэ.

Адил тусламжийг, адил хүнд амд үйлчилдэг мөртлөө зарим эмнэлгүүд нь ашигтай, зарим нь алдагдалтай ажиллаад байна. Бүр 20 тэрбумын алдагдалтай ч эмнэлэг байна. Энэ нь бүтээмж муу байгааг илтгэнэ. Менежерүүд муу ажиллаж байгаа нь харагдаж байна. Магадгүй өндөр өртөгтэй эмийн худалдан авалт хийдэг байхыг үгүйсгэхгүй. Захирал удирдлагын хүний нөөц нь тэлсэн байхыг мөн үгүйсгэх аргагүй. Зарим эмнэлэгт захирлын ажлын алба гэж байна, энэ шаардлагагүй. Ерөнхий сайд эмч, эмнэлгийн ажилтанд цомхотгол хийхгүй байх талаар хэлсэн. Гэхдээ хэт тэлсэн орон тоо, тэр дундаа аж ахуйн дарга нар байх нь эмнэлгийн зардлыг өсгөөд байна. Тэр орон тоог цомхотгох юм бол 20 тэрбумыг хэмнэх боломжтой гэж харж байгаа.

Эрүүл мэндийн байгууллагуудын сонгон шалгаруулалтыг илүү ухаалаг, үр ашигтай зохион байгуулна

Монгол Улсын нийт хүн амын 90 хувь нь улсын эмнэлэгт тусламж үйлчилгээ авдаг. 10 хувь нь хувийн эмнэлэгт очдог. Эхний ээлжид лавлагаа шатлалын эмнэлгийн ачааллыг тодорхой хувиар бууруулах ёстой.

Өндөр мэргэжлийн эмч нарыг төвөөс орон нутагт ажиллуулвал, сургалт хийвэл орон нутгийн болон лавлагаа шатлалын эмнэлэгт бонус өгнө. Бид хүмүүсийг өвдсөн байхад нь эмчлэх биш дөнгөж эхэлж байхад нь, хүндрээгүй байхад нь эмчлэх бодлого баримтална. Энэ бол хөгжсөн улс орнуудын бодлого.

Хувийн эмнэлэгт хавтгайруулж мөнгө өгөхгүй гэдгийг хатуу хэлмээр байна. Иргэдийнхээ эрүүл мэндийн төлөө ажиллана. Хувийн эмнэлгийн ашигтай байдалд ажиллаж болохгүй.

Салбарын цахимжуулалтыг сайжруулах замаар үр ашгийг сайжруулна

20-40 тэрбумыг хэмнэнэ. Иргэн анхан шатны эмнэлэгт очоод цусны дэлгэрэнгүй шинжилгээ өгч байна. Дараа нь лавлагаа шатлалд очиж байна. Гэтэл тэр цусны шинжилгээг дахиж хийдэг. Нэг иргэнд 39 удаа давтагддаг. Тэр бүр дээр өртөг явж байдаг. ЭМДС-аас мөнгө нь гардаг. Цахимжчих юм бол анхан шатлалд өгсөн шинжилгээ лавлагаа шатлалд очно гэсэн үг.

Энэ цогц арга хэмжээг авснаар 150 тэрбум төгрөг хангалттай хэмнэнэ. Үүгээрээ таван сарын 1-нээс эхлээд эмч нарыгаа нэг цалинтай болгоно. Мөн ЭМДС-ийн мэдээллийг бүгдийг нь ил байлгана. Аль эмнэлэгт хэдэн төгрөг өгсөн тухай бүгд ил болно гэсэн үг.

Иргэн талдаа оочер дараалалгүй, хүнд сурталгүйгээр анхан шатандаа үзүүлдэг, чанартай үйлчилгээ авдаг болмоор байна" хэмээсэн юм.

Г.МИШЭЭЛ

Өөрийн сэтгэгдлээ илэрхийл

Share Tweet