АН-ын намрын улс төр: Л.Гантөмөрийн чих зөөлөрч, фракцуудынх нь зодоон ширүүсэх нь

Ардчилсан намын залуучууд намрын улстөрийг УИХ-ын чуулганаас өмнө эхлүүлж байна. Энэ долоо хоногт АН-ын залуу гишүүд болох С.Эрдэнэболд, Б.Түвшин, Ц.Баатархүү нар ҮБХ-гоо яаралтай хуралдуулах шаардлагыг О.Амгаланбаатарт өгсөн. Мөн С.Эрдэнийн талынхан ч Төрийн ордонд “Л.Гантөмөрийг хурдан солих” агуулгаар мэдээлэл хийсэн.

Энэ шаардлагуудад Л.Гантөмөр ч дуулгавартай байна. Учир нь Ардчилсан намын Улс төрийн зөвлөлийн ээлжит хуралдаан өчигдөр /2025.08.20/ боллоо. Ардчилсан намын дарга, УИХ-ын гишүүн Лу.Гантөмөр Ардчилсан намын Үндэсний бодлогын хороог энэ сарын 28-ны өдөр хуралдуулахаар товлон зарласан юм. Уг хурлаар Ардчилсан намын Үндсэн дүрэм болон хөтөлбөр, намын дотоод зохион байгуулалтын асуудлыг хэлэлцэх чигтэй. Олонх болж чадаагүй ч, намынхнаа нэгтгэж, УИХ-д овоо хэдэн суудал авсан. Засгийн газарт ч гишүүдээ оруулаад суулгачихсан. Л.Гантөмөр пээдгэр байж ирсэн. Харин Засгийн газраас гарахдаа “намын даргын суудлаа өгье” гэж мэдэгдсэн байдаг. Энэ утгаараа гишүүдийнхээ шаардлагын хариуд татгалзсангүй.

Намын удирдлагын суудлыг тойрсон өрсөлдөөн бүр эрт ил, далд байдлаар өрнөөд эхэлчихсэн билээ. УИХ-ын сонгуулиас хойш намын дарга болох гэж гүйсэн. Одоогийн жагсаалтад О.Цогтгэрэл, Б.Пүрэвдорж, Ч.Лодойсамбуу, О.Алтангэрэл гэхчлэн нэрс хөвөрч буй.

Ямартай ч ойрын өдрүүдэд АН-ын доторх бүлэглэл, фракцуудын зодоон ширүүсч, дотоод уур амьсгал ч эрс муудах нь. АН-ын дарга ч гэсэн жирийн гишүүдийнхээ хүсэл зоригоор биш бүлэглэлүүдийнхээ дур зоргоор шийдэгдэнэ. Гэхдээ тус намын даргын албан тушаал бол зүгээр нэг суудлын төлөөх зодоон биш. 2027 оны Монгол Улсын Ерөнхийлөгчийн сонгууль, 2028 оны УИХ-ын сонгуульд барьж орох гол зэвсэг, стратегийн удирдлага юм. АН-ын том хувь заяатай холбоотой асуудал. Тиймээс өрсөлдөөн улам ширүүснэ гэсэн үг.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй