Сурвалжилга: ₮1.9 их наядаар бүтэх "Сэлбэ 20 минутын хот" төсөлд шалгарсан 5 Монгол компани шаваа тавиагүй байна

Орон нутгийн төсвийн хөрөнгө оруулалтаас 1.9 их наяд төгрөгийг төсөвлөж, дөрвөн багц бүхий долоон тендерээр гүйцэтгэгчээ шалгаруулж ажлаа эхэлсэн "Сэлбэ 20 минутын хот"-ийн бүтээн байгуулалтын үйл явцыг сурвалжиллаа.

"Сэлбэ 20 минутын хот" бүтээн байгуулалт Чингэлтэй, Сүхбаатар дүүргийн 158 га, 2206 нэгж талбайд хэрэгжиж буй. Ингэхдээ Нийслэлээс тухайн газарт оршин сууж байсан 1736 иргэнтэй нөхөн олговрын гэрээ байгуулж, мөнгийг нь олгосон байдаг. Сэлбэ хотод нийт 8565 өрхийн 113 блок орон сууц, 8 км авто зам, 39 км явган зам, 23 км дугуйн зам, 3.6 га талбайд тоглоомын талбай, гурван сургууль, таван цэцэрлэг, эмнэлэг, спорт байгууламж барихаар төлөвлөжээ. Мөн нийт талбайн 40 хувьд ногоон байгууламж байлгах юм байна.

Биднийг өдрийн 14.00 цагийн орчимд барилгын бүтээн байгуулалт дээр очиход барилгын талбайд эхний ээлжийн блокуудын барилга угсралт, суурийн цутгалтын ажил ид өрнөж байсан юм.

Гэрэл зургийг: О.Улсболд, Байршил: "Сэлбэ 20 минутын хот" төслийн талбай

Бидний очсон барилгын талбай бол "Сэлбэ 20 минутын хот"-ын нэгдүгээр багц ажлын талбар байв. Одоогоор Багц 1, Багц 2 дээр ажил өрнөж буй бөгөөд сүүлд шалгарсан дөрвөн Монгол, нэг Хятад компани барилгын ажлаа эхлүүлээгүй нөхцөл байдалтай байв. Угтаа эл таван компани 5000 орчим айлын 73 блок орон сууцыг барих ёстой.

Барилгын талбайд ажиллаж байсан Сэлбэ 20 минутын хот төслийн холбоо дохиоллын инженер Ц.Бараас явцын талаар тодрууллаа.

-Төслийн үргэлжлэх хугацааны хувьд маш богино буюу 2027 он гэхэд эхний ээлжийн орон сууцуудаа ашиглалтад оруулах төлөвлөгөөтэй-

Тэрбээр "Сэлбэ 20 минутын хот төслийн хүрээн дэх газар чөлөөлөлтийн ажил 90 гаруй хувьтай үргэлжилж, эхний хоёр багц ажил үргэлжилж байгаа. Тодруулан хэлбэл эхний хоёр багц тендерийн гүйцэтгэл буюу хоёр Хятад компани барилгын суурь, цутгалтын ажлаа хийж эхлүүлсэн байдалтай байгаа юм. Мөн зарим барилгынхаа зоорины давхрын барилгын ажил эхэлчихсэн. Харин багц 3,4-т Монгол компаниуд олонх нь шалгарсан ч одоогоор шаваа тавиагүй. Одоогоор гомдлын хугацаа буюу тендерийн хугацаанд ямар нэгэн асуудал гараагүй учир гэрээний ажил, эхний уулзалтууд явагдаж буй. Энэ долоо хоногоос ажлаа эхлэх байх. Төслийн үргэлжлэх хугацааны хувьд маш богино буюу 2027 он гэхэд эхний ээлжийн орон сууцуудаа ашиглалтад оруулах төлөвлөгөөтэй ажиллаж байгаа" хэмээсэн юм.

Дээр дурдсанчлан 1.9 их наядын өртөг долоон тендерийн хүрээнд 7 компанитай гэрээ байгуулан ажиллахаар болсон. Угтаа 373-616 тэрбумын дүнтэй дөрвөн тендер зарласан ч дотоодын компаниуд оролцох боломжгүй байдал үүсэж, шаардлага хүргүүлснээр сүүлийн хоёр багцыг таван хэсэгт хуваасан юм.

Ямар компаниуд тендерт шалгарав?

Багц 1. БНХАУ-ын Си Эс Эм Си гэх компани 373.2 төгрөгийн үнийн саналтайгаар уг тендерт шалгарсан. Тухайн компанийн мэдээллийг нягталж үзэхэд гадаадын хөрөнгө оруулалттай, 2008 онд үйл ажиллагаагаа эхлүүлсэн, China Second Metallurgical Group Corporation Limited-ийн хувь эзэмшил буй компани байв. Өмнө нь Монголд тендерт оролцож байгаагүй бөгөөд энэ онд ганцхан тендерт үнийн санал илгээж шалгарсан нь энэ аж.

Багц 2. БНХАУ-ын China Construction Sixth Ergineering Bureau Corp Ltd ХХК 448.6 тэрбумын үнийн санал хүргүүлэн шалгарсан байна. Уг компанийн мэдээллийг нягтлахад төмөр зам болон авто замын байгууламж барих үйл ажиллагааны чиглэлтэй, өмнө нь Монголд тендерт шалгарч, ажил гүйцэтгэж байсан туршлагагүй юм байна.

Багц 3. Угтаа 616.5 тэрбумын өртөгтэй. Үүнийг гурван хэсэгт хуваан гүйцэтгэгчээ шалгаруулсан.

3.1. 71 айлын есөн давхар бүхий 11 блок орон сууцны иж бүрэн цогцолбор хорооллын тендерт “China Construction Fifth Engineering Bureau” гэх Хятад компани 175 тэрбум төгрөгийн үнийн саналтайгаар шалгарсан.

3.2. 71 айлын есөн давхар бүхий 12 блок орон сууцны иж бүрэн цогцолбор хорооллын тендерт Моринсувд 187.9 тэрбумын үнийн саналтайгаар шалгарсан. Сургууль, цэцэрлэг, ахмадуудын асрамж, ногоон байгуулж зэрэг Улаанбаатар хот, Засгийн газраас зарласан тендерүүдэд шалгарч байсан. Гүйцэтгэх захирлаар нь Загдхүүгийн Мягмардорж ажилладаг.

3.3. 71 айлын есөн давхар бүхий 14 блок орон сууцны иж бүрэн цогцолбор хорооллын тендерт Нутгийн буян групп 214 тэрбумын үнийн саналтайгаар шалгарсан. Тус компанийн Ерөнхий захирлаар нь Л.Бат-Орших ажилладаг.

Багц 4. 491 тэрбумын төсөвтэй. Дараах хоёр хэсэгт хуваагдан тендерээ зарлаж, гүйцэтгэгчээ шалгаруулсан юм.

4.1 буюу 71 айлын есөн давхар бүхий 16 блок орон сууцны иж бүрэн цогцолбор хорооллын тендерт “Монкон” ХХК 259.7 тэрбумын үнийн саналтайгаар шалгарав. Тус компани 2010 онд байгуулагдсан, гүйцэтгэх захирал нь Г.Батбаяр.

4.2 буюу 71 айлын есөн давхар бүхий зургаан блок болон 71 айлын 12 давхар бүхий найман блок орон сууцны иж бүрэн цогцолбор хорооллын тендерт “Професионалстрой” ХХК 197 тэрбумын үнийг санал болгож, шалгарсан байна. Тус компани 2013 онд байгуулагдсан. Гүйцэтгэх захирлаар нь Шайрийнямбуу Мөнхсайхан ажилладаг байна.  

Төлөвлөгдсөн зураг төсөл

Төслийг хэрэгжүүлснээр хотын төв рүү чиглэх урсгалыг саармагжуулах төдийгүй нийт 15’600 яндан, 12’000 нүхэн жорлонг ариутгалын бодисоор устган, агаарын бохирдлыг 6 хувь бууруулж, хөрсний доройтлыг багасгах давуу талтай хэмээн судлагджээ. Мөн энэ ондоо багтаан төслийн хүрээнд баригдах нийт 113 блокийн барилга угсралтын ажлыг эхлүүлэхээр төлөвлөж байгаа юм байна. Ингэснээр эхний ээлжийн орон сууцууд 2027 оны долоодугаар сард ашиглалтад орох юм байна.

Төслийн үйл явц хэрхэн өрнөх талаар бид эргэн сурвалжлах болно...

Энэ мэдээнд өгөх таны үнэлгээ

Хуваалцаарай Жиргээрэй