Ж.Бат-Эрдэнэ: Надад Л.Оюун-Эрдэнийг чөлөөлсөн, Д.Амарбаясгаланг томилсон хоёр тогтоол байна

УИХ дахь МАН-ын бүлгийн дарга Ж.Бат-Эрдэнэ өнгөрсөн амралтын өдрүүдэд болсон МАН-ын Бага хурлыг удирдсан.

Энэ үүднээс зарим үйл явц дээр мэдээлэл өглөө.

Тэрбээр “Хурал удирдагч юун түрүүнд тухайн хурлын дэгийг нийт гишүүдээрээ батлуулах ёстой. Энэ дагуу бүр зүйл явагдсан. Дэгээ баталсан.

Тооллогын комиссын сонгууль явуулах журмыг нээлттэй танилцуулж, гишүүдээс гарч ирсэн саналыг нь тусгаад, гар өргөж батлуулаад явсан.

Өөрөөр хэлбэл, аль нэг нэр дэвшигч нь 66.6 хувиас илүү санал авахгүй бол дахин санал хураалт явуулъя гэсэн санал тооллогын комиссоос орж ирсэн. Тэр журмыг Бага хурлын гишүүд баталсан.

Ер нь бол энэ хурал дээр л асуудлаа шийдье, тэгэхгүй бол Монголын төрийн ажил цалгардах нь гэдэгт бүгд санал нэгдсэн Тэр үүднээс тус журмыг олонхын саналаар батлаад  явсан.

Хамгийн гол нь олонхоороо асуудлыг шийддэг зарчим бий шүү дээ.

Л.Оюун-Эрдэнэ өргөдлөө өгсөн. Урд нь өгөх ёстой байсан гэж тайлбарлаад байна. Миний ширээн дээр хоёр тогтоол байгаа. Нэг нь Л.Оюун-Эрдэнийг намын даргаас чөлөөлсүгэй. Нөгөө нь Д.Амарбаясгаланг сонгосугай гэж. Тэгэхээр би муу ч үгүй хуульч хүн. УДШ дээр чөлөөлсөн, сонгосон хоёр тогтоол огноотойгоо байхад л хангалттай гэдгийг ойлгож байна.

Хоёр өрсөлдөгч гарч ирэхээр дэмжигсэд мөн хоёр тал байх нь тодорхой. Үүнийг хуваагдал гэж үзэж болохгүй. Өрсөлдөөн бий болох ёстой нь л үнэн. Би бол хурал дээр бүх асуудлаа ярья, хүний хэлэх үгийг таслахгүй, шахахгүй байя гэж ажилласан.

Явж явж бүх зүйл Улс төрийн намын тухай хуульд л нийцэх ёстой. Нийцэж байгаа” гэлээ.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй