Х.Булгантуяагийн асуудал ОУПХ-ноос ажлын хэсэг гаргах хэмжээнд өндрөө автал хэрхэн өрнөв

Олон улсын парламентын холбооны 152 дугаар хурал энэ сарын 15-19-нд Турк улсын Истанбул хотноо болж өнгөрсөн. Тус хурлаас "УИХ-ын дэд дарга асан Х.Булгантуяаг өөрийн чиг үүргийн хүрээнд чуулганы хуралдааныг удирдсаных нь төлөө “Төрийн эрхийг хууль бусаар булаан авах” гэмт хэрэгт буруутгагдсан" гэх дүгнэлт гарсан юм. Улмаар уг асуудлыг анхааралдаа авч буйгаа мэдэгдээд буй. Харин МАН-ын бүлгийн дарга Ж.Батжаргал УИХ-ын бүтцийн байгууллага болон бүлэгт ОУПХ-ны шийдвэртэй холбоотой мэдээлэл ирээгүй, ирвэл хэлэлцэнэ гэж байсан юм. Тэгвэл ОУПХ-ны ажлын хэсэг Монголд ирж ажиллаж магадгүй бололтой.

Энэ талаар УИХ-ын гишүүн Х.Булгантуяа "Монгол Улсаас минийхээс гадна өөр хүсэлтүүд очсон байгаа юм билээ. Олон намын төлөөллөөс ийм асуудал үүсээд эхэлбэл Монголын ардчиллын индекст сөргөөр нөлөөлнө. Манай ардчиллыг алдаатай, оноотой ч урт хугацаандаа зөв замаар явсан гэж дүгнэдэг. Энэ нь ч бүс нутагтаа давуу тал болдог. ОУПХ бол манай улсын нэгдэн орсон олон улсын байгууллагуудын нэг. Монголын парламентын явцын талаар ОУПХ-нд өмнө ч гишүүд хүсэлт өгч байсан тохиолдол байдаг.ОУПХ-ноос үүнийг анхаарч ажлын хэсэг явуулж ажиллуулах юм шиг байна" гэсэн юм.

Түүнтэй холбоотой асуудал ОУПХ-аас ажлын хэсэг гаргах хэмжээнд хүртэл хэрхэн өрнөв гэдгийг эргэн сануулъя.

2025.10.17 Тэрбээр УИХ-ын чуулганы нэгдсэн хуралдаанаар тухайн үеийн Ерөнхий сайд Г.Занданшатарыг огцруулах асуудлыг хэлэлцэх хуралдааныг удирдсан. Энэ хуралдаан хоёр өдөр дамнан сунжирснаас асуудал эхэлсэн билээ.

2025.10.22 ҮХЦ -ийн Их суудлын хуралдаанаас Х.Булгантуяаг Үндсэн хууль зөрчсөн гэж дүгнэв. Тодруулбал, өмнөх өдрийн гишүүдийн ирцийг оруулан тооцож, 51.6 хувийн ирцтэй гэж үзэн чуулганы хуралдааныг эхлүүлсэн нь Үндсэн хуулийн 1.2, УИХ-ын чуулганы хуралдааны дэгийн тухай хуулийн 6.6.2-г ноцтой зөрчсөн. Мөн Үндсэн хуульд заасан ердийн олонх буюу 64 хүний саналаар Ерөнхий сайдыг огцруулах ёстой байтал 52 хүний саналаар огцруулсныг Үндсэн хуулийн холбогдох заалтыг тус тус зөрчсөн гэж дүгнэсэн.

2025.11.05 Иргэн О.Отгонтөгс УИХ-ын гишүүн Х.Булгантуяа, Төрийн байгуулалтын байнгын хорооны дарга Ц.Сандаг-Очир, УИХ-ын гишүүн П.Сайнзориг нарын гишүүдийн бүрэн эрхийг түдгэлзүүлж, хуулийн хариуцлага тооцуулах асуудлаар Улсын ерөнхий прокурорт гомдол гаргасан. Х.Булгантуяа нарт холбогдох хэргийг харьяаллын дагуу Тагнуулын байгууллагаас шалгаж эхлэв.

2025.11.12 УИХ-ын чуулганы нэгдсэн хуралдаанаар Х.Булгантуяаг УИХ-ын дэд даргаас чөлөөлөх асуудлыг хэлэлцэж, 66.7 хувийн саналаар үүрэгт ажлаас нь чөлөөлөв.

2025.11.24 Прокуророос яллагдагчаар татав. УИХ-ын гишүүн Х.Булгантуяаг Монгол Улсын Эрүүгийн хуулийн 19.2 дах хэсэгт заасан Төрийн эрх мэдлийг хууль бусаар авах, саатуулах гэмт хэрэг үйлдсэн байж болзошгүй хэмээн үзэж яллагдагчаар татсан.

2025.12.26 Түүнд холбогдох хэргийг харъяаллын дагуу Тагнуулын байгууллагаас шалгаж эхэлсэн боловч яллагдагчаар татах тогтоолтойгоо биечлэн танилцаагүй яваа гэх мэдээлэл гарав.

2026.01.28 Эрүүгийн хэрэг хянан шийдвэрлэх ажиллагаанд саад учруулахгүй байх зорилгоор Х.Булгантуяад шүүхээс Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авч шийдвэрлэв.

2026.02.27 МАН-ын Бага хурлын үеэр намын дарга Н.Учрал Үндсэн хууль зөрчсөн нь Цэцийн дүгнэлтээр тогтоогдсон УИХ-ын гишүүн Х.Булгантуяаг намын гишүүнээс чөлөөлөх нь зүйтэй гэж үзэж буйгаа мэдэгдэв.

Одоогоор түүнийг Нийслэлийн прокурорын газраас төрийн эрх барих дээд байгууллагын эрх мэдлийг хууль бусаар авах зорилгоор үгсэн тохирч хүчирхийллийн аргаар авахад бэлтгэсэн, зохион байгуулсан, оролцсон гэмт хэрэг үйлдэхээр завдсан гэмт хэрэгт холбогдуулан эрүүгийн хэрэг үүсгэж яллагдагчаар татаад буй. Энэ хугацаанд гишүүний бүрэн эрх нь хэдэнтээ хөндөгдөж, НАМЭХ-н даргын албаа ч өгсөн.

Сүүлд түүний хурал удирдахдаа мөрдсөн Дэгийн тухай хуулийн зарим заалт, Үндсэн хуультай зөрчилдөж байгаа талаарх ҮХЦ-ийн дүгнэлтийг УИХ-аар хэлэлсэн ч тэгсгээд намжсан. Эмэгтэй парламентчдаас тодорч УИХ-ын дэд дарга гэх шаггүй том алба хашиж байсан тэрбээр хагас жилийн хугацаанд асар хурдтай уналтад ороод байгаа юм.

Д.ХАДААН

Өөрийн сэтгэгдлээ илэрхийл

Share Tweet