Ц.Чулуунзагдын цагдан хорионы хугацааг энэ сарын 07-нд дахин НЭГ САРААР сунгасан тул өмгөөлөгч нь гомдол гаргажээ
АТГ-аас өнгөрсөн есдүгээр сарын 10-ны өдөр МАН-ын нарийн бичгийн дарга Ц.Чулуунзагдын албан өрөө болон гэрт нэгжлэг хийж, мөрдөгчийн саналаар 48 цагийн хугацаатай цагдан, хорьсон байдаг.
Улмаар нэг сарын хугацаатайгаар цагдан хорих шийдвэрийг Хан-Уул дүүргийн Эрүү, Иргэний хэргийн хялбар ажиллагааны анхан шатны тойргийн шүүхээс гаргасан билээ.
Тэгвэл цагдан хорионы хугацаа энэ сарын 07-нд дуусжээ. Цагдан хорионы хугацааг ДАХИН НЭГ САРААР сунгаж шийдвэрлэсэн байна. Эл шийдвэртэй холбоотойгоор Ц.Чулуунзагдын өмгөөлөгч Б.Оюунбилэг гомдол гаргасан бөгөөд гомдлыг өнөөдөр /2025.10.10/ хэлэлцэх ажээ.
Өнгөрсөн есдүгээр сарын 27-нд болсон МАН-ын Бага хурлын үеэр өмгөөлөгч Б.Оюунбилэг гарч ирж мэдээлэл хийсэн. Түүний дараа АТГ-аас "намын эрх ашгийг хамгаалахын тулд мөрдөх байгууллагын үйл ажиллагаанд саад учруулж байна" хэмээн үзэж, Монголын Өмгөөлөгчдийн холбоонд хандсан гэгдээд байсан юм.
Ц.Чулуунзагдыг Д.Амарбаясгаланг МАН-ын даргад нэрээ дэвшүүлсэнтэй холбоотой буюу улстөрийн зорилгоор саатуулсан гэх хардлага ч хөвөрсөн. Гэхдээ АТГ-аас “Ц.Чулуунзагдыг хахууль авсан, хууль бусаар гэрээ байгуулсан хэргээр цагдан хорьсон. Нэгжлэгийн явцад "Админерал" компанийн гүйцэтгэх захирал агсан Х-ийн гарын үсэгтэй дардас олдсон. Үүнийг хууль бусаар ашигласан байж болзошгүй” хэмээгээд буй юм. Ц.Чулуунзагдын ах Ц.Ламжав нь Тавантолгойн бүлэг ордын Бортээгийг түшиглэж нүүрс баяжуулах үйлдвэр барьсан "Админерал" ХХК-ийг үүсгэн байгуулагч. "Админерал" нь өөр гурван компанийн хамт МТАС түншлэл болж, тендерт шалгарснаар Бортээгийн нүүрсийг олборлох, баяжуулах, борлуулах үүрэг хүлээсэн.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.