Энэ сарын 16-ны ням гарагт Казахстан улсын ерөнхийлөгч асан Нурсултан Назарбаевын зээ хүү Айсултан Назарбаев Лондон хотод нас барсан. Түүний үхлийн шалтгаан албан ёсоор ил болоогүй ч Казахстаны хэвлэлүүд зүрх нь зогссон хэмээн бичиж буй юм.
Олон нийтийн мэддэгээр Айсултан бол цуут ерөнхийлөгч Нурсултан Назарбаевын том охин Дарига Назарбаевын хүү. Харин аав нь Назарбаевынхны хүргэн болсныхоо дараа улс төрийн ажилд идэвхийлэн оролцож, басхүү хөрөнгөжиж, эцэстээ шоронд хоригдож байх үедээ амиа егүүтгэсэн байдаг. Харин Айсултан аавыгаа бусдад хорлуулсан гэж үздэгээ нуудаггүй байсан юм.
Аавынхаа үхлээс хойш Айсултан хар тамхи хэрэглэх болж, хамааралтай болсон гэдгээ өөрийн Фэйсбүүк хуудсаар дамжуулан зарлаж байлаа. Сүүлийн жилүүдийг их Британид өнгөрүүлсэн түүнийг цагдаагийн ажилтны гарыг хазсан, зочид буудлын найман давхраас үсрэхийг завдсан тухай мэдээ хэвлэлээр хөвөрч байв.
Фэйсбүүк хуудастаа Казахстаны улс төрд холбогдох, үнэн худал нь үл мэдэгдэх зүйлсийг тэр бичсээр байсан. Хамгийн онцлууштай нь тэр энэ оны нэгдүгээр сард өөрийн жинхэнэ аавыг Нурсултан Назарбаев хэмээн зарлаж байв. Мөн Нурсултаныг ерөнхийлөгчийн албаа өөрийн хүсэлтээр өгсөн нь ээж Даригагийн шахалт, тэр одоо Нурсултаныг үхүүлэхийг хүсэж буй гэхчлэн бичиж байсан билээ.
Хамгийн сүүлд долдугаар сарын 16-нд тэр Казахстаны толгой тэрбумтан Владимир Кимийн тухай ноцтой баримтуудыг дэлгэсэн юм. Айсултаны ийн учир битүүлгээр нас барсан нь олон хүнд сэжиг төрүүлээд байна.
Г.САНСАРМАА
Эх сурвалж: RT
