Т.Доржхандын үгүйсгэсэн ЭХҮТ -ийн ₮750 саяын гурван жийп машины тендер 3 дахь удаагаа зарлагдав

“Эрчим хүчний үндэсний төв” ТӨХХК “Ланд-300”, “Ланд-200”, “Прадо” зэрэг автомашин авах 750 сая төгрөгийн тендер зарласан. Уг тендерээ 2025.02.11-нд зарлаж, 2025.03.05-ний өдрийн 11.30 цаг хүртэл тендерийн материалыг хүлээн авах товтой байсан.

Гэвч энэхүү тендерийг Шадар сайд бөгөөд Эрчим хүчний үндэсний хорооны дарга Т.Доржханд "худал мэдээлэл" хэмээн үгүйсгэхийг оролдсон байдаг.

Тухайн үед Т.Доржханд өөрийн цахим хуудаснаа "Худал мэдээлэл. Эрдэнэбүрэнгийн усан цахилгаан станц барихтай холбоотой төслийн худалдан авалтыг Эрчим хүчний үнийн өсөлтөөр санхүүжигдэж байгаа мэтээр ойлгуулж, олон нийтийн бухимдлыг өдөөх замаар Эрчим хүчний реформыг харлуулах ажлаа зогсооно уу. Монголд Эрчим хүчний реформ зайлшгүй хийгдэх учиртай. Үр дүнд нь хувийн хөрөнгө оруулалтаар цахилгааны эх үүсвэр барьж дотоод хэрэглээгээ бүрэн ханган, бүтцийн өөрчлөлт хийгдэж салбарын үр ашиг нэмэгдэнэ. Эгийн гол, Эрдэнэбүрэнгийн усан цахилгаан станц баригдах учиртай. Энэ нь эрчим хүчний системийн тогтвортой, найдвартай, биеэ даасан системийг үүсгэх ач холбогдолтой. Олон жил популизмийн золиос, халамжийн бай болсон Эрчим хүчний салбарыг шинэчлэх ажил амар хийгдэхгүй нь тодорхой. Харин учир мэдэх жиргээчид, хамтарсан Засагт цуг байгаа намын хэвлэл хариуцсан нөхөд илт худал мэдээлэл тарааж байгаадаа дүгнэлт хийнэ үү. Хамтарсан Засгийн газрын хамгийн чухал реформ, түүнийг толгойлж буй ХҮН намд дуртай, дургүй эсэхээс үл хамаараад Монгол улс аль нэгэн улсаас хамааралгүй, биеэ даасан эрчим хүчний тогтолцоотой болох нь Монгол Улсын эрх ашиг гэж хандахыг хүсье. Баярлалаа" хэмээж байсан.

Уг тендер /2025-04-08/-ны өдөр дахин зарлагдаж /2025-04-28/ хүртэл материал хүлээн авахаар байв.

Гэтэл тухайн тендер өнөөдөр дахин зарлагдлаа. Ингэхдээ мөн л гурван автомашиныг 750 сая төгрөгөөр авна гэсэн төсөвтэй. Тооцоолон үзвэл нэг бүрийн үнэ 250 сая бөгөөд Эрчим хүчний үндэсний төв өөрийн хөрөнгөөс санхүүжүүлнэ хэмээсэн байна.

ТЭЗҮ-дээ туулах чадвар сайтай өндөртэй, L4-cyl 16-VALVE DOHC VVTI хөдөлгүүртэй, арьсан суудлын бүрээстэй, 110-литрээс дээш шатахууны савны багтаамжтай гэх зэрэг олон шаардлагыг тавьсан байна. Тус тендерт холбогдох материалыг ирэх сарын 16-ны өдөр хүртэл хүлээн авах аж.

"Эрчим хүчний үндэсний төв" ТӨХХК (ЭХҮТ) нь /2022-10-03/-нд байгуулагдсан Монгол Улсын эрчим хүчний салбарт олон талт үйл ажиллагаа явуулдаг төрийн өмчит хувьцаат компани юм. Уг байгууллага нь эрчим хүчний салбарын үйл ажиллагааг зохицуулах, хяналт тавих, мэргэжилтнүүдийг сургах зэрэг чиг үүрэгтэй.

Тус газрын гүйцэтгэх захирлаар Д.Бямбасүрэн ажилладаг. Тэрбээр Эрчим хүчний сайд Б.Чойжилсүрэнгийн 10 жилийн найз. Өөрөөр хэлбэл эл албанд нь Б.Чойжилсүрэн томилж авч ирсэн байна.

Үүнээс өмнөх албан тушаалууд нь ч Б.Чойжилсүрэн сайдтай холбоотой байсаар ирсэн. 2016 оны УИХ-ын сонгуулийн дараа Б.Чойжилсүрэн Сангийн сайдаар томилогдохдоо найз Д.Бямбасүрэнгээ Сангийн яамны харьяа Төрийн банкны орлогч захирал болгосон.  

Гэтэл 2017 оны есдүгээр сард Ж.Эрдэнэбатын Засгийн газар огцорч, Б.Чойжилсүрэн Сангийн сайдын сэнтийгээсээ буухад Д.Бямбасүрэн ч Төрийн банкны орлогч захирлын албан тушаалаа өгч байжээ.  

Үүний дараа 2022 оны наймдугаар сарын 30-нд Б.Чойжилсүрэн Эрчим хүчний сайдаар томилогдсон.Үүнээс сарын дараа буюу 2022 оны есдүгээр сарын 29-нд найз Д.Бямбасүрэнгээ өөрийн Эрчим хүчний яамны харьяа “Эрчим хүчний үндэсний төв” ТӨХК-ийн гүйцэтгэх захирлаар томилсноор одоог хүртэл ажиллаж байна.

“Эрчим хүчний үндэсний төв” ТӨХХК дээрх тендерээс гадна

• 130 саяар Сургалт үйлдвэрлэлийн төвийн их засвар
• 97 саяар Байгууллагын паркет шал солих
• 144 саяар Суурин компьютер
• 28 саяар Дэлгэц / монитор/ авах тендер зарласан байна.

Энэ мэдээнд өгөх таны үнэлгээ

Хуваалцаарай Жиргээрэй