НҮБ-ын хүүхдийн сангийн үндэсний элч Р.Мөнхтуяагийн ажлын үр шимийг 16 мянга гаруй хүүхэд хүртээд байна
Улаанбаатар хот – 2024 онд Монгол дахь НҮБ-ын Хүүхдийн сангаас Хаан Банкны Гүйцэтгэх захирал Р.Мөнхтуяаг Үндэсний элчээр томилж байсан билээ.
Өнгөрсөн нэг жилийн хугацаанд тэрээр хүүхдийн төлөөх үйл хэрэгт хувийн хэвшлийн оролцоог нэмэгдүүлж, бодит ахиц авчирсан болохыг НҮБ-ын Хүүхдийн сангийн суурин төлөөлөгч Эваристе Коуасси-Комлан онцолж, тусгай арга хэмжээ зохион байгуулан, Үндэсний элчид талархал илэрхийллээ.
Өнгөрсөн онд Үндэсний элч Р.Мөнхтуяагийн санаачилсан болон эхлүүлсэн түншлэлийн үр дүнд боловсрол, эрүүл мэнд, хүүхэд хамгаалал, агаарын бохирдол, ус, ариун цэврийн чиглэлээр хүүхдэд ээлтэй олон төсөл, хөтөлбөр хэрэгжиж, эдгээрээр дамжуулан 16 мянга гаруй хүүхэд бодит үр шимийг нь хүртээд байна. Мөн хатагтай Р.Мөнхтуяагийн нөлөөллийн ажлын үр дүнд нийт 1 тэрбум төгрөгийн хөрөнгө оруулалтыг хүүхдийн төлөө босгож чаджээ.
Тэрээр “ТОП-100 аж ахуйн нэгж”-үүдийг хамруулсан хувийн хэвшлийнхний уулзалтыг санаачлан зохион байгуулж, НҮБ-ын Хүүхдийн сангийн хандивлагчдын арга хэмжээ болон хандивын гала үдэшлэгээр дамжуулан “Таблеттай багш” хөтөлбөрт зориулан хөрөнгө босгож, алслагдсан бүсийн хүүхдүүдийг сургалтын ухаалаг багцаар хангах хөрөнгийг бүрдүүлсэн.
Харин 2025 онд Үндэсний элч Р.Мөнхтуяа НҮБ-ын Хүүхдийн сангаас хэрэгжүүлэх боловсролын салбарын цахим шилжилт болон хиймэл оюун ухааны хөтөлбөр, агаарын бохирдлын нөлөөллөөс хүүхдийн эрүүл мэндийг, хорт хавдраас урьдчилан сэргийлэх, цэвэр усны хүртээмж зэрэг хөтөлбөрүүдийг дэмжин ажиллах юм.
“Энэ онд бид “Нэг баг, нэг сургууль” төслийг Боловсролын яам болон НҮБ-ын Хүүхдийн сантай хамтран эрчимтэй хэрэгжүүлж, эхний сургуулиа байгуулахаар төлөвлөж байна. Мөн “Хүүхэд бүрд аяга сүү” төслийг сүүний үйлдвэр болон шийдвэр гаргагч нартай хамтран ажил болгоно” хэмээн Үндэсний элч Р.Мөнхтуяа онцолсон юм.
Д.ЖАРГАЛМАА
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.