Өдрийн сурвалжилга: Циркчид хүйтэн, жижиг түрээсийн зааланд бэлтгэлээ хийгээд 19 жилийн нүүрийг үзэв

Циркчид очих хаяггүй, ёслох манежгүй болоод олон жил өнгөрлөө. Тодруулбал, 2006 онд циркийн барилга хувьчлагдсанаар Монголын циркчид бэлтгэлээ хангах байргүй болж түрээсийн байр, заал руу шилжсэн байдаг.

Дэлхийн циркчдийн өдөр, Монгол Улсын циркийн сургуулийн 85 жилийн ойг тохиолдуулан "Улаанбаатар хотын циркийн өдрүүд" арга хэмжээг зохион байгуулж байгаа билээ. Ингэхдээ тус циркийн тоглолт энэ сарын 16-22-ныг дуустал өдөр бүр тоглогдох аж.

Бид тус арга хэмжээний үеэр очин Монголын циркчидийн өнөөгийн нөхцөл байдлын талаар тодруулан хүргэж байна

-Алиалагч Н.Баянбилэг: Сураг сонсоход удахгүй цирк, сургуультай болох гэж байгаа гэсэн-

Н.Баянбилэг: Монгол циркийн урлагт хүчин зүтгээд 26 жил болж байна. Алиалагч, Акробат, Жонглёрын мэргэжилтэй. Дэлхийн циркчдийн өдөр, Монгол Улсын циркийн сургуулийн 85 жилийн ойг тохиолдуулан "Улаанбаатар хотын циркийн өдрүүд" арга хэмжээг зохион байгуулж буй. Энд 250 орчим хүн оролцож байгаа гэх тоо байгаа ч түүнээс олон хүн тоглож байна. Өдөр бүр программ солигдож байна, нэмэлтээр хамтлаг продакшнууд ямар ч үнэ төлбөргүй үзүүлбэр толилуулж байгаа юм.

Миний хувьд Монгол цирк хөгжлийн төвд харьяалагддаг. Өөрийн студитэй учир тэндээ бэлтгэлээ базаадаг.

Монголын циркийн орон байргүйн асуудал хөндөгдөөд нэлээд хугацаа өнгөрсөн. Одоогоор үндсэн циркгүйн улмаас хуучин циркийнхээ ашиглалтаас гарсан, халаалтгүй байранд бэлтгэлээ хангасаар байна. Бидэнд бэлтгэл, сургалтын заал, цирк хэрэгтэй байна. Бидний орчин нөхцөл, байр байгууламжийн шинэчлэлд улс орон минь анхаараасай гэж хүсдэг. Сураг сонсоход удахгүй цирк, сургуультай болох гэж байгаа гэх мэдээлэл бий.

Циркийнхээ тоглолтыг үзэгчдэдээ хүргэх сайхан байна. Циркээрээ дутагдсан нь мэдрэгдлээ. Маш халуун дотноор, суудал дүүрэн үзэгчтэйгээр тоглолтоо үргэлжлүүлж байна.

-Эгч дүү циркчид: Дэлхийн стандартын дагуу баригдсан, талбай томтой, дулаахан цирктэй болмоор байна-

Эгч Д.Ариунгэрэл: Циркийн сургуульд тав дахь жилээ суралцаж байна. Би дугуйтай жонглёр үзүүлдэг. Сургуулиа төгсөөгүй байгаа учир томоохон тоглолтуудад оролцож үзээгүй. Жижиг хэмжээний тоглолтуудад орж байсан.

Би энэ зургаан сард сургуулиа төгсөнө. Төгсөөд шууд ажлын байранд гарч чадах эсэхээ мэдэхгүй байна.

Бид Чингэлтэй дүүрэгт байрладаг заал түрээсэлж бэлтгэлээ хийдэг. Гэр, сургуулиас хол байдаг учраас ирж очиход төвөгтэй. Үүнээс гадна, хүйтэн, талбайн хувьд жижигхэн учраас бэлтгэлээ хийхэд хүндрэл учирдаг. Манай анги 24 хүүхэдтэй. Гэтэл тэр талбайд бүгдээрээ орох гэхэд багтдаггүй. Иймээс 12, 12-оороо хуваагдаж бэлтгэлээ хийдэг болохоор 3-4 цаг л сургуулилтаа хийж амждаг. Хэт жижиг талбайтай болохоор номероо бүтэн тоглож чадахгүй нөхцөл ч мөн үүсдэг л дээ.

Цаашид циркийн байр дэлхийн стандартын дагуу баригдсан, талбай томтой, дулаахан байгаасай гэж хүсэж байна.

Дүү Д.Ариунсанаа: Би нугаралтаар хичээллээд таван жил болж байна. Бэлтгэлээ өөрийн студидээ болоод хойд циркт хийдэг. Студид зарим хэрэгсэл маань багтдаггүй болохоор л тэр. Ингэхдээ аппарат хэрэгслээ нааш цааш зөөхөөс эхлэн олон бэрхшээл тулгардаг. Хүйтэн, тухгүй байдал бол дараагийн асуудал болчхож байгаа юм л даа.

-Монгол морин циркийн жүжигчин Ц.Тэмүүжин: Монголын циркчид түрээсийн байраар бэлтгэлээ хангаж, циркийн гал голомтыг унтраахгүй л гэж хичээж явна-

Ц.Тэмүүжин: Би багаасаа морь унах дуртай, хөдөлгөөний эвсэлтэй хүүхэд байсан учир энэ төрлөөр хичээллэх болсон. Хичээллээд 10 жил болж байна. Энэ хугацаанд БНХАУ, БНСУ-д олон тоглолтод оролцсон туршлагатай.

Бэлтгэл сургуулилтаа зуны улиралд л базаадаг. Өвлийн цагт зориулалтын бэлтгэлийн талбай байдаггүй учир бэлдэж чаддаггүй. Би 10 дахь жилдээ эл төрлөөр хичээллэж яваа.

Манай циркчдийн хувьд байр, заал түрээсэлж бэлтгэлээ хангаж байгаад сэтгэл зовниолтой байдаг. Үнэхээр Монголын циркийн төлөө гэсэн чин сэтгэлтэй хүмүүс л энд байдаг болохоор бодит нөхцөл байдлаас үл хамааран бэлтгэлээ үргэлжлүүлсээр байна. Ерөөс Монголын циркийн гал голомтыг унтраахгүй л гэж хичээж явна тэд минь.

Бүх жүжигчдэдээ нээлттэй сайхан орчинтой цирктэй болоосой, сургуультай болоосой гэж бодож байна.

-МУСТА Д.Ариунболд: Төрөөс цирк барьж өгсөнгүй. Иймд бидэнд газар, талбайг нь заагаад өгчихвөл бүх циркчид нэгдээд хөрөнгө босгож цирк барих саналын дор нэгдэхэд хүрээд байна-

41 дэх жилээ циркийн үзүүлбэр толилуулж буй МУСТА Д.Ариунболд: Морьтон циркчид "Улаанбаатар хотын циркийн өдрүүд" арга хэмжээнд Морьтны гайхамшиг номерыг үзүүлж буй. Монгол циркийн бүх цагийн түүхийн талыг бичилцсэн байна. Ерөөс Монголын циркчид бор зүрхээрээ л эл хугацааг туулж ирлээ.

Бидний хувьд хөдөөгийн сайхан талдаа зуны цагт бэлтгэлээ хийдэг. Харин бусад циркчдийн хувьд байр, заал түрээсэлж бэлтгэлээ хангадаг.

Төрөөс цирк барьж өгсөнгүй. Иймд бидэнд газар, талбайг нь заагаад өгчихвөл бүх циркчид нэгдээд хөрөнгө босгож цирк барих саналын дор нэгдэхэд хүрээд байна.

Энэ мэдээнд өгөх таны үнэлгээ

Хуваалцаарай Жиргээрэй