ИНҮТ ₮575 саяар будаг авна

Иргэний нисэхийн үндэсний төв 575 сая төгрөгөөр шар, цагаан, улаан, Хар будаг болон будаг шингэлэгч, цацруулагч авах тухай тендер зарласан байна.

Тодруулбал,

• 7 тн цагаан, мөнгөлөг цацруулагч
• 6.5 тн өнгөгүй эсвэл шаргал туяатай будаг шингэлэгч
• 24 тн шар, цагаан, улаан, хар, цэнхэр будаг авна хэмээсэн байна.

Тус тендерт тусгагдсан өртгөө урсгал төсвөөсөө гаргаж, энэ ондоо санхүүжүүлнэ хэмээжээ. Тендерийн материал хүлээн авах хугацаа ирэх сарын 05-ны өдөр дуусна.

Нэмэлт: Иргэний нисэхийн үндэсний төв (ИНҮТ) нь 2020 оны хоёрдугаар сард Зам, тээврийн хөгжлийн яамны шийдвэрээр байгуулагдсан бөгөөд агаарын навигаци болон нисэх буудлын үйлчилгээг хариуцан ажилладаг төрийн өмчит хязгаарлагдмал хариуцлагатай компани юм.

Монгол Улсын нутаг дэвсгэр болон агаарын зайд эдийн засгийн үр ашигтай агаарын навигацийн үйлчилгээ, нисэх буудлын үйлчилгээ үзүүлэх, удирдан чиглүүлэх чиг үүрэгтэй.

Зам, тээврийн хөгжлийн сайдын шуурхай хуралдаанаар Монголын төмөр зам ТӨХК-ийн гүйцэтгэх захирлаар ажиллаж байсан Б.Отгонсүхийг Иргэний нисэхийн үндэсний төв ТӨХК-ийн гүйцэтгэх захирлаар энэ оны нэг сард томилсон байдаг. Б.Отгонсүхийн хувьд 2020 оноос хойш нэлээдгүй албан тушаалд сэлгэн ажиллаж байна. Тухайлбал, 2019-2020 онд Нийслэлийн Зам тээврийн асуудал хариуцсан төслүүдийн удирдагч, 2021 онд Замын-Үүдийн гаалийн газрын даргыг түр орлон гүйцэтгэгч, 2022-2023 онд Улаанбаатар хот дахь Гаалийн газрын дарга, 2023 оны долдугаар сараас Монголын төмөр зам ТӨХК-ийн гүйцэтгэх захирлаар тус тус ажиллажээ. Тэрээр улс төр судлаач, олон улсын хуульч, механик инженер мэргэжлийг тус тус эзэмшсэн байна.

О.ОНОН

Энэ мэдээнд өгөх таны үнэлгээ

Хуваалцаарай Жиргээрэй