Шинэ Ерөнхий сайдын сценарь зурагдчихав уу

-Хүүгийнх нь дэгдээсэн манаргааны бүх өрнөлүүд Л.Оюун-Эрдэнэд сөрөг тусав-

Ерөнхий сайд Л.Оюун-Эрдэнийн хүү Тэмүүлэн найз охиндоо орлогын ямар эх үүсвэрээр өндөр үнэ бүхий бэлэг өгсөн нь хоёр өдрийн турш анхаарал татлаа. О.Тэмүүлэнг 20 настай гэх агаад гадагш сурах байсан ч яваагүй, үл хөдлөх хөрөнгийн зуучлагч, медиа студи чиглэлээр ажилладаг гэх мэдээлэл бий.

Харин Л.Оюун-Эрдэнийн хувьд “Хэро энтертаймент”-ийн 50 хувь, “Хүлэгү контент”-ийн 100 хувийг эзэмшдэг. Үүнээс өөр хувийн бизнес байхгүй.

Тэрбээр 2023 оны (хамгийн сүүлийн) хөрөнгө орлогын мэдүүлэгтээ, жилийн 249 сая 930 мянган төгрөгийн орлоготой гэж дурдсан. Гэр бүлийн гишүүдийн орлого нь 15 сая төгрөг аж.

Олон нийтийн сүлжээнд мэдээлж буйгаар, О.Тэмүүлэн найз охиндоо 17 сая төгрөгөөр бөгж, 12 сая төгрөгөөр цүнх авч бэлэглэсэн. Аавынх нь жилийн орлогын бараг найм хуваасны нэг байна. Өнгөрсөн сард сүй тавихдаа 300 сая төгрөг зарлагадсан гэдэг нь бол бүр даваад явчихна.

Харин өчигдөр найз охин нь болох Ө.Өгөөмөрийн аав Ч.Өгөөдэйбаатар хэвлэлд ярилцлага өгсөн. Үүндээ, “Би охиндоо 20 сая төгрөг шилжүүлсэн” гээд, ийм тийм бизнестэй зэргээр яриад байгаа.

Даанч хоёр алхалгүй, гарцгүй баригдав.

Түүний дурдсан “Ай эс өү өү” гэж компани нь бүртгэлийн хураамжаа ч төлөөгүй байх юм. АНУ-д үйл ажиллагаа явуулдаг гэсэн компани нь ч тодорхой мэдээлэлгүй, нэр төдий байна. Ямартай ч модны бизнес эрхэлж байсан нэгэн бололтой. Олон нийтийн сүлжээнд Ч.Өгөөдэйбаатарын талаар хангалттай мэдээллүүд хөвөрч буй.

Харин эхнэр Н.Ариунаа нь Чингэлтэй дүүргийн Нийгмийн даатгалын хэлтсийн даргаар ажиллаж байсан. Гэр бүлийн орлого нь 85 сая төгрөг гэж ХОМ-тээ мэдүүлжээ.

Энэ бүхнээс О.Тэмүүлэн, түүний найз охин яг ямар орлогын эх үүсвэртэй нь хөлбөрөлтгүй эргэлзээ дагуулчхаад байна.

Мэдээж Ерөнхий сайд, эрх баригч МАН-ын даргын хүү тул, санхүүгийн эрх чөлөөнд хүрэх бололцоо бүхий насанд очоогүй учраас аав нь үүнд хариуцлага хүлээнэ. Орлогоо нотолно. Ингэж чадахгүй бол улс төрийн хариуцлага хүлээх ёстой. Зүүсэн бугуйн цагандаа ч хариуцлага хүлээж, мэхийдэг жишиг олон улсад байна.

Учир нь өнөөдөр дундаж цалинтай буюу арай нэг гайгүй орлоготой, татвар нийгмийн даатгалаа төлдөг, зээл лизингд хамрагддаг энгийн монгол хүн бүтэн жил юу ч идэхгүй, уухгүй, гэр оронгүй хурааж байж 29 саяар бөгж, цүнх авах болно.

Говийн бүсийн зөвлөгөөнд оролцож яваа Ерөнхий сайд Л.Оюун-Эрдэнэ одоог хүртэл ямар нэг байр суурь илэрхийлсэнгүй, хэвлэлийн төлөөлөгч нь ч гарч ирсэнгүй. Энэ байдал олон нийтийн дургүйцлийг улам ихээр хүргэсээр байна.

-Гишүүдийн гарын үсгээр эсвэл өөрийн хүслээр огцрох боломжтой. Гэхдээ өрнөл хаашаа ч чиглэхгүй болов уу-

Ганцхан гарц бол орлогоо нотлох. Тодруулбал, шударга эх үүсвэрийн мөнгө хүүгийнх нь дансаар эргэлддэг гэдгийг нотлох. Үүнийг олон нийт шаардаж байна. Харин нотолж чадахгүй бол жагсаал зохион байгуулах нь тодорхой. Залуусын түрлэг нүргэлсэн 2022 оны жагсаалыг Л.Оюун-Эрдэнэ өөрөө ч мартаагүй яваа болов уу.

Ерөнхий сайдыг огцруулахын тулд УИХ-ын гишүүд гарын үсэг цуглуулна. Эсвэл Ерөнхий сайд өөрийн саналаар ажлаа өгнө. Ийм хоёр зам бий. Эхний хэлбэр МАН-ыг Л.Оюун-Эрдэнэ удирдаж байгаа нөхцөлд тийм ч амархан явчихгүй.

УИХ-ын гишүүн Ч.Лодойсамбуугийн санаачилсан албан бланк дээр гурван хүн л гарын үсэг зурсан. Одоо өөр гишүүн санаачлах уу. Эсвэл тэр бичигт нэмэгдэж зурах уу. 126 гишүүний 32 нь зурвал, асуудал УИХ-аар орох юм.

Тэгэхээр Л.Оюун-Эрдэнэ өөрөө ямар үйлдэл хийх үү гэдэг анхаарлын гол цэг болов.

Одоо баялгийн сан зэргээрээ улайрчихсан, тэнэгдүү гэмээр дүр төрхтэй Л.Оюун-Эрдэнэ хийнэ гэж бодсон алхмуудынхаа дунд хүүгээсээ болж огцрох шийдвэр гаргахгүй л болов уу. Өөрөө бас үнэн байх алхам нь түүнийг хааш хөтлөх үү гэдэг сонин. Харин пи-ар зэргийг хариуцаж буй нөхдийн ямар ч агуулга тав гишгэхгүй нь нийгмийн уур амьсгалаас харагдаж байна.

-Улстөрчдөөс хэн хэн баярлав, асуудлыг хэрхэн өрдөв-

Ер нь бол Ерөнхийлөгчийн сонгуулийн өмнө намын даргаа, Ерөнхий сайдаа солих сонирхол МАН-ын томчуудад бий юу гэвэл байгаа. У.Хүрэлсүх өөрөө Ерөнхийлөгчид өрсөлдөхгүй бол кандидатаа гүйцэтгэх засаглалын тэргүүнээр ажиллуулж, хэсэг "алдаршуулж" аваад, сонгуульд сойх хувилбар хүчтэй яригдсаар буй.

Энэ хувилбартай зэрэгцэж, Ерөнхийлөгчийн сонгуулийн дараа МАН-ын даргын суудлыг өнөөгийн төрийн тэргүүн авах магадлал ч бас нэлээд өндөр юм.

Энэ хэрээр Л.Оюун-Эрдэнийн засаглал цаашдаа барихад улам төвөгтэй болсоор байгаа. Өнгөрөгч оны арванхоёрдугаар сараас парламент, гүйцэтгэх засаглалын нэр хүндийг унагах нөлөөллийн ажил дотоодод хүчтэй ажиглагдах болов. Энэ хавартаа биш юм аа гэхэд намар Л.Оюун-Эрдэнийн Засгийн газар ер нь түймэрт өртөх нюансууд бүрдсээр байна.

Одоогийн ЗГХЭГ-ын дарга Н.Учралын хүмүүс бараг л ил цагаан "Бид дараагийн Ерөнхий сайд" гэж ярьцгаах болсон. Ганц түшиг болж байсан Х.Нямбаатар нь хот дээр очоод, сөрөг сэдвийн бөөгнөрсөн дүр болсон. Зарчмын хувьд нэгэндээ хань дэм болж явдаг Д.Амарбаясгаланг "Бор тээг"-ээр нь хөшигний ард барих болсон жиг, Ерөнхийлөгчтэй таарамжгүй буй гэх эртний шуум зэргүүд зэрэгцсээр байв.

Олон түүдэг гал бөөгнөхөөр тэгээд гал гардаг байх. Энэ кэйс дээр сошиал медиаг хүчээр өдөөх хэлбэрүүд түгээмэл байна. Сэдэв нь ч өөрөө органик юм. Баян ядуугийн ялгаа хэт хол зөрүү үүсгэсэн тул татвар төлөгчид уурлах, шаардах, бухимдлаа илэрхийлэх, хариуцлага хүлээхийг сануулах бүр жагсах эрхтэй.

Уг нь Л.Оюун-Эрдэнэ засаглаж байх хугацаанд, Монгол Улс баялгийн сангаа л жаахан хөрөнгөжүүлмээр байгаа юм. МАК, MCS, гаднаа "Рио Тинто"-той хүртэл хэлцэл хийх шаардлага үүсэж байгаа. Үүн дээр дотоодын болоод гадны эрх ашигт хамгийн автахгүй байж болох дүр нь Л.Оюун-Эрдэнэ л буй. Шинэ Засгийн газар байгуулагдлаа гэхэд магад Л.Оюун-Эрдэнийн энэ хийрхлийг дарах, баялгийн сангийн хэлцлийг нь саармагжуулахад чиглээд явчхаж ч мэдэх нигуртай.

ТЭМДЭГЛЭЛ: Хэрэв Л.Оюун-Эрдэнэ ямар нэгэн байдлаар ажлаа өгнө гэвэл дараагийн Ерөнхий сайд тодорхой болсон байх учиртай. Хөшигний ард Ерөнхийлөгчтэй зөвшилцөхгүйгээр энэ асуудал хөдлөхгүй тул, Ерөнхийлөгчийн дэмжлэгийг авч чадах, дээр нь Л.Оюун-Эрдэнийн тодорхой улс төрийн акцын эсрэг зогсож мэдэх дүр яригдана. Одоогийн байдлаар Н.Учрал гэгдэж байна. Тэр MCS, Ухаа худгийн асуудалд хөдөлж өгөөгүй, зөрүүлээд Х.Баттулгын Төгрөг нуур гэдэг асуудлыг гаргаж тавьсан.

Түүнчлэн МАН-ын дүрмээр намын дарга нь Ерөнхий сайд байх ёстой. МАН дүрмээ өөрчлөхгүй бол намын даргаа давхар сольж таарна гэсэн үг. Ингэхээр өрнөлийн дийлэнх нь МАН дотор л шийдэгдэх юм.

Нөгөө талд олон нийт шударга ёсыг хүсээд байдаг. Энэ хүсэл дээр нь зөвхөн улс төрийн төлөвлөгдсөн сценарь өрнөчихдөг, нэг хүн огцорч, нөгөө нь гарч ирдэг зовлон бий. Зургаан жилийн дараа Л.Оюун-Эрдэнэ хүүгийнхээ асуудлаар бууж болох ч эхлүүлсэн ажил явах нь бол чухал. Тэгээд ч тэр УИХ-ын гишүүний статусаар улс төрд үлдэнэ. Хоёрт, сценарь Монголыг хамгийн бага хэмжээнд хорлох тийм хүчинд л үйлчилж, өрнөөсэй гэж хүсэх үлдэж байгаа юм.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй