Нэг дороос: ОХУ-ын Ерөнхийлөгч Путин "Монгол Улс манай чухал худалдааны түнш"

ОХУ-ын Ерөнхийлөгч Владимир Путин, Монголын удирдагч Ухнаагийн Хүрэлсүх нар Москвад Кремлийн их ордны Гэгээн Кэтриний танхимд уулзсан ОХУ-ын Ерөнхийлөгчийн хэвлэлийн албанаас мэдээллээ.

Уулзалтын эхэнд,

ОХУ-ын Ерөнхийлөгч Владимир Путин: Эрхэм хүндэт ноён Ерөнхийлөгч, Эрхэм хүндэт найзууд аа!

Оросын аугаа их эх орны дайны ялалтын 80 жилийн ойн энэхүү түүхэн баярын өмнөхөн Москва хотод хүрэлцэн ирсэн та бүхэнд халуун мэндчилгээ дэвшүүлье. Энэхүү ойн арга хэмжээнд биечлэн оролцож байгаад тань үнэхээр их баяртай байна.

Манай хоёр улсын түүхэнд хамтын баатарлаг хуудсууд бий. 2024 онд Халхын-Голын дэргэд Японы милитаристуудыг хамтран ялсан маань 85 жилийн ойгоо болсон билээ. Миний бие Улаанбаатар хотод хийсэн айлчлалын үеэр бид энэ ойг хамтдаа тэмдэглэсэн.

Аугаа их эх орны дайны жилүүдэд болон 1945 онд Квантуны армийг бут цохиход Монгол Улстай хамтран хүчин зүтгэснийг Орос улс өндрөөр үнэлдэг. Монголын эгэл жирийн ардуудын хандиваар бүрдсэн тусламж болон Монголын сөнөөгч онгоцны бие бүрэлдэхүүн, арми манай орон, хамтын ялалтын төлөө тулалдаж байлаа. 1945 оны наймдугаар сард Монголын Ардын Арми Японы цэргийн эсрэг ажиллагаанд оролцож байсан. Бид үүнийг үргэлж санаж, эрхэмлэн дээдэлдэг.

Найрсаг хөрш Монгол Улстай иж бүрэн стратегийн түншлэлийн харилцаа бол манай гадаад бодлогын тэргүүлэх чиглэлүүдийн нэг юм. Улс төрийн яриа хэлэлцээ өрнөж, Засгийн газрын тэргүүнүүд уулзаж, Гадаад харилцааны яамдын шугамаар зөвлөлдөх механизм ажиллаж байна. Батлан хамгаалах, аюулгүй байдал, парламент хоорондын харилцаа, соёл, боловсролын салбарт хамтын ажиллагаа ч өрнөсөөр байна.

Монгол Улс манай чухал худалдааны түнш. Өнгөрсөн онд хоёр талын худалдааны эргэлт 17.5 хувиар өссөн. Энэ оны эхний хоёр сарын байдлаар дахин 25 гаруй хувиар нэмэгджээ. Эрчим хүчний салбарын хамтын ажиллагаа зэрэг Монголд чухал ач холбогдолтой асуудлуудад ч бид хариу өгч байна.

Та бүхнийг энд харахад бид маш их баяртай байна. Тавтай морилно уу!

Монгол Улсын Ерөнхийлөгч У.Хүрэлсүх : Баярлалаа, эрхэмсэг ноён Ерөнхийлөгч өө.

Оросын Холбооны Улсын Ерөнхийлөгч, эрхэм хүндэт Владимир Владимирович!

Аугаа их эх орны дайны ялалтын 80 жилийн ойд зориулсан баярын арга хэмжээнд оролцохоор таны урилгаар баатар хот Москвад хүрэлцэн ирж, тантай уулзаж байгаадаа маш их баяртай байна.

Аугаа их эх орны дайн нь дэлхий нийтийн энх тайван, тогтвортой байдлыг тогтооход чухал үүрэг гүйцэтгэсэн хүн төрөлхтний нийтлэг ялалт байлаа. Энэ бол хүн төрөлхтний нийт ялалт юм. Хамгийн хүнд хэцүү цаг үед, хамгийн хүнд жилүүдэд бид энэхүү дайнтай хамт тэмцэж, бүх зовлон бэрхшээлийг туулсан. Үүнийг бид мартаж болохгүй.

Энэхүү түүхэн ялалтын өдөр болох Аугаа их эх орны дайн — энэ бол бидний хувьд үнэ цэнтэй, түүхэн огноо юм. Бид энэ түүхийг гуйвуулах ёсгүй. Тиймээс би Оросын Холбооны Улсын Ерөнхийлөгч тантай болон бүх орос ард түмэнд Монгол Улсын нэрийн өмнөөс ялалтын баярын мэнд дэвшүүлье.

Энэ арга хэмжээнд Монгол Улсын Зэвсэгт хүчний алба хаагчид оролцож байна. Тэд 80 жилийн ойн баярт ёслолд оролцож байгаад баяртай байна. 80 жил өнгөрчээ. Манай өвөө, элэнц хуланц нар энэ дайны хүнд бэрх цаг үед хамт байсан. Бусад цэргийн ажиллагаанд ч мөн адил бид хамтдаа оролцож, тэр цаг үеийг даван туулсан.

Аугаа их эх орны дайн эхэлсэн цагаас хойш монголын ард түмэн оросын ард түмэнтэй үргэлж хамт байж ирсэн. Бид хамтдаа тэр хүнд цаг үеийг туулж, өөрсдийн бүх боломж бололцоог дайчилж байсан. “Хувьсгалт Монгол” танкны бригад болон сөнөөгч онгоцны баг, бусад нэн шаардлагатай эд материалын тусламжийг монголчууд харамгүй өгч, Оросын ард түмнийг дэмжсэн. Ингэснээр оросын ард түмэн ялалт байгуулах боломжтой болсон юм. Монголын ард түмэн энэ түүхэнд хувь нэмрээ оруулсандаа бахархдаг.

Мөн бид өнгөрсөн онд 1939 оны Халхын голын тулалдаанд хамтдаа байгуулсан ялалтын 85 жилийн ойг тэмдэглэсэн. Эрхэм Ерөнхийлөгч таны түүхэн айлчлал энэ үед тохиосон бөгөөд энэ нь манай хоёр улсын харилцааг иж бүрэн стратегийн түвшинд хүргэх шинэ үндэс суурийг тавьсан юм.

Энэ айлчлалын үеэр бид та бүхэнтэй хамтран хэлэлцээр хийж, хоёр талын хамтын ажиллагааны бүх асуудлыг хэлэлцэн, тохиролцсон бүх ажлуудын хэрэгжилтийг ярилцсан. Бид тантай хамтран ярилцах шаардлагатай хэд хэдэн асуудал байна. Эхнийх нь бол Улаанбаатар хотын ДЦС-3-ын шинэчлэл, өргөтгөлийн талаар байгуулсан гэрээний хэрэгжилт юм.

Эх сурвалж:Кremlin.ru

Ц.ТАМИР

Энэ мэдээнд өгөх таны үнэлгээ

Хуваалцаарай Жиргээрэй