Хувь заяа нь маргааш шийдэгдэх хоёр

АН, ХҮН намуудын дарга нарын хувь заяа маргааш шийдэгдэнэ. Учир нь МАН-ын бага хурлаар намын даргад хариуцлага тооцох дүрэм байхгүй. Тэгэхээр 369 гишүүний бүрэлдэхүүнтэй МАН-ын Бага хурлаар Хамтарсан Засгийн газрыг унагааж, МАН-ыг дангаар засаглуулах уу, шинэ Ерөнхий сайдтай болох уу гэдгийг л хайрцаглаж шийднэ.

Ерөнхийлөгч "Дангаараа засагла" гэсэн бол Ерөнхий сайд "Хамтарсан засгаа тараахгүй" гэдэг байр суурь илэрхийлсэн гэгдэж буй.

Товчхондоо АН болон ХҮН намын хувь заяа хэрхэх вэ гэдэг нь дээсэн дөрөөн дээр ирлээ. Ялангуяа Л.Гантөмөр, Т.Доржханд нарынх бүр эргэлзээнд орлоо.

Ардчилсан намын  дарга Л.Гантөмөрийн хувьд, Тэргүүн шадар сайдын албанд “давхар” дээлтэй сууж байгаа. Түүнээс гадна АН-аас долоон сайд бий.

ХҮН намын дарга Т.Доржхандын хувьд, Шадар сайд бөгөөд Эрчим хүчний үндэсний хороог ахалж байгаа. Түүнээс гадна ХҮН намаас ганц сайд бий.

"МАН ганцаараа найман жил засаглачихсан. Дахиад дөрвөн жилээр сунгачихвал нийгэмд эмх замбараагүй байдал үүснэ" гэх үгсээр гоёчилж, хамтарсан Засгийн газар байгуулагдсан. "Монгол хүний орлого 10 мянган ам.долларт хүрнэ” гэх амлалтаар эхлүүлсэн ч, 200 хонолгүй дэнжигнэв. Олны ам ч тэдэнд тийм сайн байсангүй. Эрх баригчидтай нэгдээд сөрөг хүчний үүргээ умартсан гэж тасралтгүй шүүмжлүүлсээр байв. УИХ-ын гишүүн Д.Ганбат "Л.Гантөмөр, Т.Доржханд 2-ыг төрсөн ээж аав нь ч танихгүй болтлоо ЗГ-ын улаан хамгаалагчид болчихлоо" хэмээн ёжилж.

Хэрэв МАН-ын Бага хурал "Хамтрахгүй" гэж шийдвэр МАН-ын сайд нар үлдэж, АН, ХҮН явна. Л.Гантөмөр, Т.Доржханд нар УИХ-ын гишүүн статустайгаа үлдэнэ. Тэдний хувь заяа маргааш шийдэгдэх нь ээ. Ерөнхий сайдынх ч бас.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй