Б.Мөнхсоёл гишүүн намынхаа томчуулаас айв уу

Ерөнхий сайдад итгэл үзүүлэх эсэх асуудлаар санал хураахын өмнө ХҮН намаас сонгогдсон УИХ-ын гишүүн Б.Мөнхсоёл сэтгүүлчдэд мэдээлэл өгсөн. Энэ үеэрээ намынхаа дотоод ардчиллыг үгүйсгэж, дарамталж, айлган сүрдүүлдэг гэх асуудлыг хөндсөн юм.

Ингэхдээ Б.Найдалаа, П.Наранбаяр нарын нэрийг дурдаж, хамгаалалт хүсэж байгаагаа зарласан. Уг асуудлын хүрээнд түүнийг намаасаа явна хэмээн мэдэгдлээ гэж олон хэвлэл бичиж. Харин өөрөө "би намаасаа явна гэж хэлээгүй" гэх тайлбарыг хийгээд байна.

Тэгвэл ХҮН намын дарга Т.Доржханд, "Б.Мөнхсоёл гишүүн эмоцио дийлсэнгүй. ХҮН нам таалагдахгүй бол намаас гарч болно", гэсэн бол

Боловсролын сайд П.Наранбаяр, "Б.Мөнхсоёл гишүүнийг ийм үг хэлсэнд харамсаж байна, хамгаалалт авах хэмжээнд хүрээгүй" гэж тус тус мэдэгдэв.

Ингээд харвал түүний намдаа үлдэх эсэх "томчуудад" нь нэг их нөлөөгүй аж. Угаас тэднийг эрх ашгийнхаа төлөө санал өгүүлэх гэж л ашигладаг гээд хэлчихсэн. Б.Мөнхсоёл гишүүн хувь хүнийхээ итгэл үнэмшлийг дагаж, өөрийн сонголтоор намдаа элссэн болов уу. Иймд намынхаа дотоод асуудал, санал зөрөлдөөнийг ийн дэвэргэх нь бусад нам, эвсэлдээ "хоол болох"-оос цаашгүй байх.

Мөн яагаад заавал өчигдөр ийм мэдээлэл хийв. Өмнө нь ямар эрх ашиг байсан болоод хамгаалалт авах хэмжээнд асуудал хурцадсан байхад энэ хүртэл тэсэв гэдэг анхаарал татна. Ямартай ч одоогийн байдлаар ХҮН намаас явахгүй нь бололтой.

Д.УЛСАА

Энэ мэдээнд өгөх таны үнэлгээ

Хуваалцаарай Жиргээрэй