Г.Занданшатар Булганд нисдэг тэргээр очиж, уулзалт хийжээ: Хуучин сайд нар улирч, Ерөнхийлөгчийн нөлөө орох магадлал дийлж байна

УИХ-ын залуу дийлэнх гишүүд нэгдэж, Ерөнхий сайд Г.Занданшатарт хандан хуучин сайд нарыг улираан ажиллуулахгүй байх нь зүйтэй гэж шаардлага хүргүүлсэн. Энэ бол баасан гарагийн үйл явдал. Улмаар бямба, ням гарагтаа шинэ Засгийн газрын бүтэц, бүрэлдэхүүн тодорхой болно гэсэн хүлээлт байсан. Гэвч өнөөдөр мөн л өргөн баригдах магадлал тун бага байгаа аж.

Булган нисэх буудалд бямба гарагт R66 нисдэг тэрэг буужээ

Тэгвэл, эх сурвалжийн мэдээлж буйгаар Ерөнхий сайд Г.Занданшатар Улаанбаатараас Булган аймаг руу нисэж, тэнд тодорхой уулзалтууд хийжээ. Мэдээллийг магадлахаар Булган нисэх буудлын датаг авч үзвэл,

• Зургаадугаар сарын 14-ний бямба гарагт өглөөний 08.30 цаг өнгөрөөд Mongolian Airways-ийн R66 нисдэг тэрэг газардсан
• Тухайн өдрийн орой 17.00 цаг орчимд буцаад ниссэн байна.

Үүнээс өмнөх хоёр өдөр нислэггүй байсан нь харагдаж байна.

Өөрөөр хэлбэл, Ерөнхий сайд Г.Занданшатар бямба гарагт Булган аймагт нисдэг тэргээр ирж, улс төрийн хүрээний уулзалт хийгээд тэр өдөртөө буцсан байгаа юм.

Хуучин сайд нарын дийлэнх үлдэх чигтэй

С.Бямбацогт, Б.Дэлгэрсайхан, Л.Энх-Амгалан, Б.Чойжилсүрэн гээд Засгийн газарт багтаж үлдэх хүсэлтэй сайд нар олон байгаа. Одоогийн байдлаар Ч.Номин л нэгэнтээ Л.Оюун-Эрдэнийн Засгийн газарт хариуцлага хүлээн ажиллаж байсны хувьд, дараагийн кабинетад орохгүй гэдгээ ил тод илэрхийлээд буй.

Харин анх удаа сонгогдсон болон залуу дийлэнх УИХ-ын гишүүд нийлж, гурван шаардлага бүхий албан бичигт гарын үсэг цуглуулан, Ерөнхий сайдад өргөн бариад буй.

Гурван шаардлагад жендерийн тэгш байдлыг хангах, УИХ-ын гишүүд дотроос сайд нарыг бүрдүүлэх зэрэг утга дурдагдаж байгаа ч бүхэлдээ бол: Хуучин сайд нарыг дахин томилох нь зарчмын хувьд буруу гэсэн утгатай юм.

Амралтын өдрүүдэд ч энэ шаардлага ихээхэн хэлэлцэгдэж, Үндсэн хууль зөрчсөн, Ерөнхий сайдын бүрэн эрхэд халдсан явдал гэцгээж байгаа. УИХ-ын гишүүн Х.Баасанжаргал парламентад дахь туршлагатай хуульчдын төлөөллийн хувьд, тус шаардлага огтхон ч хууль зөрчөөгүй гэдгийг мэдэгдсэн байна.

Бүтэц төдийлөн хумигдахгүй, томилгоонд Ерөнхийлөгчийн нөлөө өндөр байна

Ерөнхий сайд Г.Занданшатар томилогдох өдрөө УИХ-ын чуулганы хуралдаанд өөрийн танхимын бүтэц, бүрэлдэхүүний талаарх ганцхан үг хэлсэн.

Энэ бол "Цомхон биш зохистой байхыг эрхэмлэнэ" гэсэн үг байв. Өөрөөр хэлбэл, яамдыг цөөлж, тодорхой сайд нарын албан тушаалыг цомхотгоно гэдэг олон нийтийн хүлээлтэд амлалт өгөөгүй.

Өдгөө Г.Занданшатар гурван үндэсний хороог татан буулгахаас бусдаар яамдыг буюу ЗГ-ын бүтцийг хэвээр хадгалах чигтэй. Тодруулбал, Үндэсний хороодын сайдын статус бүхий дарга нарыг томилохгүй үлдээнэ. Улмаар төсвийн тодотголоор зардлыг нь таначих аж. Ингэснээр Засгийн газрын тухай хуулийг хөндөхгүй өнгөрөх юм.

Тэгэхээр Засгийн газарт АН-ын зургаан сайд (хоёр үндэсний хороог хасаж тооцов), ХҮН намын хоёр сайдын суудал гарч байна. Жижиг намууд эвсэхгүй гэдгээ илэрхийлж, АН бүр тас гэдийчхээд байна. Энэ аясаар МАН дангаар засаглах нь үндсэндээ тодорхой болчхоод буй юм. Хуучин сайд нараас Ч.Номин явж, танхимаа дэлбэлсэн Н.Учрал тэргүүн шадар сайд, С.Бямбацогт ЗГХЭГ-ыг удирдах зэргээр хувилбарууд яригдаж буй юм.

Эмэгтэйчүүдийн квотод Х.Булгантуяа, А.Ариунзаяа нар яригдаж буй ч саях хагарлын үеэр тэд Л.Оюун-Эрдэнэ талд байсан учир дэмжлэг бага байна. Ерөнхийлөгчийн хүн тул Б.Батцэцэг улирч, Ч.Ундрам сайдаар нэмэгдэх чигтэй буй. Төсвөө тодотгохгүй гэж гүрийсээр байсан ч тодотгох үнэнд гүйцэгдээд буй Б.Жавхланд Сангийн яамыг хэвээр үлдээж, эрчим хүчний салбарт хэрэг мандаасан Б.Чойжилсүрэнд "ачаагаа үүр" гэх том даргын чиглэл ирсэн гэх. Үндсэндээ асуудал таригчдаа явуулахгүй, асуудлыг нь үүрүүлнэ гэж тооцсон логик харагдана.

Ингэж Л.Оюун-Эрдэнийн огцорсноос хойш Монголын улс төрд үлэмж нөлөөтэй байгаа Ерөнхийлөгч У.Хүрэлсүх шинэ ЗГ-ын бүрэлдэхүүнд ихээхэн анхаарал тавьж байгаа нь тодорхой болов. Тэд Б.Бат-Эрдэнэ, З.Мэндсайхан зэрэг хуучин сайдаар ажиллаж байсан залуусыг эргүүлж татах уу гэх хувилбар ч бий. Тодруулбал, У.Хүрэлсүхийн мэддэг, хамтран ажиллаж үзсэн, түүний итгэлийг хүлээж байсан улстөрчдийг Засгийн газарт оруулах яриа хэлэлцээ дийлэхээр байна.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй