Чуулган: “Эрчим хүч-3 төсөл”-ийг хэрэгжүүлэх зээлийн хэлэлцээрийг соёрхон баталлаа

НЭМЭЛТ: 10:50 цаг

Өнөөдөр УИХ-ын Даргын дэргэдэх зөвлөл хуралдахтай холбоотойгоор чуулганы үдээс хойших хуралдаан завсарлалаа.

Хуралдаанаар өчигдөр ХХААХҮ-ийн сайд Ж.Энхбаярын өргөн барьсан Гаалийн албан татвараас чөлөөлөх тухай хууль хүчингүй болсонд тооцох тухай хуулийн төслийг чуулганд яаралтайгаар өргөн барихыг дэмжих эсэх дээр санал хураалт явуулж, 68.6 хувиар дэмжлээ.

Тиймд хуулийн төслийг Төсвийн байнгын хороонд шилжүүллээ. Өчигдрийн чуулганаар хэлэлцсэн “Эрчим хүч-3 төсөл”-ийг хэрэгжүүлэх Монгол Улс, Олон улсын сэргээн босголт, хөгжлийн банк хоорондын Зээлийн хэлэлцээрийг соёрхон батлах тухай хуулийн төслийг үргэлжлүүлэн хэлэлцэж, санал хураалт явууллаа. Улмаар зээлийн хэлэлцээрийг 66 гишүүн дэмжиж, соёрхон батлагдлаа.

ЭХЛЭЛ: 10:30 цаг

УИХ-ын баасан /2025.06.20/ гарагийн нэгдсэн хуралдаан эхэллээ. Өнөөдрийн хуралдаанаар гурван хуулийн төсөл хэлэлцэнэ.

Хуралдааны эхэнд УИХ-ын дарга Д.Амарбаясгалан гишүүдийг танхимдаа ирэхийг сануулаад хаврын чуулган хаахтай холбогдуулан үг хэллээ.

Тэрбээр “Хаврын чуулган өндөрлөх хугацаа ойртож байгаатай холбоотойгоор өнөөдөр 11:30 цагаас УИХ-ын даргын дэргэдэх зөвлөл хуралдана. Хуралдаанаар дараах гурван долоо хонгийн хугацаанд хэлэлцэж батлах, хэлэлцэх эсэхийг шийдвэрлэх шаардлагатай 30 орчим тогтоолын төслийг хэлэлцэнэ. Үүнтэй холбоотойгоор УИХ-ын тамгын газар бэлтгэл ажлыг хангах шаардлагатай байна. Мөн УИХ-ын гишүүд хуралдаа оролцож, хаврын чуулган завсарлахаас өмнө хэлэлцэж батлах хуулиудын хуваарийг гаргаж цэгцэлнэ. Мөн шинээр байгуулагдсан Засгийн газар хэд хэдэн хуулийн төслийг яаралтай горимоор хэлэлцүүлэх асуудал байна. Дээрээс нь наадмаас өмнө амжиж төсвийн тодотгол өргөн барих хүсэлтийг Ерөнхий сайд тавьсан. Тиймд эдгээр асуудлуудыг бид өнөөдөр даргын дэргэдэх зөвлөл дээр ярилцаж, хуваарь гаргана” гэлээ.

Энэ мэдээнд өгөх таны үнэлгээ

Хуваалцаарай Жиргээрэй