Шинэ засгийн томилгоогоор даргагүй болсон 20 минутын хот үндэсний хороо ₮50 тэрбумаар зөвлөх үйлчилгээ авна

20 минутын хот хөгжлийн төв 50 тэрбум төгрөгөөр Бүтээн байгуулалтын төслүүдийн нэгдсэн менежментийн зөвлөх үйлчилгээ авах тендер зарласан байна.

Уг зөвлөх үйлчилгээний гол зорилго нь Нийслэл Улаанбаатар хотыг 20 минутын стандарттай хот болгон хөгжүүлэх институцийг чадавхжуулан хөгжүүлж, бүтээн байгуулалтын мега төсөлүүдийг нэгдсэн удирдлага, зохион байгуулалтаар хангаж, үр дүнтэй хэрэгжүүлэх юм байна.

Ажлыг тодруулбал,

• Бодлого, стратегийг боловсруулах
• Бүтээн байгуулалтын төслүүдийг үнэлэх, эрэмбэлэх
• Эрх зүйн орчныг сайжруулах
• Оролцогч талуудын үйл ажиллагааны уялдааг хангах, зохицуулах
• Хүний нөөцийн чадавхийг бэхжүүлэх хөтөлбөр хэрэгжүүлэх
• Бүтээн байгуулалтын төслүүдийг хэрэгжүүлэхэд дэмжлэг үзүүлэх
• Бүтээн байгуулалтын төслүүдийг нэгдсэн менежментээр хангах
• Зорчилт хөдөлгөөний эргэлтийн судалгаа
• Гүйцэтгэгчийг сонгон шалгаруулах, гэрээлэх
• Гэрээний хэрэгжилтийг хангуулах
• Төслийн менежментийг хэрэгжүүлэх
• Эрсдэлийн удирдлагыг хэрэгжүүлэх
• Бүтээн байгуулалтын төслүүдийн санхүүжилтыг шийдвэрлэхэд дэмжлэг үзүүлэх
• Санхүүжилтийн стратеги, төлөвлөгөөг боловсруулах
• Санхүүжилт, хөрөнгө оруулагчдыг тодорхойлох, тэдэнд хандах
• Санхүүжилт хөрөнгө оруулалтыг татах
• Бүтээн байгуулалтын төслүүдийг мэдээлэх, сурталчилахад зөвлөх үйлчилгээг үзүүлэх юм байна.

Тухайлбал, эл тендерээ хоёр хоногийн өмнө буюу /2025-06-24/-нд зарласан бөгөөд ирэх сарын 23-ны өдөр хүртэл үнийн саналаа хүлээн авахаар төлөвлөсөн байна. Ингэхдээ тендерийн нийт төсөвт өртөг болох 50 тэрбум төгрөгийг Улсын төсвийн хөрөнгө оруулалтаас санхүүжүүлэхээр тусгажээ.

20 минутын хот хөгжлийн төв нь 20 минутын хот үндэсний хороонд хамаардаг. Уг хороог өмнө нь Р.Эрдэнэбүрэн даргалж байсан бол шинэ Засгийн газар байгуулагдсанаар хороод бууж, салбар яамтайгаа нэгдсэн байдаг. Улмаар уг хороо Хот байгуулалт, барилга, орон сууцжуулалтын сайд Э.Бат-Амгалангийн удирдлагад шилжсэн гэсэн үг.

Тендерийн дэлгэрэнгүй мэдээллийг дараах линкээс үзэх боломжтой.

https://user.tender.gov.mn/mn/invitation/detail/1746496469092

О.ОНОН

Энэ мэдээнд өгөх таны үнэлгээ

Хуваалцаарай Жиргээрэй