Элчин сайд А.Төмөрийг эргүүлэн татах саналыг Ерөнхийлөгч, УИХ-тай зөвшилцөхөөр хүргүүлжээ

Элчин сайд А.Төмөрийн гэргий, 41 настай Л.Орхон өнгөрсөн тавдугаар сарын 9-ний /2025.05.09/ шөнө Бангкок хотын Клонг Тоэй дүүргийн Сукхумвит 24 дэх орон сууцны 17 давхраас унаж, харамсалтайгаар нас барсан. Энэ хэрэг намжилгүй өдий хүрч, гэр бүлээс гадуурх харилцаанаас үүдэлтэй гэгдэж байгаа.

Мөн талийгаач эхнэрийнхээ цогцсыг цагдаа нар ирэхээс өмнө дөрвөн давхраас нэг давхар луу зөөсөн, утсыг нь нуусан, ар гэрийнхийг ирэхээс өмнө чандарласан байсан зэрэг мэдээллүүд анхаарал татаж байгаа юм.

Тиймд хэрэг ийнхүү газар авсантай холбоотойгоор Тайландын Хаант Улсад суух Онц бөгөөд Бүрэн эрхт Элчин сайд А.Төмөрийг албан тушаалаас нь эгүүлэн татах шийдвэрийг сарын өмнө Гадаад харилцааны яамнаас гаргаж, Монгол Улсын Ерөнхийлөгч У.Хүрэлсүхэд албан бичиг хүргүүлсэн.

Энэ албан бичиг сарын өмнө ЕТГ-т очсон. Хуульд заасан журмын дагуу Засгийн газрын санал болгосноор Ерөнхийлөгч өөрийн бүрэн эрхийн хүрээнд Элчин сайдыг эгүүлэн татах, томилох асуудлыг Улсын Их Хуралд ирүүлж, зөвшилцдөг.

Өөрөөр хэлбэл, Ерөнхийлөгч Элчин сайдыг эргүүлэн татах асуудлыг ганцаараа шийдвэрлэхгүй. Хуулийн дагуу бүрэн эрхийнхээ хүрээнд уг асуудлыг УИХ-д оруулж зөвшилцсөнөөр эцсийн шийдвэр гаргана гэсэн үг. Харин өнгөрсөн хугацаанд УИХ-аар тус асуудал орж ирээгүй бөгөөд, хүргүүлсэн эсэх нь тодорхойгүй байсан юм.

Харин нөгөө талд Элчин сайд А.Төмөрийн бүрэн эрхийн хугацаа ирэх долдугаар сард буюу дөрвөн өдрийн дараа дуусах юм. Тэгвэл үүнтэй зэрэгцэж Ерөнхийлөгч Элчин сайд А.Төмөрийг эргүүлэн татахыг зөвшилцөх саналыг УИХ-д хүргүүлсэн талаар албаны эх сурвалж хэллээ.

Д.ЦЭГЦ

Энэ мэдээнд өгөх таны үнэлгээ

Хуваалцаарай Жиргээрэй