Б.Чойжилсүрэнгийн 100 хоногийн тоолуурын 26 нь гүйсэн ч, салбарт нь цэгцлээгүй олон асуудал үлдлээ

Өмнөх Засгийн газарт эдэлсэн ямба нь энэ удаагийнхад ял болж хувирсан нэг сайд бий. Тэр нь, Б.Чойжилсүрэн.

УИХ-аар Л.Оюун-Эрдэнэд итгэл үзүүлэх асуудлыг хэлэлцэхийн урд шөнө ДЦСIII-т осол гарч нэг хүн эндсэн. Иймд Б.Чойжилсүрэнг Эрчим хүчний салбарт зуурсан бантангаа янзлах даалгавар оноож, шинэ засагт дахин сайдаар нь багтаасан билээ. Улмаар ДЦС-III ТӨХК-д гарсан ослын шалтгааныг олж засах 100 хоногийг түүнд Г.Занданшатар өгөөд байгаа юм. Эл тоолуур зургаадугаар сарын 20-ны өдрөөс гүйж эхэлсэн байдаг. Тэгэхээр аль хэдийнээ 26 хоног нь гүйж, 70 гаруй гаруй хоног үлдлээ. Энэ Засгийн газрын 100 хоногтой яг давхцана.

Есдүгээр сарын сүүлээр Засгийн газар ч, Эрчим хүчний сайд Б.Чойжилсүрэн ч 100 хоногийн ажлаа тайлагнана. Наадмын дараа намар. Аль аль нь наадам хөөлгүй 100 хоногтоо идэвхийлэн ажиллаж байгаа гэж найдъя.

Ямартай ч эрчим хүчний салбарт яаралтай засаж, залруулах учиртай олон ажил бий.

Нэгт, ДЦС-III ТӨХК-д гарсан осол нь эрчим хүчний салбар уналтад орсны илрэл. Учир нь Улаанбаатарчууд ирэх өвлийг аргалаад өнгөрөх боломжгүй болчхоод байна. Ослын шалтгааныг олж засах үүрэг Б.Чойжилсүрэнд оногдсон. Түүнээс гадна Засгийн газрын БЭТ-өөр Н.Тавинбэх томилогдчихоод буй. Ямартай ч эхний ээлжинд "ДЦС-3"-ын шатсан байшинг засахад 7, дулаан үйлдвэрлэх горим руу шилжүүлэхэд ₮8.5 тэрбум шаардлагатай" гэж мэдэгдсэн.

Хоёрт, Өмнөх Засгийн газар Эрчим хүний салбарт реформ хийх нэрээр иргэд, аж ахуйн нэгжийн ачааллыг нэмснээс өөрөөр бодлогын том өөрчлөлт хийж чадаагүй. Үнийн өсөлтийг 30-85 хувиар хийсэн. Үнэ, тарифыг нь нэмэхээр реформ болчихдоггүй гэдгийг харуулаад байна. Хаврын чуулганаар Эрчим хүчний тухай хуулиа ч оруулж ирж хэлэлцсэнгүй. Эл салбарын ТӨХК-иудынхаа хэдийг нь татан буулгаж, хэдийг нь нэгтгэхээ ч хэлсэнгүй. Ерөөс системийн өөрчлөлт ер ярьсангүй дуусгалаа.

Гуравт, Эрчим хүчний сайд Б.Чойжилсүрэн. Эрчим хүчний төсөл хариуцсан “Эрчим хүчний Үндэсний хорооны дарга” сэтэртэйгээр Шадар сайд Т.Доржханд. Эл салбарын 24 компанийг багтаасан “Эрчис Монгол”-ын захирал Г.Амартүвшин. Эрчим хүчний зохицуулах хорооны дарга Э.Түвшинчулуун. Ерөөс маш олон толгойтой, олон даргатай. Эрх мэдлээ булаацалдсан толгойнуудын зөрчил эцэстээ салбараа татан унагаасан гэж бичигдсэн нь ч үнэн.

Дөрөвт, Хотын дарга Х.Нямбаатар “Бөөрөлжүүтийн II блок ашиглалтад орсноор өвлийг хүндрэлгүй давна” гэж байгаа юм. Өнгөрсөн 2024-2025 онд шилжих өвөл Улаанбаатар хотын эрчим хүчний систем 200 мВт чадлын дутагдалд орохоор байсныг хоёр шинэ станц ашиглалтад оруулж, богино хугацаанд нөхөж чадсан. Үүний нэг нь Бөөрөлжүүтийн цахилгаан станц. Одоо II блокт нь найдвар тавьж байна. Х.Нямбаатар Эрчим хүчний сайд биш тул нийслэлд найдалгүй Б.Чойжилсүрэн л ажлаа яаравчлах шаардлагатай.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй