Үндсэн хууль болон цэцийн тухай хуулиа зөрчин томилогдсон УИХ-ын ЕНБД

Өчигдрийн /2025.11.28/ чуулганаар түүнийг ҮХЦ-ийн гишүүнээс чөлөөлж, УИХ-ын Ерөнхий нарийн бичгийн даргаар томилов. Шөнийн 00.00 цаг дөхөж байхад тамгаа авч, ажлаа хүлээлцсэн юм.

Тодруулбал, Л.Өлзийсайхан ҮХЦ-ийн гишүүний суудлаа өгөөд УИХ-ын дарга Н.Учралын дэргэд ирлээ. Тэрбээр, гурван жилийн өмнөх суудалдаа буцаж суув. 2021 онд Г.Занданшатар спикер байхдаа УИХ-ыг анх удаа эмэгтэй ЕНБД-тай болгосон кейс үлдээж байв. Гэвч төд удалгүй ҮХЦ гишүүн рүү татсан байдаг.

Энэ удаад эрх баригчид Үндсэн хуулийн бус томилгоо хийж, УИХ-ын тамгын газрын ЕНБД-тай боллоо. Ингэхдээ,

Үндсэн хуулийн цэцийн тухай хуулийн 5.4 дэх заалт

• “Цэцийн гишүүнийг хувийн хүсэлтээ гаргасан, эрүүл мэндийн улмаас, эсхүл Төрийн албаны тухай хуульд заасан төрийн алба хаах насны дээд хязгаарт хүрсэн болон энэ зүйлийн З дахь хэсэгт зааснаас бусад үндэслэлээр бүрэн эрхийн хугацаа дуусахаас нь өмнө уг албан тушаалаас чөлөөлөх, эгүүлэн татах, өөр ажилд шилжүүлэхийг хориглоно” гэснийг зөрчжээ.

Мөн Үндсэн хуулийн 65.1 дэх заалт

• “Үндсэн хуулийн цэц есөн гишүүнээс бүрдэнэ. Тэдгээрийн гурвыг Улсын Их Хурал, гурвыг Ерөнхийлөгч, гурвыг Улсын дээд шүүхийн санал болгосноор Улсын Их Хурал зургаан жилийн хугацаагаар томилно” гэснийг зөрчсөн байна.

Дур зоргын томилгоог хууль зөрчин хийсээр байгаагийн нэг жишээ болов.

Л.Өлзийсайхан 1998 оноос эхлэн УБИС болон МУИС-ийн Хууль зүйн сургуульд багшилж байсан. Улсын Их Хурлын Тамгын газар, Шүүхийн ерөнхий зөвлөл, Нийслэл дэх Захиргааны хэргийн анхан шатны шүүх, Засгийн газрын Хэрэг эрхлэх газарт удирдах ажил эрхэлж байсан бөгөөд 2019-2023 онд Улсын Их Хурлын Ерөнхий нарийн бичгийн даргаар ажиллаж байв. Дараа нь Монгол Улсын Үндсэн хуулийн цэцийн гишүүнээр томилогдон ажилласан намтартай.

Энэ мэдээнд өгөх таны үнэлгээ

Хуваалцаарай Жиргээрэй