У.Хүрэлсүхийн дон – “хулхи“ хурандаагийн хувцас

Ерөнхий сайд У.Хүрэлсүх цэрэг, армийн хувцас өмсөж, зэр зэвсэг агсан, ард иргэдээ айлгачих шиг боллоо. Өнгөрөгч долоо хоногт зэвсэгт хүчний Хээрийн команд штабын сургалт болж, энэ үеэрээ тэр цэргийн хувцас өмсөж гангарчээ.

“Хамгийн урт улаан хивсэн дээр, хамгийн удаан ганцаараа алхсан хүн болж Гиннесийн номонд бичигдлээ” гэхчлэн түүнийг шоглох хүн цөөнгүй байна. Шоглогсод, шоологсдод буруу өгөх аргагүй юм. Учир нь Ардчилсан тогтолцоотой гэгддэг улсын Ерөнхий сайд хөдөө, гадаа ажиллах бүрдээ юу юуны туханд хүрэлгүй цэргийн хувцас шүүрч аваад байдаггүй билээ.

У.Хүрэлсүхийн “цэрэг” стиль Ерөнхий сайдын албанд томилогдсон цагаас нь эхлээд л шүүмжлэл дагуулсан. Хурандаагийн хувцас өмсөж, ёсолгоо хийн мишээсэн зураг нь сошиал орчинд хэлэлцэгдэж, өмссөн хувцаснаас нь дэг ёсны 14 алдаа илрүүлэгдэж байсан нь 2017 юм даа. Нэг ёсондоо түүнийг “хулхи” хурандаа гэдгээр нь өөлдөг. Харин өнгөрөгч хугацаанд тэр магадгүй хаан болтлоо шүтэгдсэн.

Ерөнхий сайдынхаа донг хуваалцан шүлэнгэтсэн зарим улс төрчид нэг л их цэрэг, армийн хувцас өмсөж, хүмүүст үүрэг өгч, таахалзах болсон. УИХ-ын гишүүн Б.Баярсайханаас эхлээд Хууль зүйн сайд Х.Нямбаатар хүртэл цэрэг хувцсаар гангарч, шүүмжлүүлээд ирүүтээ “Би чинь цэрэг цолтой хүн” гэж сошиалд хэрэлдэж “эмзэг дэлбээ” царайлцгааж буй.

У.Хүрэлсүхийн намтрыг харвал Батлан хамгаалахын их сургуулийг Улс төрч мэргэжлээр төгссөн гэх өгүүлбэр байдаг. Харин өөр цэргийн албанд сурч, ажиллаж байсан тухай нь бичигддэггүй. Гэхдээ тэр хурандаа цолтой. Үүнийх нь талаар УИХ-ын гишүүн асан Н.Номтойбаяр, “Хүрэлсүх өөрийгөө цэргийн хүн, хурандаа цолтой гэж ярьж, зургаа авахуулах дуртай. Яахав, УИХ-ын гишүүд чинь Таван толгойн цэргийн баазад хоёр өдөр бай буудаж, архи ууж байгаад цол нэмдэг. Тэгэж л хурандаа болсон” хэмээн ярилцлага өгч байв.

Тэр хурандаа цолтой байг. Гэхдээ түүндээ эрдэж юм л бол “хулхи” хурандаа царайлж, уулыг өргөж, усыг эргүүлчих шахдгаа одоо эргэж харна уу. “Хойд Солонгос руу яваад байна уу даа, бид” гэж олон хүн ярьж буйд чих тавина уу.

Ер хэлбэрт шүлэнгэтэж улс төр хийхээ хэзээ болих вэ, улс төрчдөө.  Улс төрийн албыг улс төрч хүн шиг төлөв даруу хашиж, хүлээсэн үүрэгтээ хэзээ эзэн болж сурах вэ. Эцэс төгсгөлгүй попрол, хийрхлүүдээс тань ард иргэд хэдий нь залчихсан билээ.

Төгсгөл: Хэлбэртэх тусмаа шоглуулна.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй