Амьдралаараа дэнчин тавьсан "Бэлтэс мөрөн"-ий хохирогчдод хуулийнхан ч хуумгай хандлаа

Хөвсгөл аймгийн хэмжээнд залилах, мөнгө угаах гэмт хэрэг үйлдэж, 4000 гаруй иргэнийг хохироосон Г.Нямдэлгэр, С.Ганбаатар, Р.Бузмаа, Г.Нямдалай, Г.Пүрэвсүрэн, Н.Уяабор, Ч.Очир, Д.Цэнгэнбаяр, Б.Мэндсайхан нарт холбогдох эрүүгийн хэргийн шүүхийн урьдчилсан хэлэлцүүлэг боллоо.

Тодруулбал, эдгээр хүмүүс нь гэр бүл бөгөөд Хөвсгөл аймгийн Баянзүрх сумын уугуул айл бөгөөд С.Ганбаатар, Р.Бузмаа нар нь гэр бүл, Г.Нямдэлгэр, Г.Нямдалай нар нь тэдний хүүхэд, Н.Уяабор хүргэн гэх мэтээр ураг төрлийн хамааралтай хүмүүс юм.

Зургаадугаар сарын 06-ны өдөр Хөвсгөл аймгийн Биеийн тамир, спортын газрын байранд хийсэн шүүхийн урьдчилсан хэлэлцүүлгийг Дархан-Уул аймаг дахь Сум дундын Эрүүгийн хэргийн анхан шатны шүүхийн шүүгч Б.Ихтамир даргалж явуулсан бөгөөд эрүүгийн хэргийг нэмэлт ажиллагаа хийлгэхээр прокурорт буцааж шийдвэрлэсэн. Учир нь зарим оролцогчийг хохирогчоор тогтоогоогүй, дүгнэлт гаргасан шинжээчид хуульд заасан эрх, үүрэг танилцуулаагүй зэргээс шалтгаалж 618 хавтас, 154,204 хуудастай 9 яллагдагч, 2595 хохирогч, 1737 иргэний хариуцагчтай уг хэргийг мөрдөн байцаалтад буцаасан юм.

Шүүх хэрвээ эхний байдлаар хүлээн авч шийдвэрлэвэл нийт хохирогчийн эрх ашиг бүрэн хангагдах боломжгүй болох, хэргийн нөхцөл байдлыг бодитой тогтоох боломжгүй, хохирлыг гэм буруутай этгээдүүдэд хэрхэн хуваан хариуцуулах нь тодорхойгүй зэрэг сөрөг үр дагавартай юм байна.

"Бэлтэс мөрөн" -гийн мөнгө өсгөж өгдөг гэх үйл ажиллагаанд татагдаж орсон иргэдийн амьдрал зарим нь бүр орвонгоороо эргэсэн. Хүүхдийнхээ хуримаа хийх гэж байсан 100 сая төгрөгийг, хашаа байшин үл хөдлөх хөрөнгөө барьцаалж, цалингийн зээл авч тэр ч бүүхэл гэр бүл бие биенээсээ нууцаар эд хөрөнгөөрөө дэнчин тавьж ийш орсон байдаг.

Гэвч жил гаруй хугацаанд асуудлаа тээж, хуулийн байгууллагаас итгэл найдвар горилж байсан хохирогчдын хүлээлт ийнхүү талаар өнгөрөв. Хуулийн байгууллага ч тэдэнд хуумгай ханджээ.

Б.БАЯРТ

Энэ мэдээнд өгөх таны үнэлгээ

Хуваалцаарай Жиргээрэй